Mishumo Ya Vhaapostola 19:1-41
19 Musi Apolo+ e ngei Korinta, Paulo a pfuka nga madzinguni a re kule na lwanzhe a ya Efesa.+ A wana vhaṅwe vhafunziwa,
2 a amba navho a ri: “Naa no wana muya mukhethwa musi ni tshi vha vhatendi?”+ Vhone vha ri: “A ri athu u vhuya ra zwi pfa uri hu na muya mukhethwa.”
3 A ri: “No lovhedzwa nga ndovhedzo ya nnyi?” Vha ri: “Nga ndovhedzo ya Yohane.”+
4 Paulo a ri: “Yohane o lovhedza vhathu u itela u sumbedza uri vho rembuluwa,+ o vhudza vhathu uri vha tende ane a ḓo mu tevhela,+ ane a vha Yesu.”
5 Musi vha tshi pfa zwenezwo, vha lovhedzwa dzinani ḽa Murena Yesu.
6 Musi Paulo a tshi vha vhea zwanḓa, vha wana muya mukhethwa,+ vha amba nga nyambo dzo fhambanaho na u porofita.+
7 Vho vha vhe vhanna vha ṱoḓaho u vha 12.
8 A dzhena sinagogoni,+ a fhedza miṅwedzi miraru a tshi amba nga tshivhindi, a tshi funza na u lingedza u ita uri vha tende mafhungo a Muvhuso wa Mudzimu.+
9 Musi vhaṅwe vha sa tendi, vha tshi sasaladza Nḓila+ ya Murena phanḓa ha gogo, Paulo a ṱuwa+ na vhafunziwa, a ya a funza ḓuvha ḽiṅwe na ḽiṅwe holoni ya tshikolo tsha Tirano.
10 O ita zwenezwo miṅwaha mivhili, Vhayuda na Vhagerika vhoṱhe vha dzulaho vunduni ḽa Asia vha pfa ipfi ḽa Murena.
11 Mudzimu a bvela phanḓa a tshi ita mishumo i mangadzaho a tshi shumisa Paulo,+
12 lwe vhathu vha dzhia malabi awe na fasikoṱi* dzawe vha zwi isa kha vhathu vha lwalaho.+ Vhenevho vhathu vha fhola, na madimoni a bva khavho.+
13 Fhedzi vhaṅwe vha Vhayuda vha tshimbilaho vha tshi pandela madimoni na vhone vha lingedza u shumisa dzina ḽa Murena Yesu u itela u fhodza vha re na madimoni; vha tshi ri: “Ndi a ni pandela nga dzina ḽa Yesu ane Paulo a huwelela ngae.”+
14 Vhaṅwe vhe vha ita zwenezwo, ndi vharwa vha sumbe vha muhulwane wa vhotshifhe wa Muyuda ane a pfi Sikefa.
15 Fhedzi dimoni ḽa amba navho ḽa ri: “Yesu na Paulo ndi a vha ḓivha;+ fhedzi inwi ni vhonnyi?”
16 Onoyo munna a re na dimoni a lwa navho vhoṱhe a vha kunda, vha shavha kha yeneyo nnḓu vhe fhedzi vho huvhala.
17 Zwa ḓivhiwa nga Vhayuda na Vhagerika vhoṱhe vha dzulaho Efesa; vhoṱhe vha ofha, dzina ḽa Murena Yesu ḽa tou ṋaṋa u huliswa.
18 Vhanzhi vho tendaho vha ḓa vha ḓiambulula phanḓa ha vhathu zwe vha vha vha tshi zwi ita.
19 Vhathu vhanzhi vha itaho manditi vha ḓisa bugu dzavho, vha dzi fhisa vhathu vha tshi zwi vhona.+ Vha vhalela mutengo wadzo vha wana u tshi lingana na shekele dza 50 000 dza siḽiva.
20 Ipfi ḽa Yehova* ḽa swika fhethu hunzhi, ḽa vha na maanḓa.+
21 Nga murahu ha zwenezwi zwithu zwoṱhe, Paulo a humbula uri u ḓo ya Yerusalema musi o no fhira nga Makedonia+ na Axaya. A ri: “Ndi tshi bva Yerusalema,+ ndi ḓo ya Roma.”+
22 A vhudza Timotheo+ na Erasito+ vhane vha mu thusa uri vha ye Makedonia, fhedzi ene a fhedza tshifhinga e vunduni ḽa Asia.
23 Nga tshenetsho tshifhinga, ha vuwa khakhathi khulu+ vha tshi khou hanedza Nḓila+ ya Murena.
24 Muṅwe munna ane a pfi Demetrio o vha a tshi ita thembele ṱhukhu dzi fanaho na thembele ya Arithemisi* nga siḽiva, zwe zwa vha zwi tshi ita uri vhanna vha re na vhutsila vha wane tshelede nnzhi.+
25 A kuvhanganya vhenevho vhanna na vhaṅwe vhane vha ita wonoyu mushumo, a ri: “Inwi vhanna, ni a zwi ḓivha uri wonoyu mushumo u a ri pfumisa.
26 Ni khou zwi vhona na u zwi pfa uri onoyu Paulo ho ngo ṱuṱuwedza vhathu vha Efesa+ fhedzi, fhedzi o ṱuṱuwedza vhathu vhanzhi vha vunduni ḽa Asia, uri vha tende zwine a amba zwa uri midzimu yo itwaho nga vhathu a si midzimu ya vhukuma.+
27 Ndi ofha uri vhathu vha ḓo amba zwithu zwi si zwavhuḓi nga ha bindu ḽashu. Vhathu a vha tsha ḓo dzhiela nṱha thembele ya mudzimu* washu muhulu Arithemisi. Vhathu vhoṱhe vha ngei Asia na ḽifhasini ḽoṱhe vha gwadamela Arithemisi, fhedzi ha tsha ḓo huliswa nga nṱhani ha zwine Paulo a khou zwi amba.”
28 Musi vha tshi pfa zwenezwo vha sinyuwa zwihulu, vha vhidzelela vha ri: “Arithemisi wa Vhaefesa ndi muhulu!”
29 Muḓini ha vuwa bonyongo, vha kokodza Gayo na Aristariko+ vhanna vha Makedonia, vha tshimbilaho na Paulo, vha ya navho sietha.
30 Paulo o vha o ḓiimisela u dzhena vhukati ha vhathu, fhedzi vhafunziwa vha si mu tendele.
31 Na vhaṅwe vhadzudzanyi vha vhuṱambo na mitambo, vho mu ḓowelaho, vha ruma muthu uri a mu humbele uri a si vhee vhutshilo hawe khomboni nga u ya sietha.
32 Vhaṅwe vho vha vha tshi khou vhidzelela vha tshi amba zwavho na vhaṅwe vha tshi amba zwiṅwe; hu na bonyongo henefho. Vhanzhi vho vha vha sa ḓivhi zwe vha ḓela zwone.
33 Nga zwenezwo, vha bvisa Alekzanda vhukati ha gogo nahone Vhayuda vha mu sukumedzela phanḓa; Alekzanda a vha fhumudza nga tshanḓa ngauri o vha a tshi ṱoḓa u amba.
34 Musi vha tshi ṱhogomela uri o vha e Muyuda, vhoṱhe vha vhidzelela lu ṱoḓaho u vha awara mbili vha tshi ri: “Arithemisi wa Vhaefesa ndi muhulu!”
35 Musi muṅwaleli wa muḓi o no fhumudza gogo, a ri: “Vhathu vha Efesa, ndi nnyi ane a si ḓivhe uri muḓi wa Efesa ndi wone une wa linda thembele ya Arithemisi muhulu na tshifanyiso tsho waho tshi tshi bva ṱaḓulu?
36 Samusi hu si na ane a nga hanedza zwenezwo, ni fanela u dzika ni si ite zwithu nga maṱaṱa.
37 No ḓisa vhanna vhe vha si tswe thembeleni kana u sema mudzimu* washu.
38 Arali Demetrio+ na vhanna vha re na vhutsila vha tshi vhona muṅwe muthu mulandu, hu na maḓuvha a khothe nahone hu na vhavhusi vha vundu;* vha litsheni vha vhonane milandu nga tshavho.
39 Arali ni tshi kha ḓi vha na maṅwe mafhungo, a fanela u dzudzanywa khothe u ya nga mulayo.
40 Ngauri ri khomboni ya u pfi ro lwa na muvhuso nga zwe zwa itea ṋamusi, samusi ri si na zwiitisi zwine ra nga ḓiimelela ngazwo nga ha u vuwa ha heḽi bonyongo.”
41 Musi o no amba zwenezwo, a balanganya vhenevho vhathu.
Ṱhaluso dzi re magumoni a siaṱari
^ Kana “apuroni.”
^ Kana “Diana.”
^ Ndi mudzimu wa mufumakadzi.
^ Ndi mudzimu wa mufumakadzi.
^ Sedzani Mutevhe Wa Ṱhalutshedzo Ya Maipfi.
