Nehemia 4:1-23
4 Musi Sanebalati+ a tshi tou pfa uri ri khou vusa luvhondo, a sinyuwa, a halifha* nga maanḓa, a bvela phanḓa a tshi goḓa Vhayuda.
2 A amba na vhahawe na mmbi ya Samaria a ri: “Avha Vhayuda vha si na nungo vha khou ita mini? Naa vha ḓo u kona wonoyu mushumo vhe vhoṱhe? Naa vha ḓo ṋekedza zwiṱhavhelo? Naa vha vhona u nga vha ḓo fhedza wonoyu mushumo nga ḓuvha ḽithihi? Naa vha ḓo vusa matombo o swaho a thulwi ya maḓinga?”+
3 Zwino Tobiya+ wa Muamoni,+ we a vha o ima tsini nae, a ri: “Arali phunguwe ya ṋamela zwine vha khou fhaṱa, i ḓo wisa mutsheṱo wavho.”
4 Nehemia a ri: Mudzimu washu, ṱhogomela, ri khou nyadziwa,+ ita uri u goḓa havho hu vhuyelele nṱha ha ṱhoho dzavho,+ ita uri vha dzhiiwe vha iswe vhuthubwani.
5 U songo vha hangwela milandu yavho kana u phumula zwivhi zwavho phanḓa hau,+ ngauri vho sema vhafhaṱi.
6 Ra bvela phanḓa ri tshi fhaṱa luvhondo, luvhondo lwoṱhe lwa ṱangana ra lu vusa u swika kha hafu ya vhulapfu halwo, vhathu vha bvela phanḓa vha tshi shuma nga mbilu yoṱhe.
7 Musi Sanebalati, Tobiya,+ Vhaarabu,+ Vhaamoni na Vhaasidodo+ vha tshi tou pfa uri mushumo wa u fhaṱa mbondo dza Yerusalema u khou bvela phanḓa na uri he ha vha ho kwashiwa hu khou valiwa, vha sinyuwa nga maanḓa.
8 Vha ita tshimbevha tsha u ḓa u lwa na Yerusalema na u ri thithisa.
9 Fhedzi ra rabela Mudzimu washu ra vhea vhathu vha u vha linda vhusiku na masiari.
10 Naho zwo ralo, vhathu vha Yuda vho vha vha tshi ri: “Vhashumi* a vha tshee na nungo, na maḓinga ndi manzhi; ri nga si vhuye ra kona u fhaṱa holu luvhondo.”
11 Maswina ashu a bvela phanḓa a tshi ri: “Ri ḓo vha dodela vha mangala ri vhukati havho, ra vha vhulaya ra imisa wonoyo mushumo.”
12 Musi Vhayuda vhane vha dzula tsini navho vha tshi ḓa, vha ri vhudza lunzhi-lunzhi* uri: “Vha ḓo ḓa vha tshi bva thungo dzoṱhe.”
13 Nda vhea vhanna vha u linda nga murahu ha luvhondo lwe lwa vha lu sa athu u fhela, nda vha vhea nga miṱa yavho vho fara mabanga, mapfumo avho na vhura havho.
14 Musi ndi tshi vhona uri vho tshuwa, nda ṱavhanya nda takuwa nda amba na vharangaphanḓa+ na vhathusi vha vhavhusi na vhaṅwe vhathu vhoṱhe nda ri: “Ni songo vha ofha.+ Humbulani uri Yehova ndi muhulu, u a ofhisa;+ lwelani vhahaṋu, vharwa vhaṋu na vhananyana vhaṋu, vhafumakadzi vhaṋu na miḓi yaṋu.”
15 Musi maswina ashu a tshi pfa uri zwe a vha a tshi khou zwi ita ri vho zwi ḓivha na uri Mudzimu wa ngoho o khakhisa maano avho, roṱhe ra vhuyelela mushumoni washu wa u fhaṱa luvhondo.
16 U bva nga ḽeneḽo ḓuvha u ya phanḓa, tshiṅwe tshigwada tsha vhanna vhanga tsho vha tshi tshi shuma,+ ngeno tshiṅwe tsho fara mapfumo, zwiṱangu na vhura, tsho ambara zwiambaro zwa u ḓitsireledza nndwani. Vharangaphanḓa+ vho ima murahu ha vha nnḓu ya Yuda
17 vhane vha khou fhaṱa luvhondo. Vho hwalaho mihwalo vho vha vha tshi shuma nga tshanḓa tshithihi ngeno tshiṅwe tshanḓa tsho fara tshiṱhavhane.
18 Mufhaṱi muṅwe na muṅwe o vha o kungela banga ḽawe kha khundu musi a tshi khou fhaṱa, we a vha a tshi lidza luṋanga+ o vha o ima tsini hanga.
19 Nda amba na vharangaphanḓa na vhathusi vha vhavhusi na vhathu vhoṱhe nda ri: “Mushumo ndi muhulu, ndi munzhi, ri shuma ri kule na kule.
20 Musi ni tshi pfa luṋanga lu tshi lila, ni kuvhangane hune ra vha hone. Mudzimu washu u ḓo ri lwela.”+
21 Ra bvela phanḓa ri tshi shuma ngeno vhaṅwe vho fara mapfumo, u bva ḽi tshi tsha u swika ḽi tshi kovhela.
22 Nga tshenetsho tshifhinga nda amba na vhathu nda ri: “Munna muṅwe na muṅwe a fhedze vhusiku e Yerusalema na muḓinḓa wawe, vha ḓo ri linda vhusiku, vha shuma nga masiari.”
23 Nṋe kana vhahashu, vhaḓinḓa vhanga+ na vhalindi vha ntevhelaho a ro ngo vhuya ra bvula zwiambaro zwashu, muṅwe na muṅwe washu o vha a tshi dzula o fara tshiṱhavhane nga tshanḓa tshawe tsha u ḽa.
Ṱhaluso dzi re magumoni a siaṱari
^ Kana “dinalea.”
^ Kana “Vhahwali vha mihwalo.”
^ Thevhedz., “lwa fumi.”
