Numeri 19:1-22
-
Kholomo tswuku na maḓi a u kunakisa (1-22)
19 Yehova a dovha a amba na Mushe na Aroni a ri:
2 “Hoyu ndi mulayo we Yehova a u amba: ‘Vhudza Vhaisiraele uri vha u ḓisele kholomo tswuku i songo holefhalaho+ na i sa athu u hwalaho dzhogo.
3 Ni i ṋee tshifhe Eliasara uri a i bvisele nnḓa ha madennde i ṱhavhiwe phanḓa hawe.
4 Tshifhe Eliasara u ḓo dzhia maṅwe a malofha ayo nga munwe wawe a a hasha lwa sumbe phanḓa ha dennde ḽa muṱangano.+
5 Yeneyo kholomo i ḓo fhiswa a tshi zwi vhona. Mukumba wayo na ṋama yayo na malofha ayo khathihi na muswane wayo zwi ḓo fhiswa.+
6 Tshifhe u ḓo dzhia khuni dza muṱaululo, dza muhisopo+ na labi ḽitswuku, a zwi posa muliloni hune kholomo ya khou fhiswa hone.
7 Tshifhe u ḓo kuvha zwiambaro zwawe a ṱamba nga maḓi, nga murahu ha zwenezwo a vhuyelele madenndeni; fhedzi tshifhe u ḓo vha na tshika u swika ḽi tshi kovhela.
8 “‘Na onoyo we a fhisa kholomo u ḓo kuvha zwiambaro zwawe na u ṱamba nga maḓi, u ḓo vha na tshika u swika ḽi tshi kovhela.
9 “‘Muthu o kunaho u ḓo kuvhanganya miḽora ya yeneyo kholomo+ a i laṱa nnḓa ha madennde fhethu ho kunaho, tshitshavha tsha Isiraele tshi fanela u vhea yeneyo miḽora u itela uri i shumiswe na maḓi a u kunakisa.+ Ndi tshifhiwa tsha u pfumelela tshivhi.
10 Ane a khou kuvhanganya miḽora ya yeneyo kholomo, u ḓo kuvha zwiambaro zwawe a vha na tshika u swika ḽi tshi kovhela.
“‘Enea a ḓo vha maitele a lini na lini kha Vhaisiraele khathihi na mutsinda a re vhukati haṋu.+
11 Ane a kwama tshitumbu tsha muthu u ḓo vha na tshika lwa maḓuvha a sumbe.+
12 Onoyo muthu a ḓikunakise nga eneo maḓi nga ḓuvha ḽa vhuraru, nga ḓuvha ḽa vhusumbe u ḓo vha a si na tshika. Fhedzi arali a sa ḓikunakisa nga ḓuvha ḽa vhuraru, u ḓo vha a tshi kha ḓi vha na tshika nga ḓuvha ḽa vhusumbe.
13 Ane a kwama tshitumbu tsha muthu a si ḓikunakise, u ḓo vha o shata tshika denndeni ḽikhethwa* ḽa Yehova,+ onoyo a vhulawe kha ḽa Isiraele.+ Ngauri ho ngo shashwa nga maḓi a u kunakisa,+ u ḓo dzula e na tshika.
14 “‘Mulayo une wa shuma musi muthu o fela denndeni ndi hoyu: Ane a dzhena kha ḽeneḽo dennde na we a vha e nga ngomu haḽo u ḓo vha na tshika lwa maḓuvha a sumbe.
15 Khali iṅwe na iṅwe i songo tibwaho i ḓo vha na tshika.+
16 Ane a kwama muthu o vhulawaho nga banga ḓakani kana ane a kwama tshitumbu kana rambo ḽa muthu kana vhiḓa u ḓo vha na tshika lwa maḓuvha a sumbe.+
17 Vha dzhie miṅwe ya miḽora ya tshifhiwa tsha u pfumelela tshivhi yo fhiswaho, vha i shele maḓi a tshisima i khalini vha tshi itela muthu a re na tshika.
18 Muthu a si na tshika+ u ḓo dzhia muhisopo+ a u mbwandamedza maḓini, a hasha dennde na khali dzoṱhe na vhathu vha re henefho na kha muthu we a kwama rambo kana muthu we a vhulawa kana tshitumbu kana vhiḓa.
19 Muthu a si na tshika u ḓo hasha muthu a re na tshika nga ḓuvha ḽa vhuraru na ḽa vhusumbe, u ḓo mu kunakisa kha tshivhi tshawe nga ḓuvha ḽa vhusumbe;+ a kuvhe zwiambaro zwawe na u ṱamba nga maḓi, u ḓo vha a si na tshika nga madekwana.
20 “‘Fhedzi muthu a re na tshika a si ḓikunakise, onoyo muthu u ḓo vhulawa tshivhidzoni,+ ngauri o shata tshika nnḓu khethwa ya Yehova. Ho ngo shashwa nga maḓi a u kunakiswa, u na tshika.
21 “‘Enea maitele a lini na lini a ḓo shuma khavho: ane a hasha maḓi a u kunakisa+ a kuvhe zwiambaro zwawe na ane a kwama maḓi a u kunakisa u ḓo vha na tshika u swika ḽi tshi kovhela.
22 Tshithu tshiṅwe na tshiṅwe tshine tsha kwamiwa nga muthu a songo kunaho tshi ḓo vha na tshika u swika ḽi tshi kovhela.’”+
Ṱhaluso dzi re magumoni a siaṱari
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
