Numeri 23:1-30
23 Bileamu a amba na Balaka a ri: “Mphaṱele aḽeṱare dza sumbe henefha,+ u nḓisele mboho dza sumbe na thutha dza sumbe.”
2 Nga u ṱavhanya Balaka a ita zwe Bileamu a mu vhudza zwone. Balaka na Bileamu vha ṋekedza dzenedzo mboho na thutha kha aḽeṱare iṅwe na iṅwe.+
3 Bileamu a amba na Balaka a ri: “Sala hafha tsini na tshifhiwa tshau tsha u fhiswa, nṋe ndi ṱuwe. Khamusi Yehova u ḓo amba na nṋe. Zwoṱhe zwine a ḓo ndzumbululela zwone, ndi ḓo u vhudza.” Ngauralo, a gonya tshikwarani.
4 Musi Mudzimu a tshi amba na Bileamu,+ Bileamu a amba nae a ri: “Ndo fhaṱa aḽeṱare dza sumbe dzi tshi khou tevhekana, nda ṋekedza mboho na thutha kha aḽeṱare iṅwe na iṅwe.”
5 Yehova a vhudza Bileamu zwine a fanela u zwi amba a ri:+ “Vhuyelela ha Balaka, u mu vhudze hezwi.”
6 A vhuyelela a vhona Balaka na vhakololo vhoṱhe vha Moaba vho ima tsini na tshifhiwa tshawe tsha u fhiswa.
7 A amba hoyu mulaedza a ri:+
“Balaka khosi ya Moaba o mbvisa Aramu,+O mbvisa thavhani dza vhubvaḓuvha a ri:
‘Iḓa u ntsemele Yakobo.
Iḓa u kaidze Isiraele.’+
8 Ndi nga sema hani vhe Mudzimu a si vha seme?
Ndi nga kaidza hani vhe Yehova a si vha kaidze?+
9 Ndi vha vhona ndi nṱha ha matombo,Ndi vha vhona ndi zwikwarani.
Vha nga vhathu vhane vha dzula vhe vhoṱhe henefho;+Vha ḓidzhia vho fhambana na dziṅwe tshaka.+
10 Ndi nnyi ane a nga vhala gogo ḽa Yakobo ḽo ḓalaho sa buse+Kana ane a nga vhala muthihi kha vhaṋa kha Vhaisiraele?
Nnditshe ndi fe ndo luga,Nnditshe ndi fe u fana navho.”
11 Balaka a amba na Bileamu a ri: “Wo nnyita mini? Ndo u ḓisa uri u seme maswina anga, zwino iwe u khou a fhaṱutshedza.”+
12 Bileamu a fhindula a ri: “Naa a tho ngo tea u amba zwoṱhe zwine Yehova a mmbudza zwone?”+
13 Balaka a amba nae a ri: “Ndi humbela uri u ṱuwe na nṋe ri ye huṅwe fhethu hune wa ḓo kona u vha vhona zwavhuḓi. U ḓo vhona vhaṅwe vhavho; a u nga vha vhoni vhoṱhe. U ntsemele vhone u henefho.”+
14 A mu isa ḓakani ḽa Tsofimi, nṱha ha thavha ya Pisiga,+ a fhaṱa aḽeṱare dza sumbe, a ṋekedza mboho na thutha kha aḽeṱare iṅwe na iṅwe.+
15 Bileamu a amba na Balaka a ri: “Sala hafha tsini na tshifhiwa tshau tsha u fhiswa musi ndi tshi kha ḓi amba nae hafhaḽaa.”
16 Yehova a amba na Bileamu, a mu vhudza zwine a fanela u zwi amba a ri:+ “Vhuyelela ha Balaka, u mu vhudze hezwi.”
17 A vhuyelela khae a mu wana o mu lindela tsini na tshifhiwa tshawe tsha u fhiswa e na vhakololo vha Moaba. Balaka a mu vhudzisa a ri: “Yehova o ri mini?”
18 A mu vhudza hoyu mulaedza a ri:+
“Balaka, takuwa u thetshelese.
Nthetshelese iwe murwa wa Tsipori.
19 Mudzimu ha ngi muthu, ha zwifhi,+Ha fani na murwa muthu ane a ḓisola.+
Naa zwine a zwi amba, a nga si zwi ite?
Naa zwine a zwi amba, a nga si zwi bveledze?+
20 Ndo laedzwa uri ndi fhaṱutshedze,O vha fhaṱutshedza,+ ndi nga si zwi shandule.+
21 A nga si tende Yakobo a tshi itelwa manditi,A nga si tende Isiraele a tshi dzhena khakhathini.
Yehova Mudzimu wawe u nae,+U rendwa sa khosi vhukati havho.
22 Mudzimu o vha pfulusa Egipita.+
Khavho u tou nga ṋanga dza ṋari.+
23 Yakobo a nga si loiwe,+Isiraele a nga si konwe nga ane a bvumba,+Zwino hu tshi ambiwa nga ha Yakobo na Isiraele hu ḓo pfi:
‘Vhonani zwe Mudzimu a zwi ita!’
24 Havha vhathu vha ḓo ima sa ndau,Vha ḓo ḓiimisa u fana na ndau.+
I nga si lale u swika i tshi ḽa tshipondwa tshayoYa nwa malofha a vho vhulawaho.”
25 Balaka a amba na Bileamu a ri: “Arali u sa koni u vha sema, u songo vha fhaṱutshedza.”
26 Bileamu a fhindula Balaka a ri: “Naa a tho ngo u vhudza uri: ‘Ndi ḓo ita zwoṱhe zwine Yehova a amba’?”+
27 Balaka a amba na Bileamu a ri: “Ndi khou humbela uri ndi u ise huṅwe fhethu. Khamusi Mudzimu wa ngoho u ḓo zwi takalela uri u ntsemele vhone u henefho.”+
28 Balaka a dzhia Bileamu a mu isa nṱha ha thavha ya Pheoro, yo lavhelesaho thungo ya Yeshimoni.*+
29 Bileamu a amba na Balaka a ri: “Mphaṱele aḽeṱare dza sumbe henefha, u nḓisele mboho dza sumbe na thutha dza sumbe.”+
30 Balaka a ita zwe Bileamu a mu vhudza, a ṋekedza mboho na thutha kha aḽeṱare iṅwe na iṅwe.
Ṱhaluso dzi re magumoni a siaṱari
^ Kana khamusi, “sogani.”
