Nzumbululo I Yaho Kha Yohane 6:1-17
-
Ngwana i bvisa zwiganḓo zwa rathi (1-17)
6 Nda vhona Ngwana+ i tshi bvisa tshiganḓo tsha u thoma kha zwa sumbe,+ nda pfa tshiṅwe tsha zwivhumbiwa zwiṋa+ zwi tshilaho tshi tshi amba nga ipfi ḽi ngaho mubvumo tshi tshi ri: “Iḓa!”
2 Nda vhona bere tshena,+ o i ṋamelaho o vha o fara vhura; a ṋewa khare,+ a ya u kunda maswina awe.+
3 Musi Ngwana i tshi bvisa tshiganḓo tsha vhuvhili, nda pfa tshivhumbiwa tsha vhuvhili tshi tshilaho+ tshi tshi ri: “Iḓa!”
4 Ha bvelela iṅwe bere, yo vha i tswuku, o i ṋamelaho a ṋewa banga ḽihulu uri a ite uri hu si tsha vha na mulalo kha ḽifhasi uri vhathu vha vhulayane.+
5 Musi Ngwana i tshi bvisa tshiganḓo tsha vhuraru,+ nda pfa tshivhumbiwa tsha vhuraru tshi tshilaho+ tshi tshi ri: “Iḓa!” Nda vhona bere ntswu, o i ṋamelaho o vha o fara tshikalo.
6 Nda pfa ipfi vhukati ha zwivhumbiwa zwiṋa zwi tshilaho ḽi tshi ri: “Khwathi* ya goroi ndi dinari,*+ khwathi tharu dza baḽi ndi dinari; u songo tshinyadza mapfura a muṱwari na waini.”+
7 Musi Ngwana i tshi bvisa tshiganḓo tsha vhuṋa, nda pfa tshivhumbiwa tsha vhuṋa tshi tshilaho+ tshi tshi ri: “Iḓa!”
8 Nda vhona bere yo tshenuluwaho, o i ṋamelaho o vha a tshi pfi Lufu. Vhiḓa* ḽo vha ḽi tshi khou mu tevhela ḽi tsini-tsini nae. Lufu na Vhiḓa* zwa ṋewa maanḓa a u vhusa tshipiḓa tsha vhuṋa tsha ḽifhasi na u vhulaya vhathu nga banga, nḓala,+ vhulwadze na nga zwivhanda.+
9 Musi Ngwana i tshi bvisa tshiganḓo tsha vhuṱanu, nda vhona nga fhasi ha aḽeṱare+ hu na malofha+ a vho vhulawaho ngauri vho tevhedza ipfi ḽa Mudzimu na u ita mushumo wa u huwelela.+
10 Vha vhidzelela vha ri: “Iwe Murena Muvhusahoṱhe, Mudzimu mukhethwa na wa ngoho,+ u ḓo haṱula lini na u lifhedza malofha ashu kha vho dzulaho kha ḽifhasi?”+
11 Vhoṱhe vha ṋewa tshiambaro tshitshena,+ vha vhudzwa uri vha awele lwa tshifhinganyana u swikela tshivhalo tshi tshi fhelela tsha vhaṅwe vhalanda na vharathu vhavho vhane vha ḓo vhulawa u fana navho.+
12 Nda vhona Ngwana i tshi bvisa tshiganḓo tsha vhurathi, ha vha na mudzinginyo muhulu; ḓuvha ḽa swifhala sa dzanganda ḽo itwaho nga mamvele,* ṅwedzi woṱhe wa nga malofha,+
13 ṋaledzi dza wela kha ḽifhasi, sa muhuyu u tshi dzinginyiswa nga muya muhulu wa wisa mahuyu a magaga.
14 Ḽiṱaḓulu ḽa pombiwa sa mupombo,+ ḽa ngalangala, thavha dzoṱhe na zwiṱangadzime zwoṱhe zwa bviswa vhudzuloni hazwo.+
15 Mahosi a ḽifhasi, vhaḓinḓa vhahulwane, vhalangammbi, vho pfumaho, vha re na maanḓa, vhalanda vhoṱhe na vhoṱhe vha si vhalanda, vha dzumbama mabakoni na matomboni a thavha.+
16 Vha amba na thavha na matombo vha ri: “Ri weleni+ ni ri dzumbe kha Mudzimu o dzulaho kha khuluṋoni+ na kha mbiti dza Ngwana,+
17 ngauri ḓuvha ḽihulu ḽa mbiti dzavho ḽo swika,+ ndi nnyi ane a ḓo kona u ima?”+
Ṱhaluso dzi re magumoni a siaṱari
^ Sedzani Ṱhume. B14.
^ Ndi tshelede ya Roma ya siḽiva i eḓanaho muholo wa ḓuvha. Sedzani Ṱhume. B14.
^ Kana “Hades.” Sedzani Mutevhe Wa Ṱhalutshedzo Ya Maipfi.
^ Kana “Hades.” Sedzani Mutevhe Wa Ṱhalutshedzo Ya Maipfi.
^ Khamusi ndi mamvele a mbudzi.
