Sakaria 10:1-12
10 “Humbelani Yehova uri a ni nisele mvula nga tshifhinga tsha mvula ya luṱavula.
Ndi Yehova ane a ita makole a mvula,Ndi ene ane a vha nisela mvula,+A ita uri vhoṱhe vha wane zwimela.
2 Ngauri zwifanyiso zwa terafimi* zwo amba vhufhura;Mingome yo vhona mabono a mazwifhi.
Vha amba miḽoro i sa vhuyedzi tshithu,Vha khuthadzela mahala.
Ndi ngazwo vha tshi ḓo tendeleka sa nngu.
Vha ḓo tambula ngauri a hu na mulisa.
3 Mbiti dzanga dzi dugela vhalisa,Ndi ḓo vhona mulandu vharangaphanḓa* vhane vha tsikeledza;Ngauri Yehova wa mavhuthu o livhisa ṱhogomelo kha vha nnḓu ya Yuda vhane vha vha sambi ḽawe,+O ita uri vha fane na bere yawe yavhuḓi ya nndwa.
4 Hu bva murangaphanḓa khae,Hu bva ane a tikedza na u vhusa khae,Khae hu bva vhura ha nndwa;Hu bva mulavhelesi muṅwe na muṅwe khae, vhenevha vhoṱhe vha bva khae.
5 Vha ḓo fana na vhahali,Vhane vha kandekanya matope a re nḓilani nga tshifhinga tsha nndwa.
Vha ḓo lwa ngauri Yehova u navho;+Vhaṋameli vha bere vha ḓo shoniswa.+
6 Ndi ḓo ita uri vha nnḓu ya Yuda vha vhe na maanḓa,Nda tshidza vha nnḓu ya Yosefa.+
Ndi ḓo vha vhuisa shangoni ḽavho,Ngauri ndi ḓo vha khathutshela;+Zwa tou nga a tho ngo vhuya nda vha laṱa;+Ngauri ndi nṋe Yehova Mudzimu wavho, ndi ḓo vha fhindula.
7 Vhaefuraimi vha ḓo nga muhali,Vha ḓo takala vha nga vho nwa waini.+
Vhana vhavho vha ḓo zwi vhona vha takala;Vha ḓo takalela Yehova.+
8 ‘Ndi ḓo lidza muludzi nda vha kuvhanganya;Ngauri ndi ḓo vha rengulula+ vha vha vhanzhi,Vha ḓo dzula vhe vhanzhi.
9 Naho nda vha balanganya sa mbeu vhukati ha dzitshaka,Vha ḓo nkhumbula vhe henengei kule;Vhone na vhana vhavho vha ḓo vha na nungo vha vhuya.
10 Ndi ḓo vha vhuisa vhe shangoni ḽa EgipitaNda vha kuvhanganya vha tshi bva ngei Asuri;+Ndi ḓo vha ḓisa shangoni ḽa Giḽiada+ na ḽa Libanoni,Na henefho a vha nga vhi na fhethu ho eḓanaho ha u dzula.+
11 Musi vha tshi thivhelwa nḓila nga lwanzhe,Ndi ḓo pfuka khalwo nda rwa magabelo alwo.+
Musi vha tshi thivhelwa nḓila nga Mulambo wa Nili, ndi ḓo xisa maḓi awo.
Ndi ḓo shonisa Asuri ane a ḓikukumusa,Lubaḓa lwa Egipita a lu tsha ḓo vha hone.+
12 Nṋe Yehova ndi ḓo ita uri vha vhe na maanḓa,+Vha ḓo tshimbila dzinani ḽanga,’+ u ralo Yehova.”
Ṱhaluso dzi re magumoni a siaṱari
^ Kana “midzimu ya muṱani; midzimu ya zwifanyiso.”
^ Thevhedz., “zwibokoṱo.”
