Kha Vharoma 5:1-21
5 Samusi zwino ri tshi vho pfi ro luga nga nṱhani ha lutendo,+ kha ri vhe na mulalo* na Mudzimu nga Murena washu Yesu Kristo,+
2 nga nṱhani ha u vha na lutendo khae, ho vulea nḓila ya u wana vhuthu vhuhulu, vhune ra khou vhu wana zwino;+ kha ri takale* ngauri ri na fhulufhelo ḽa u wana vhugala ha Mudzimu.
3 Fhedzi kha ri takale musi ri maṱunguni,+ samusi ri tshi zwi ḓivha uri maṱungu a ita uri ri konḓelele;+
4 u konḓelela hu ita uri ri takalelwe nga Mudzimu,+ zwa ita uri ri vhe na fhulufhelo,+
5 fhulufhelo a ḽi ri shonisi;+ ngauri Mudzimu u shumisa muya wawe mukhethwa une a ri ṋea wone u itela u sumbedza uri u a ri funa.+
6 Musi ri sa athu u vha na nungo,+ Kristo o fela vhathu vha sa ofhi Mudzimu nga tshifhinga tsho vhewaho.
7 A si kanzhi muthu a tshi nga fela muthu o lugaho; khamusi a nga fela muthu wavhuḓi.
8 Fhedzi Mudzimu o ri sumbedza lufuno lwawe, ngauri musi ri tshi kha ḓi vha vhaitazwivhi, Kristo o ri fela.+
9 Samusi zwino ro itwa vho lugaho nga malofha awe,+ ri ḓo tshidzwa ngae kha mbiti dza Mudzimu.+
10 Arali ro pfumedzanywa na Mudzimu nga lufu lwa Murwa wawe+ zwiḽa ri tshee maswina awe, ri ḓo tshidzwa nga vhutshilo hawe samusi zwino ro no pfumedzanywa.
11 Zwiṅwe hafhu, ro takala ngauri ri na vhushaka na Mudzimu nga nṱhani ha Murena washu Yesu Kristo, we a ita uri ri kone u pfumedzana nae.+
12 Tshivhi tsho dzhena shangoni nga muthu muthihi, tshenetsho tshivhi tsha ḓisa lufu,+ lufu lwa ṱanganya vhathu vhoṱhe, ngauri vhoṱhe vho tshinya+—.
13 Ngauri tshivhi tsho vha hone shangoni hu sa athu u vha na Mulayo, fhedzi muthu a nga si vhonwe mulandu arali hu si na mulayo.+
14 Naho zwo ralo, lufu lwo vhusa sa khosi u bva misini ya Adamu u swika kha Mushe, naho vha songo ita tshivhi nga nḓila i fanaho na ya Adamu, we a vha a tshi fana na we a vha a tshi ḓo ḓa.+
15 Fhedzi tshivhi tsha Adamu a tshi fani na tshifhiwa tsha Mudzimu. Ngauri tshivhi tsha muthu muthihi tsho ita uri vhathu vhanzhi vha fe, vhuthu vhuhulu ha Mudzimu na tshifhiwa tshawe tshi bvaho kha vhuthu vhuhulu ha muthu muthihi+ Yesu Kristo, tsho vhuyedza vhathu zwihulu.+
16 Zwiṅwe hafhu, tshifhiwa tsha Mudzimu a tshi fani na zwe zwa bveledzwa nga muthu muthihi we a ita tshivhi.+ Ngauri tshivhi tshithihi tsho ita uri vhathu vhoṱhe vha vhe na mulandu,+ fhedzi tshifhiwa tshe tsha vha hone nga nṱhani ha tshenetsho tshivhi tsho ita uri vhathu vhanzhi vha vhidzwe vho lugaho.+
17 Tshivhi tsha muthu muthihi tsho ita uri lufu lu vhuse sa khosi.+ Fhedzi vhuthu vhuhulu ha Mudzimu na tshifhiwa tshe a ri ṋea tshone uri ri vhidzwe vho lugaho ndi zwihulu, ndi zwavhuḓi.+ Vhane vha zwi wana vha ḓo tshila nga nṱhani ha Yesu Kristo,+ vha vhusa sa mahosi.+
18 Samusi tshivhi tsha muthu muthihi tsho ita uri vhathu vhoṱhe vha vhe na mulandu,+ na u luga ha muthu muthihi ho ita uri vhathu vhoṱhe+ vha pfi vho luga uri vha wane vhutshilo.+
19 Samusi u sa thetshelesa ha muthu muthihi ho ita uri vhanzhi vha vhe vhaitazwivhi,+ na u thetshelesa ha muthu muthihi ho ita uri vhanzhi vha itwe vho lugaho.+
20 Mulayo wo vha hone uri vhathu vha ḓivhe uri vha na zwivhi zwinzhi.+ Fhedzi he ha ḓala tshivhi, na vhuthu vhuhulu vhu a ḓala.
21 Hu u itela uri vhuthu vhuhulu vhu vhuse sa khosi nga u luga hu isaho vhutshiloni vhu sa fheli nga Yesu Kristo Murena washu,+ samusi tshivhi na lufu zwo vhusa sa khosi.+
