SAMUSI ni tshi nga kha ḓi vha ni tshi zwi ḓivha, vhathu ṋamusi vha a vha vhalala, vha lwala vha fa. Na vhana vha a fa. Naa ni fanela u ofha lufu kana muthu we a fa?— Ni a zwi ḓivha uri hu itea mini musi ri tshi fa?—

Ṋamusi a huna muthu we a fa nahone a dovha a vuwa a ri vhudza uri hu itea mini musi muthu a tshi fa. Fhedzi muthu o raloho o vha e hone musi Yesu, Mufunzi Muhulu e kha ḽifhasi. Ri guda uri hu itea mini kha vhathu vhane vha fa musi ri tshi vhala nga hae. Onoyo muthu o vha e khonani ya Yesu nahone o vha a tshi dzula Bethania, muḓi muṱuku u re tsini na Yerusalema. O vha a tshi pfi Lazaro, nahone o vha e na khaladzi mbili, Martha na Maria. Kha ri vhale uri Bivhili i amba uri ho itea mini.

Ḽiṅwe ḓuvha Lazaro o lwala nga maanḓa. Yesu o vha e kule nga tshenetsho tshifhinga. Nga zwenezwo Martha na Maria vha ruma muthu uri a ye u vhudza Yesu uri khaladzi avho Lazaro u khou lwala. Hezwi vho zwi ita nga u ḓivha uri Yesu a nga ḓa nahone a fhodza khaladzi avho. Yesu a si dokotela, fhedzi Mudzimu o mu ṋea maanḓa a u fhodza malwadze oṱhe.—Mateo 15:30, 31.

Naho zwo ralo, Lazaro o vha a tshi khou lwala nga maanḓa lwe a fa Yesu a sa athu ya khae. Fhedzi Yesu a vhudza vhafunziwa vhawe uri Lazaro o eḓela, nahone u ḓo ya A mu vusa. Vhafunziwa a vho ngo pfesesa uri Yesu o vha a tshi khou amba mini. Ndi izwi-ha Yesu a tshi vha vhudza nga ho livhaho a ri: “Lazaro o fa.” Izwi zwi sumbedza mini nga ha lufu?— Zwi sumbedza uri lufu lu fana na khofhe khulwane. Ndi khofhe khulwane dzine dza ita uri muthu a sa vhuye a lora na luthihi.

Ndi izwi ha Yesu a tshi mbo ḓi dalela Martha na Maria. Na khonani nnzhi dza wonoyo muṱa dzo vha dzo no ḓi swika. Vho vha vho ḓa  u kwengweledza vhenevho vhasidzana vhavhili nge vha felwa nga khaladzi avho. Musi Martha a tshi pfa uri Yesu u khou ḓa, a mbo ḓi ya a mu ṱanganedza. Hu si kale na Maria a ya a vhona Yesu. O vha o ṱungufhala vhukuma a tshi khou lila, nahone a gwadama milenzheni yawe. Na dziṅwe khonani dze dza tevhela Maria dzo vha dzi khou lila-vho.

Mufunzi Muhulu a vhudzisa he vha vhea hone Lazaro. Ndi izwi-ha vhathu vha tshi ṱuwa na Yesu vha mu isa bakoni ḽe Lazaro a vhulungwa khaḽo. Musi Yesu a tshi vhona vhathu vhoṱhe vha tshi kho lila, na ene a thoma u lila-vho. U a zwi ḓivha uri zwi a vhavha vhukuma u felwa nga muthu ane wa mu funa.

Ho vha huna tombo muṋangoni wa bako, nga zwenezwo Yesu a ri: “Phigulusani iḽo tombo.” Naa vho vha vho fanela u ḽi phigulusa?— Martha o vhona zwi songo fanela. A ri: “Murena, u vhó nukha, ngauri ḽo no vha ḓuvha ḽa vhuṋa e tshaloni.”

Fhedzi Yesu a mu vhudza a ri: “Naa a tho ngo U vhudza naa nda ri: Arali U tshi tenda ndi hone U tshi ḓo vhona vhurena ha Mudzimu?” Yesu o vha a tshi khou amba uri Martha u ḓo vhona tshithu tshine tsha ḓo ita uri Mudzimu a rendiwe. Yesu o vha a tshi ḓo ita mini? Musi tombo ḽi tshi phiguluswa, Yesu a rabela Yehova nga ipfi ḽihulwane. Nga murahu ha zwenezwo, Yesu a huwelela nga ipfi ḽihulwane a ri: “Lazaro, bvela nnḓa!” O vha a tshi ḓo bvela nnḓa? O vha a tshi ḓo bva?—

Naa ni nga kona u vusa muthu o eḓelaho?— Ee, arali na vhidzelela nga ipfi ḽihulwane, u ḓo vuwa. Fhedzi naa ni nga kona u vusa muthu o faho?— Hai. Hu sa londwi uri ni huwelela hani, muthu o faho a nga si pfe. A huna tshithu tshine nṋe na inwi kana muṅwe muthu kha ḽifhasi a nga tshi ita u itela u vusa vhafu.

Fhedzi Yesu ha fani na vhaṅwe vhathu. Mudzimu o mu ṋea maanḓa o khetheaho. Nga u ralo musi Yesu a tshi vhidzelela Lazaro, ho itea zwithu zwi mangadzaho. Onoyo munna we a vha o no fhedza maḓuvha  maṋa o fa o bva bakoni! O vuswa vhafuni! O vha a tshi vho kona u fema na u tshimbila na u amba! Ee, Yesu o vusa Lazaro vhafuni.—Yohane 11:1-44.

Edzani u humbula nga haya mafhungo: Ho itea mini kha Lazaro musi o fa? Naa tshiṅwe tshipiḓa tshawe—muya-tshivhili kana muya—tsho bva muvhilini wawe nahone tsha ya huṅwe fhethu? Naa muya-tshivhili wa Lazaro wo ya ṱaḓulu? Naa o vha e na Mudzimu kathihi na vharuṅwa vhakhethwa ṱaḓulu maḓuvha maṋa?—

Hai! Humbulani uri Yesu o amba uri Lazaro o vha o eḓela. Hu itea mini musi no eḓela? Musi no farwa nga khofhe khulwane, a ni ḓivhi zwine zwa khou itea hune na vha hone a thi ri?— Nahone musi ni tshi vuwa, a ni ḓivhi uri no eḓela tshifhinga tshingafhani u swika ni tshi sedza watshi.

Zwo tou ralo na nga vhathu vho faho. A vha ḓivhi tshithu. A vha pfi tshithu. Nahone a vha koni u ita tshithu. Zwo vha zwo tou ralo nga  Lazaro musi o fa. Lufu lu fana na khofhe khulwane dzine muthu a sa kone u humbula tshithu. Bivhili i ri: “Vho faho a vha na tshine vha tshi ḓivha.”—Muhuweleli 9:5, 10.

Humbulani na nga mafhungo a tevhelaho: Arali Lazaro o fhedza eneo maḓuvha maṋa e ṱaḓulu, naa o vha a tshi ḓo vha a songo amba nga hazwo?— Nahone arali o vha e ṱaḓulu, naa Yesu o vha a tshi ḓo vha o mu kombetshedza uri a ṱutshele henefho fhethu havhuḓi nahone a vhuye kha ḽifhasi?— O vha a sa ḓo zwi ita zwenezwo!

Fhedzi vhathu vhanzhi vha amba uri ri na mimuya-tshivhili, nahone vha amba uri muya-tshivhili u bvela phanḓa u tshi tshila musi muvhili u tshi fa. Vha amba uri muya-tshivhili wa Lazaro wo vha u tshi khou tshila huṅwe fhethu. Fhedzi Bivhili a i ambi zwenezwo. I amba uri Adamu, muthu wa u thoma we Mudzimu a mu ita o vha e “muya-tshivhili u tshilaho.” Adamu o vha e muya-tshivhili. Bivhili i dovha ya amba uri musi Adamu a tshi ita tshivhi, o fa. O vha “muya-tshivhili wo faho,” nahone a vhuyelela buseni ḽe a itwa ngaḽo. Bivhili i dovha ya amba uri na vhana vha Adamu vho mamela tshivhi na lufu.—Genesi 2:7; 3:17-19 vhambedzani NW; Numeri 6:6, NW; Vha-Roma 5:12.

Zwi khagala uri a ri na muya-tshivhili une wa ḓifhambanya na muvhili  washu. Muṅwe na muṅwe washu ndi muya-tshivhili. Nahone samusi vhathu vho mamela tshivhi kha Adamu, muthu wa u thoma, Bivhili i ri: “Muya-tshivhili une wa tshinya u ḓo fa.”—Hesekiele 18:4, NW.

Vhaṅwe vhathu vha a ofha vhafu. A vha yi tsini na mavhiḓa ngauri vha humbula uri vhafu vha na mimuya-tshivhili ine ya bva mivhilini yavho ine ya nga vhaisa vha tshilaho. Fhedzi naa vhafu vha nga vhaisa vhane vha khou tshila?— Hai, vha nga si vha vhaise.

Vhaṅwe vhathu vha humbula uri vhafu vha nga vuwa vha vha mimuya vha dalela vha tshilaho. Nga zwenezwo vha vhea zwiḽiwa vha tshi itela vhafu. Fhedzi vhathu vhane vha ita zwenezwo a vha tendi zwine vhukuma Mudzimu a zwi amba nga vhafu. Arali ri tshi tenda zwine Mudzimu a zwi amba, ri nga si ofhe vhafu. Nahone arali ngangoho ri tshi livhuha Mudzimu nge a ri ṋea vhutshilo, ri ḓo zwi sumbedza nga u ita zwithu zwine Mudzimu a zwi ṱanganedza.

Fhedzi ni nga ḓivhudzisa uri: ‘Naa Mudzimu u ḓo vusa vhana vhe vha fa? Naa zwa vhukuma u a ṱoḓa u vha vusa?’ Kha ri haseledze nga ha zwenezwo kha ndima i tevhelaho.