NAA no no vhuya na pfa muṅwe muthu a tshi amba nga ha u fheliswa ha shango?— Ṋamusi vhathu vhanzhi vha amba nga hazwo. Vhaṅwe vhathu vha humbula uri shango ḽi ḓo fheliswa nga nndwa ine vhathu vha ḓo shumisa bomo dza nyuklia. Naa ni humbula uri Mudzimu u ḓo tendela vhathu vha tshi fhelisa ḽifhasi ḽashu ḽo nakaho na maṱaḓulu na ṋaledzi dzao dzi penyaho?—

Samusi ro zwi guda, Bivhili i ri vhudza nga ha vhufhelo ha shango. Bivhili i ri: “Shango ḽi a lovha.” (1 Yohane 2:17) Naa ni humbula uri u fhela ha shango zwi ḓo amba u fhela ha ḽifhasi?— Hai Bivhili i amba uri Mudzimu o ita ḽifhasi “uri ḽi dzulwe,” ee uri vhathu vha tshile khaḽo nahone vha ḓiphine khaḽo.  (Yesaya 45:18) Psalme ya 37:29 i ri: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.” Ndi ngazwo Bivhili i tshi dovha ya amba uri ḽifhasi ḽi ḓo vha hone nga hu sa fheli.—Psalme ya 104:5; Muhuweleli 1:4.

Ngauralo arali u fhela ha shango zwi sa ambi u fhela ha ḽifhasi, zwi amba mini?— Ri nga wana phindulo arali ra ṱolisisa nga vhuronwane zwe zwa itea misini ya Noaxe. Bivhili i a ṱalutshedza: “Maḓi a fhedza a dovha a mbwandamedza shango ḽa misi yeneyo, ḽa lovha.”—2 Petro 3:6, maḽeḓeretsendama ndi ashu.

Naa huna vhathu vhe vha ponyoka musi shango ḽi tshi fheliswa nga Muḓalo wa maḓi, kana Maḓi Mahulu tshifhingani tsha Noaxe?— Bivhili i amba uri Mudzimu “o vhulunga vhaṱanu-na-vhararu fhedzi nga Noaxe uri a vhe muhuweleli wa u luga, musi shango ḽa vhatshinyi ḽi tshi ḓiselwa maḓi mahulu.”—2 Petro 2:5.

Ngauralo ndi shango ḽifhio ḽo fhelaho? Naa ho vha hu ḽifhasi kana ho vha hu vhathu vhavhi?— Bivhili i amba uri ho vha hu “shango ḽa vhatshinyi.” Nahone ṱhogomelani uri Noaxe u vhidzwa “muhuweleli.” Ni humbula uri o vha a tshi khou huwelela nga ha mini?— Noaxe o vha a tshi khou sevha vhathu nga ha vhufhelo ha “shango ḽa misi yeneyo.”

Musi Yesu a tshi amba nga ha Maḓi Mahulu, o vhudza vhafunziwa vhawe nga ha zwe vhathu vha vha vha tshi khou zwi ita hu sa athu ḓa vhufhelo. O vha vhudza zwi tevhelaho: “Zwe vha ita misi iḽa maḓi mahulu á sathu u ḓa, ndi zwiné vha ḓo ita u swika hu tshi vhuya Murwa-muthu. [Vhathu] vho vha vha tshi ḽa, vha tshi nwa, vha tshi dzea, vha tshi dzewa, Noaxe a vhuya a dzhena gungwani; vha si sedze tshithu ha vhuya ha ḓa maḓi mahulu a vha fhedza.” (Maḽeḓeretsendama ndi ashu.) Nga zwenezwo Yesu a amba uri vhathu vha ḓo ita zwi fanaho na zwenezwo ḽino shango ḽi sa athu fhela.—Mateo 24:37-39.

Maipfi a Yesu a sumbedza uri ri nga guda zwiṅwe zwithu zwa ndeme kha zwe vhathu vha vha vha tshi khou ita hu sa athu swika Maḓi  Mahulu. Kha zwe na zwi vhala kha Ndima ya 10 ya ino bugu, naa ni kha ḓi humbula uri vhenevho vhathu vho vha vha tshi khou ita mini?— Vhaṅwe vhanna vho vha vha tshi shengedza vhaṅwe nahone vha tshi ita zwithu zwi si zwavhuḓi. Fhedzi Yesu o amba uri vhunzhi havho, a vho ngo thetshelesa musi Mudzimu a tshi ruma Noaxe uri a huwelele khavho.

Ndi izwi-ha hu tshi swika ḓuvha ḽe Yehova a vhudza Noaxe uri O vha a tshi khou ya u fhelisa vhathu vhavhi nga maḓi mahulu. Maḓi o vha a tshi ḓo tiba ḽifhasi ḽoṱhe, na dzithavha. Yehova o vhudza Noaxe uri a fhaṱe gungwa ḽihulwane. Ḽo vha ḽi tshi nga bogisi ḽihulwane, ḽilapfu, samusi ni tshi nga zwi vhona arali na sedza kha tshifanyiso tshi re kha siaṱari 238.

Mudzimu o vhudza Noaxe uri a fhaṱe gungwa ḽihulu lune ene na vha muṱa wawe na zwipuka zwinzhi vha ḓo kona u tsireledzea nga ngomu haḽo. Noaxe na vha muṱa wawe vho shuma nga maanḓa. Vho rema miri mihulwane nahone vha thoma u fhaṱa gungwa vha tshi shumisa matanda ayo. Hoyu mushumo wo fhedza miṅwaha minzhi ngauri gungwa ḽo vha ḽo hulesa.

Ni a humbula uri ndi mini zwiṅwe zwe Noaxe a zwi ita miṅwahani ya musi a tshi khou fhaṱa gungwa?— O vha a tshi khou huwelela, a tshi khou sevha vhathu nga u ḓa ha Maḓi Mahulu. Naa huna we a thetshelesa tsevho kha vhenevho vhathu? A huna we a thetshelesa nga nnḓa ha muṱa wa Noaxe. Vhaṅwe vhathu vho vha vho farakanea vha tshi khou ita zwiṅwe zwithu. Naa ni kha ḓi zwi humbula uri Yesu o amba uri vho vha vha tshi khou ita mini?— Vho vha vho farakanea vha tshi khou ḽa, vha tshi khou nwa nahone vha tshi khou vhinga na u vhingwa. Vho humbula uri vho vha vho luga nga maanḓa nahone vha si ḓiṋee tshifhinga tsha u thetshelesa Noaxe. Kha ri vhone zwe zwa itea khavho.

Musi Noaxe na muṱa wawe vho no dzhena gungwani, Yehova o vala muṋango wa gungwa. Vhathu vhe vha vha vhe nnḓa ha gungwa vho  vha vha sa fulufheli uri Maḓi Mahulu a ḓo swika. Fhedzi nga u ṱavhanya, ha thoma u na mvula khulwane i tshi bva makoleni! Ho vha hu si mvula ya misi. Ho vha hu mvula khulu vhukuma! Nga u ṱavhanya maḓi o vha a tshi vho nga milambo mihulu, i itaho phosho khulwane. Maḓi a kumba miri mihulwane nahone a phigulusa matombo mahulwane a vho tou nga matombo maṱuku. Ho itea mini nga vhathu vhe vha vha vhe nnḓa ha gungwa?— Yesu o ri: “Ha ḓa maḓi mahulu a vha fhedza.” Vhathu vhoṱhe vhe vha vha vhe nnḓa ha gungwa vha fa. Ndi ngani?— Samusi Yesu o amba, ‘a vho ngo sedza tshithu.’ A vho ngo thetshelesa!—Mateo 24:39; Genesi 6:5-7.

Humbulani uri Yesu o amba uri zwe zwa itea kha vhenevho vhathu zwi ri gudisa zwiṅwe zwithu ṋamusi. Ri nga guda mini khazwo?— Vhathu a vho ngo fheliswa nga ṅwambo wa uri vho vha vhe vhavhi fhedzi, fhedzi vho fheliswa nga ṅwambo wa uri vho vha vho farakanea lwe vha sa ḓiṋee tshifhinga tsha u guda nga ha Mudzimu na nga zwe a vha a tshi khou ya u zwi ita. Ri fanela u ṱhogomela uri si fane na vho a thi ri?—

Naa ni humbula uri Mudzimu u ḓo dovha a fhelisa shango nga maḓi mahulu?— Hai, Mudzimu o fulufhedzisa uri a nga si tsha fhelisa shango nga maḓi mahulu. O ri: “Ndi vhea musinga-vhadzimu wanga makoleni uri u vhe tshigá.” Yehova o amba uri musinga-vhadzimu u ḓo vha tshiga tsha uri “a hu tsha ḓo dovha ha ḓa maḓi mahulu a u vhulaha ṋama yoṱhe.”—Genesi 9:11-17.

Ngauralo ri nga vha na vhuṱanzi  ha uri Mudzimu a nga si dovhe a fhelisa shango nga maḓi mahulu. Naho zwo ralo, samusi ro no zwi vhona, Bivhili i a ri vhudza nga ha vhufhelo ha shango. Musi Mudzimu a tshi fhelisa ḽino shango, ndi vhafhio vhane a ḓo vha tshidza?— Naa u ḓo tshidza vhathu vhe vha vha vha tshi takalela zwiṅwe zwithu, lwe vha sa vhuye vha ṱoḓa u guda nga ha Mudzimu? Naa u ḓo tshidza vhe misi yoṱhe vha vha vho farakanea vhukuma vha tshi khou vhala Bivhili? Ni humbula mini?—

Ri ṱoḓa u vha vhukati ha vhane Mudzimu a ḓo vha tshidza a thi ri?— Naa zwo vha zwi si nga si vhe zwavhuḓi arali muṱa washu wa fana na wa Noaxe u itela uri Mudzimu a ri tshidze roṱhe?— Uri ri kone u ponyoka vhufhelo ha shango, ri tea u ḓivha nḓila ine Mudzimu a ḓo ḽi fhelisa ngayo na nḓila ine a ḓo ḓisa ngayo shango ḽawe ḽiswa ḽo lugaho. Kha ri vhone uri u ḓo zwi ita hani zwenezwo.

Bivhili i ri ṋea phindulo kha Daniele ndima ya 2 ndimana 44. Holwu luṅwalo lu khou amba nga ha ḓuvha ḽashu musi lu tshi ri: “Misi ya eneo mahosi, ndi hone Mudzimu wa ṱaḓulu a tshi ḓo vusa muvhuso une wa sa ḓo tshinyala lini na lini, une vhuhosi hawo ha sa ḓo wetshela kha luṅwe lushaka. Wonoyo u ḓo pwashakanya mivhuso yoṱhe wa i lozwa; wone uṋe wa ima lini na lini.”

Naa ni a zwi pfesesa zwenezwo?— Bivhili i amba uri muvhuso wa Mudzimu u ḓo fhelisa hulumeni dzoṱhe dza vhathu fhano kha ḽifhasi. Ndi ngani?— Ndi ngauri a dzi thetshelesi muthu We Mudzimu a mu ita Khosi. Onoyo muthu ndi nnyi?— Ndi Yesu Kristo!

Yehova Mudzimu u na ndugelo ya u phetha uri ndi muvhuso-ḓe une wa fanela u vhusa, nahone o khetha Murwa wawe, Yesu, uri a vhe Khosi. Hu si kale Muvhusi wa Mudzimu Yesu Kristo, u ḓo ranga phanḓa kha u fhelisa mivhuso yoṱhe ya ḽino shango. Kha Ndzumbululo ndima ya 19, dzindimana 11 u ya kha 16, Bivhili i mu ṱalusa a tshi khou ita zwenezwo, samusi zwo sumbedzwa kha hetshi tshifanyiso. Bivhilini, nndwa ya Mudzimu ya u fhelisa mivhuso yoṱhe ya shango i vhidzwa Haramagedo.

 Mudzimu u amba uri Muvhuso wawe u ḓo fhelisa mivhuso ya vhathu. Fhedzi naa u ri humbela uri ri i fhelise?— Hai, Bivhilini, Haramagedo i vhidzwa “nndwani ya ḽone ḓuvha ḽihulu ḽa Mudzimu, Mu-vhusa-hoṱhe.” (Ndzumbululo 16:14, 16) Ee, Haramagedo ndi nndwa ya Mudzimu, nahone u shumisa Yesu Kristo u ranga phanḓa mmbi ya ṱaḓulu nndwani. Naa nndwa ya Haramagedo i tsini? Kha ri vhone uri ri nga zwi ḓivha hani.