NAA ni a funa u ya zwimimani?— Zwimima zwi a takadza vhukuma. Naa ni humbula uri Mufunzi Muhulu a nga ṱoḓa ri tshi ya zwimimani?— O ya tshimimani musi muṅwe muthu a tshi vhinga, nahone a ṱuwa na vhaṅwe vha vhafunziwa vhawe. Yehova ndi “Mudzimu o takalaho,” nga zwenezwo u a takala musi ri tshi ḓiphina zwimimani zwavhuḓi.—1 Timotheo 1:11, NW; Yohane 2:1-11.

Siaṱari 29 ḽa ino bugu ḽi ri vhudza uri Yehova o fhandekanya Lwanzhe Lutswuku u itela uri Vhaisiraele vha pfuke. Ni a a humbula eneo mafhungo?— Nga murahu ha zwenezwo, vhathu vho imba vha tshina nahone vha livhuha Yehova. Zwo vha zwi tshi nga tshimima. Vhathu vho vha vho takala vhukuma, nahone ri nga vha na vhungoho ha uri na Mudzimu o vha o takala.—Ekisodo 15:1, 20, 21.

Nga murahu ha miṅwaha i ṱoḓaho u vha 40, Vhaisiraele vho ya kha tshiṅwe tshimima tshihulwane. Vhathu vhe vha vha vho vha ramba kha tshenetsho tshimima vho vha vha sa gwadameli Yehova. Zwi re zwone ndi uri vhathu vhe vha vha vho vha ramba vho vha vha tshi gwadamela miṅwe midzimu nahone vho vha vha tshi ita zwa vhudzekani na vhathu vhe vha sa vhingane navho. Naa ni humbula uri zwo vha zwi zwavhuḓi u ya tshimimani tsho raloho?—  Zwenezwo a zwo ngo takadza Yehova nahone o ṱarafa Vhaisiraele.—Numeri 25:1-9; 1 Vha-Korinta 10:8.

Bivhili i dovha ya ri vhudza nga ha zwimima zwivhili zwa ḓuvha ḽa mabebo. Naa tshiṅwe tsha zwenezwo zwimima tsho vha tshi tsha u pembelela ḓuvha ḽa u bebwa ha Mufunzi Muhulu?— Hai. Zwenezwi zwimima zwivhili zwa ḓuvha ḽa mabebo zwo vha zwi zwa vhanna vhe vha sa shumele Yehova. Tshiṅwe tsho vha tshi tshimima tsha ḓuvha ḽa u bebwa ha Khosi Herode Antipas. O vha e muvhusi wa tshiṱiriki tsha Galilea musi Yesu a tshi kha ḓi dzula henefho.

Khosi Herode o ita zwithu zwinzhi zwivhi. O dzhia musadzi wa murathu wawe uri a vhe musadzi wawe. Dzina ḽawe o vha a tshi pfi Herodia. Yohane Mulovhedzi we a vha e mushumeli wa Mudzimu o vhudza Herode uri zwo vha zwo khakhea u ita zwenezwo. Herode ho ngo takalela zwenezwo. Ndi izwi-ha a tshi mbo ḓi ita uri Yohane a valelwe khothoni.—Luka 3:19, 20.

Musi Yohane e khothoni, ha swika ḓuvha ḽa u pembelela u bebwa ha Herode. Herode a ita tshimima tshihulu. A ramba vhathu vhanzhi vha vhuimo ha nṱha. Vhathu vhoṱhe vha ḽa vha nwa nahone vha ḓiphina. Ndi izwi-ha hu tshi swika ṅwananyana wa Herodia nahone a tshina phanḓa  havho. Muṅwe na muṅwe o takalela u tshina hawe lwe Khosi Herode a ṱoḓa u mu ṋea tshifhiwa tsho khetheaho. A mu vhudza a ri: “Tshiné wa ḓo nkhumbela ndi ḓo U ṋea, namusi hu u U fhandulela shango ḽanga nga vhukati.”

O vha a tshi ḓo humbela mini? Tshelede? zwiambaro zwo nakaho? nnḓu ya vhuhosi? Onoyo musidzana o vha a sa ḓivhi tshine a nga tshi humbela. Ndi izwi a tshi ya kha mme awe Herodia, nahone a ri: “Ndi humbele mini?”

Ni humbule uri Herodia o vha a tshi vhenga nga maanḓa Yohane Mulovhedzi. A mbo ḓi vhudza ṅwananyana wawe uri a humbele ṱhoho yawe. Onoyo musidzana a ya kha khosi a ri: “Ndi funa U tshi mpha ṱhóho ya Yohane Mulóvhedzi nga ndilo zwino rí henefha.”

Khosi Herode o vha a sa funi u vhulaha Yohane ngauri o vha a tshi zwi ḓivha uri Yohane ndi munna o lugaho. Fhedzi Herode o vha o no fulufhedzisa, nahone o vha a tshi ofha uri vhaṅwe vhathu vha re tshimimani vha ḓo humbula mini arali a shandula zwe a zwi amba. Ndi izwi-ha a tshi ruma muṅwe munna uri a ye khothoni a ye u tumula ṱhoho ya Yohane. Onoyo munna a vhuya nga u ṱavhanya. A vhuya na ṱhoho ya Yohane i kha ndilo, nahone a i ṋea onoyo musidzana. Onoyo musidzana a i ṋea mme awe.—Marko 6:17-29.

 Tshiṅwe tshimima tshine Bivhili ya amba nga hatsho tsho vha tshi tshi fana na tshenetshi. Tsho vha tshi tsha khosi ya Egipita. Musi tshenetshi tshimima tshi vhukati, yeneyo khosi yo laedza uri hu tumulwe ṱhoho ya muṅwe muthu. Nga murahu ha zwenezwo, ya fhahea tshitumbu tsha onoyo muthu uri tshi ḽiwe nga zwiṋoni! (Genesi 40:19-22) Naa ni humbula uri Mudzimu o takalela zwenezwo zwimima zwivhili?— Naa no vha ni tshi ḓo vha no ṱoḓa u vha khazwo?—

Ri a zwi ḓivha uri zwoṱhe zwo ṅwalwaho Bivhilini zwi na ndivho. I ri vhudza nga ha zwimima zwivhili fhedzi zwa ḓuvha ḽa mabebo. Nahone kha zwenezwo zwimima zwivhili, ho itwa zwithu zwivhi. Nga zwenezwo-ha, ni humbula uri Mudzimu u khou ri vhudza mini nga ha zwimima zwa ḓuvha ḽa mabebo? Naa Mudzimu u ṱoḓa ri tshi pembelela maḓuvha a mabebo?—

Ndi ngoho uri kha zwimima zwo raloho ṋamusi, vhathu a vha tumuli ṱhoho ya muṅwe muthu. Fhedzi mafhungo a u pembelelwa ha maḓuvha a mabebo o thoma na vhathu vha sa gwadameli Mudzimu wa ngoho. The Catholic Encyclopedia i amba zwi tevhelaho nga vhuṱambo ha maḓuvha a mabebo ho bulwaho Bivhilini: “Ndi vhaitazwivhi fhedzi . . . vhane vha ita zwimima zwihulu zwa u pembelela ḓuvha ḽe vha bebwa ngaḽo.” Naa ri a ṱoḓa u fana navho?—

Mufunzi Muhulu o ita mini? Naa o pembelela ḓuvha ḽe a bebwa ngaḽo?— Hai, Bivhili a i ambi tshithu malugana na u pembelela ḓuvha ḽa u bebwa ha Yesu. Zwi re zwone ndi uri vhatevheli vha Yesu vha u thoma a vho ngo pembelela ḓuvha ḽa u bebwa hawe. Naa ni a zwi ḓivha uri ndi ngani vhathu nga u ya ha tshifhinga vho pembelela ḓuvha ḽa u bebwa ha Yesu nga ḽa 25 December?—

The World Book Encyclopedia i amba uri ḽeneḽo ḓuvha ḽo khethiwa nga ṅwambo wa uri “vhathu vha Roma vho vha vha tshi vho ḽi pembelela sa Vhuṱambo ha Saturn, ḽine ḽa vha ḓuvha ḽa u pembelela u bebiwa ha ḓuvha.” Nga zwenezwo vhathu vho khetha u pembelela ḓuvha ḽa u bebwa ha Yesu nga ḓuvha ḽe ḽa vha ḽo no ḓi vha holodei ya vhahedeni!

Ni a ḓivha uri ndi ngani zwi si ngoho uri Yesu o bebwa nga December?— Ndi nga ṅwambo wa uri Bivhili i amba uri musi Yesu a tshi bebwa, vhalisa  vho vha vha tshee masimuni vhusiku. (Luka 2:8-12) Nahone vho vha vha sa ḓo vha vhe masimuni phephoni, nga ṅwedzi wa December une ha na mvula.

Vhathu vhanzhi vha a zwi ḓivha uri Yesu ho ngo bebwa nga Khirisimusi. Vha a zwi ḓivha uri nga ḽeneḽo ḓuvha vhahedeni vho vha vha tshi ita vhuṱambo vhu sa takadzi Mudzimu. Fhedzi vhanzhi vha bvela phanḓa vha tshi pembelela Khirisimusi hu sa londwi zwenezwo. Vha funa nga maanḓa tshimima, a vha londi uri Mudzimu u ri mini nga hatsho. Fhedzi ri ṱoḓa u takadza Yehova a thi ri?—

Nga zwenezwo, musi ri tshi ita zwimima, ri fanela u ita vhungoho ha uri Yehova u ḓo zwi takalela. Ri nga zwi ita nga ḓuvha naho ḽi ḽifhio ḽa ṅwaha. A zwi vhuyi zwa ṱoḓa uri ri lindele ḓuvha ḽo khetheaho. Ri nga ḽa zwiḽiwa zwine ra zwi funesa na u tamba mitambo i takadzaho. Naa ni ḓo zwi takalela zwenezwo?— Khamusi ni nga amba na vhabebi vhaṋu na vha humbela uri vha ni thuse u dzudzanya tshimima. Zwenezwo zwi ḓo takadza a thi ri?— Fhedzi ni sa athu ita ndugiselelo dza tshimima, thomani nga u ita vhungoho ha uri zwine na ḓo zwi ita zwi ḓo ṱanganedzwa nga Mudzimu.