MIṄWAHANI i fhiraho zwigidi zwivhili yo fhelaho, ho bebwa ṅwana o khetheaho we musi a tshi aluwa a vha muthu wa bvumo u fhira vhoṱhe vhe vha vhuya vha tshila. Nga tshenetsho tshifhinga, ho vha hu si na muthu we a vha e na mabufho kana dzigoloi. Ho vha hu si na zwithu zwine zwa nga dzithelevishini, dzikhomphyutha, na Internet.

Onoyo ṅwana o irwa dzina ḽine ḽa pfi Yesu. O vha o ṱalifha u fhira vhathu vhoṱhe vhe vha vhuya vha tshila kha ḽifhasi. Yesu o dovha a vha mufunzi ane a funza zwavhuḓi vhukuma. O vha a tshi ṱalutshedza zwithu zwi konḓaho nga nḓila i leluwaho uri muthu a pfesese.

Yesu o vha a tshi funza vhathu huṅwe na huṅwe hune a ṱangana navho. O vha a tshi vha funza khunzikhunzini dza lwanzhe na kha magungwa. O vha a tshi vha funza mahayani na musi o fara lwendo. Yesu o vha e si na goloi, nahone o vha a sa fari lwendo nga bisi kana tshidimela. Yesu o vha a tshi tou tshimbila nga milenzhe musi a tshi khou funza vhathu.

Ri guda zwithu zwinzhi kha vhaṅwe vhathu. Fhedzi ri nga guda zwithu zwa ndeme vhukuma kha Yesu, Mufunzi Muhulu. Maipfi a Yesu a wanala Bivhilini. Musi ri tshi vhala eneo maipfi Bivhilini, zwi fana na musi Yesu a tshi khou amba na riṋe.

Ndi ngani Yesu o vha e Mufunzi Muhulu nga u rali? Tshiṅwe tshiitisi ndi uri Yesu nga dzawe o vha o funziwa. Nahone o vha a tshi zwi ḓivha uri u thetshelesa ndi zwa ndeme vhukuma. Fhedzi Yesu o vha a tshi thetshelesa nnyi? O funzwa nga nnyi?— O funzwa nga Khotsi awe. Khotsi a Yesu ndi Mudzimu.

Musi Yesu a sa athu ḓa kha ḽifhasi a tshila sa muthu wa ṋama, o vha  e ṱaḓulu na Mudzimu. Yesu o vha a sa fani na vhaṅwe vhathu ngauri a hu na muthu wa ṋama we a thoma a tshila ṱaḓulu a sa athu bebwa kha ḽifhasi. Musi e ṱaḓulu Yesu o vha e Ṅwana-ṅwana, o vha a tshi thetshelesa Khotsi awe. Nga zwenezwo, Yesu o kona u funza vhathu zwe a zwi guda kha Mudzimu. Na inwi ni nga edzisa Yesu nga u thetshelesa khotsi aṋu na mme aṋu.

Tshiṅwe tshiitisi tsho itaho uri Yesu a vhe Mufunzi Muhulu ndi uri o vha a tshi funa vhathu. O vha a tshi ṱoḓa u thusa vhathu uri vha gude nga ha Mudzimu. Yesu o vha a sa funi vhathu vhahulwane fhedzi, fhedzi o vha a tshi funa na vhana. Nahone vhana vho vha vha tshi funa u dzula vhe na Yesu ngauri o vha a tshi amba navho nahone a tshi vha thetshelesa.

Ḽiṅwe ḓuvha vhaṅwe vhabebi vha ḓisa vhana vhavho vhaṱuku kha Yesu. Fhedzi khonani dzawe dza humbula uri Mufunzi Muhulu o vha o farakanea vhukuma lwe a vha a sa ḓo kona u amba na vhana vhaṱuku. Nga zwenezwo dza vha humisa. Fhedzi Yesu o ri mini?— Yesu o ri: “Litshani vhana vha ḓe ha nṋe; ni songo vha dzivhisa.” Ee, Yesu o  vha a tshi ṱoḓa uri vhana vhaṱuku vha ḓe khae. Naho Yesu o vha o ṱalifha vhukuma nahone e muthu wa ndeme, o ḓiṋea tshifhinga tsha u funza vhana vhaṱuku.—Marko 10:13, 14.

Ni a zwi ḓivha uri ndi ngani Yesu o funza vhana nahone a vha thetshelesa? Tshiṅwe tshiitisi ndi uri o vha a tshi ṱoḓa u vha takadza nga u vha funza nga ha Mudzimu, ane a vha Khotsi awe wa ṱaḓulu. Ni nga takadza hani vhathu?— Nga u vha vhudza zwithu zwe na zwi guda nga ha Mudzimu.

Ḽiṅwe ḓuvha, Yesu o shumisa ṅwana muṱuku u itela u funza khonani Dzawe ngudo ya ndeme. O dzhia ṅwana a mu imisa vhukati ha vhafunziwa Vhawe, vhe vha vha vhe vhatevheli Vhawe. Nga zwenezwo, Yesu a amba uri vhenevho vhathu vhahulwane vha fanela u shandula nḓila dzavho uri vha fane na onoyu ṅwana muṱuku.

Yesu o vha a tshi khou amba mini musi a tshi ralo? Ni a zwi ḓivha uri muthu muhulwane, kana ṅwana muhulwanenyana, a nga fani hani na ṅwana muṱuku?— Hafhu ṅwana muṱuku ha ḓivhi zwithu zwinzhi u fana na muthu muhulwane nahone u a ṱoḓa u guda. Yesu o vha a tshi khou amba uri vhafunziwa vhawe vha fanela u ḓiṱukufhadza, u fana na vhana vhaṱuku. Ee, roṱhe ri nga guda zwithu zwinzhi kha vhaṅwe vhathu. Nahone roṱhe ri fanela u ṱhogomela uri pfunzo dza Yesu ndi dza ndeme vhukuma u fhira zwine ra zwi humbula.—Mateo 18:1-5.

Tshiṅwe tsho itaho uri Yesu a vhe Mufunzi Muhulu ndi uri o vha a tshi ḓivha u ita uri zwithu zwi takadze vhathu. O vha a tshi ṱalutshedza zwithu nga nḓila i leluwaho na i pfalaho. O amba nga ha zwiṋoni na maluvha na zwiṅwe zwithu zwo  ḓowelaho u itela u thusa vhathu uri vha pfesese mafhungo nga ha Mudzimu.

Ḽiṅwe ḓuvha musi Yesu e thavhani, vhathu vhanzhi vho ḓa khae. Yesu o dzula fhasi a vha ṋea nyambo, kana pfunzo, samusi zwo sumbedzwa hafha. Yeneyi nyambo yo vha i tshi vhidzwa Pfunzo ya Thavhani. O ri: ‘Lavhelesani zwiṋoni zwa ṱaḓulu. A zwi ṱavhi mbeu. A zwi kuvhanganyi zwiḽiwa maḓuluni. Fhedzi Mudzimu wa ṱaḓulu u a zwi ṋea zwiḽiwa. Inwi a ni zwi fhiri kule kani?’

Yesu o dovha a ri: ‘Gudani nga mavolenga a masimuni. A a mela naho a sa shumi. Edzani u vhona nḓila ye a naka ngayo! Na Khosi Salomo o pfumaho o vha a sa ambari a naka u fana na mavolenga a tsimuni. Nga zwenezwo, arali Mudzimu a tshi ṱhogomela maluvha ane a mela, naa na inwi a nga si ni ṱhogomele?’—Mateo 6:25-33.

Naa ni a i pfesesa pfunzo ye Yesu a vha a tshi khou i funza?— O vha a sa ṱoḓi uri ri vhilaele nga ha uri ri ḓo wana ngafhi zwiḽiwa kana  zwiambaro. Mudzimu u a zwi ḓivha uri zwenezwo zwithu zwoṱhe ri a zwi ṱoḓa. Yesu o vha a sa khou amba uri ri songo shuma uri ri kone u renga zwiḽiwa na zwiambaro. Fhedzi o vha a tshi khou amba uri ri fanela vhea Mudzimu phanḓa. Arali ra ita zwenezwo, Mudzimu u ḓo ita vhungoho ha uri ri wane zwiḽiwa na zwiambaro. Zwenezwo ni a zwi tenda?—

Musi Yesu a tshi fhedza u amba, vhathu vho aravha hani?— Bivhili i amba uri vho mangadzwa nga nḓila ye a funza ngayo. Zwo vha zwi tshi takadza u mu thetshelesa. Zwe a zwi amba zwo thusa vhathu uri vha ite zwo lugaho.—Mateo 7:28.

 Nga zwenezwo ndi zwa ndeme vhukuma uri ri gude kha Yesu. Ni a zwi ḓivha uri ri nga zwi itisa hani zwenezwo?— Zwithu zwe a zwi amba zwo ṅwalwa buguni. Yeneyo bugu ni a i ḓivha?— Ndi Bivhili Khethwa. Hezwi zwi amba uri ri nga thetshelesa Yesu nga u ita zwithu zwe ra zwi vhala Bivhilini. Zwi re zwone ndi uri Bivhili i na mafhungo manzhi a takadzaho a nḓila ye Mudzimu a ri vhudza ngayo uri ri thetshelese Yesu. Kha ri pfe uri ho itea mini.

Ḽiṅwe ḓuvha Yesu o ṱuwa na khonani dzawe tharu vha ya thavhani ndapfu. Madzina avho ndi Yakobo, Yohane na Petro. Ri ḓo guda zwithu zwinzhi nga ha vhenevha vhanna nga murahu, samusi vhuraru havho vho vha vhe khonani khulwane dza Yesu. Fhedzi nga tshenetshi tshifhinga tsho khetheaho, tshifhaṱuwo tsha Yesu tsha penya vhukuma. Nahone zwiambaro zwawe zwa tshena sa tshedza, samusi zwo sumbedzwa hafha.

Nga murahu ha zwenezwo, Yesu na khonani dzawe vha pfa ipfi ḽi bvaho ṱaḓulu. Ḽo ri: “Hoyu ndi Murwa wanga, ané nda mu funa, ané nda mu takalela; ni mu thetshelese!” (Mateo 17:1-5) Ni a ḓivha uri ḽeneḽo ipfi ḽo vha ḽi ḽa nnyi?— Ḽo vha ḽi ḽa Mudzimu! Ndi Mudzimu we a amba uri vha thetshelese Murwa wawe.

Hu pfi mini nga riṋe ṋamusi? Naa ri ḓo thetshelesa Mudzimu na Murwa wawe, ane a vha Mufunzi Muhulu?— Roṱhe ri fanela u ita zwenezwo. Ni kha ḓi zwi humbula uri ri nga zwi itisa hani zwenezwo?—

Ee, ri nga thetshelesa Murwa wa Mudzimu nga u vhala mafhungo a Bivhili ane a amba nga vhutshilo hawe. Hu na zwithu zwinzhi zwi mangadzaho zwine Mufunzi Muhulu a nga ri vhudza zwone. Ni ḓo ḓiphina nga u guda nga ha zwenezwi zwithu, zwo ṅwalwaho Bivhilini. Nahone zwi ḓo ni takadza arali na vhudza khonani dzaṋu nga ha zwithu zwavhuḓi zwine na khou zwi guda.