NDI ufhio mushumeli wavhuḓi vhukuma wa Mudzimu u fhira vhoṱhe vhe vha vhuya vha tshila?— No fhindula zwone, ndi Yesu Kristo. Ni humbula uri ri nga kona u fana nae?— Hafhu Bivhili i amba uri o ri vhetshela tsumbo uri ri i tevhele. Nahone u ri ramba uri ri vhe vhafunziwa vhawe.

Ni a ḓivha uri zwi amba mini u vha mufunziwa wa Yesu?— Zwi amba zwithu zwinzhi. Tsha u thoma, ri fanela u guda khae. Fhedzi a zwi fheleli henefho. Hafhu ri fanela u tenda zwine a zwi amba. Arali ra tenda, ri ḓo ita zwine a ri vhudza zwone.

Vhathu vhanzhi vha amba uri vha tenda kha Yesu. Ni humbula uri vhoṱhe ndi vhafunziwa vhawe zwa vhukuma?— Hai, vhunzhi havho a si vhone. Vha nga kha ḓi ya kerekeni. Vhunzhi havho a vha athu vhuya vha ḓiṋea tshifhinga tsha u guda zwe Yesu a zwi funza. Ngoho ndi ya uri vhane vha tevhela tsumbo ya Yesu ndi vhone vhane vha vha vhafunziwa vhawe.

Kha ri ambe nga vhaṅwe vhe vha vha vhe vhafunziwa vha Yesu musi a tshi kha ḓi vha muthu wa ṋama kha ḽifhasi. Muṅwe wa u thoma u vha mufunziwa ndi Filipo. Filipo o ya kha khonani yawe Nathanaele (ane a dovha a pfi Baratholomeo), ane na mu vhona o dzula hafha fhasi ha muri. Musi Nathanaele a tshi ya kha Yesu, Yesu u ri: ‘Vhonani, munna a fulufhedzeaho, murwa wa ngoho wa Isiraele.’ Zwenezwo zwa mangadza Nathanaele nahone a vhudzisa a ri: ‘U nḓivhela’fhi?’

 Yesu u ri: “Musi Filipo á sathu u U vhidza, ndo U vhona Ú tsini ha muhuyu.” Zwe zwa mangadza vhukuma Nathanaele ndi uri Yesu o vha a tshi ḓivha zwavhuḓi uri o vha e ngafhi, nga zwenezwo Nathanaele a ri: “Ndi iwe Murwa wa Mudzimu, ndi iwe khosi ya Isiraele.”—Yohane 1:49.

Musi Filipo na Nathanaele vha tshi vha vhafunziwa vha Yesu, vhaṅwe vho vha vho no vha vhafunziwa nga tsha mulovha tsha hone. Vhenevho ndi Andrea na Petro mukomana wawe kathihi na Yohane khamusi na Yakobo mukomana wa Yohane. (Yohane 1:35-51) Naho zwo ralo, nga murahu ha tshifhinganyana vhenevha vhaṋa vha vhuyelela mushumoni wavho wa u rea khovhe. Ḽiṅwe ḓuvha musi Yesu a tshi khou tshimbila tsini na Lwanzhe lwa Galilea, a vhona Petro na Andrea vha tshi khou posa mammbule a u rea khovhe lwanzheni. Yesu a vha vhidza a ri: “Ntevheleni.”

Musi Yesu o no tshimbila tshikhalanyana, a vhona Yakobo na  Yohane. Vho vha vhe gungwani na khotsi avho, vha tshi khou runga mammbule avho. Yesu a vha vhidza uri vha mu tevhele-vho. No vha ni tshi ḓo vha no ita mini arali Yesu a ni vhidze? Naa no vha ni tshi ḓo mbo ḓi litsha zwine na khou zwi ita na mu tevhela?— Havha vhanna vho vha vha tshi ḓivha Yesu. Vho vha vha tshi zwi ḓivha uri o vha o rumiwa nga Mudzimu. Vho mbo ḓi litsha mushumo wavho wa u rea khovhe nahone vha tevhela Yesu.—Mateo 4:18-22.

Musi vhenevha vhanna vho no vha vhatevheli vha Yesu, naa zwi amba uri vho ita zwithu zwo lugaho misi yoṱhe?— Hai. Ni nga kha ḓi vha ni tshi zwi humbula uri vhenevha vhanna vho ita na u vhangisana uri muhulwane ndi nnyi vhukati havho. Fhedzi vho thetshelesa Yesu, nahone vha shandula mavhonele avho. Arali na riṋe ra ḓiimisela u shanduka, ri nga vha vhafunziwa vha Yesu.

Yesu o ramba vhathu vhoṱhe uri vha vhe vhafunziwa vhawe. Ho vhuya ha ḓa muṅwe muvhusi muswa o pfumaho kha Yesu nahone a vhudzisa uri u fanela u ita mini uri a wane vhutshilo vhu sa fheli. Musi onoyo muvhusi o pfumaho a tshi amba uri o tevhela ndaela dza Mudzimu u bva vhuṱukuni, Yesu a mu vhudza a ri: ‘Iḓa u vhe mutevheli wanga.’ Ni a ḓivha uri ho itea mini?—

Musi onoyo munna a tshi vhona uri u vha mufunziwa wa Yesu zwi fanela u vha zwa ndeme u fhira lupfumo, a zwo ngo mu takadza na luthihi. Ho ngo vha mufunziwa wa Yesu nga ṅwambo wa uri o vha a tshi funa tshelede u fhira u funa Mudzimu.—Luka 18:18-25.

Musi Yesu o no fhedza tshifhinga tshi ṱoḓaho u vha ṅwaha na hafu, o khetha vhathu vha 12 vhukati ha vhafunziwa vhawe uri vha vhe vhaapostola. Vhaapostola vho vha vhe vhanna vhe vha rumiwa uri vha ite mushumo wo khetheaho. Ni a ḓivha madzina avho?— Kha ri lingedze u a guda. Sedzani zwifanyiso zwavho hafha, nahone ni vha vhidze nga madzina. Nga murahu ni lingedze u bula madzina avho nga ṱhoho.

Nga u ya ha tshifhinga, muṅwe wa vhaapostola vha 12 o mbo ḓi vha muthu muvhi. O vha a tshi pfi Yudasi Iskariote. Nga murahu, ho khethiwa  muṅwe mufunziwa a vha muapostola. Dzina ḽawe ni a ḽi ḓivha?— Ndi Mathia. Nga murahu Paulo na Baranaba vha vha vhaapostola, fhedzi vho vha vha sa weli kha tshigwada tsha vha 12.—Mishumo 1:23-26; 14:14.

Samusi ro zwi guda kha Ndima ya 1 ya yeneyi bugu, Yesu o vha a tshi funa vhana. Ndi ngani?— Ngauri o vha a tshi zwi ḓivha uri na vhone vha nga vha vhafunziwa vhawe. Hafhu kanzhi vhana vha nga amba zwithu zwine zwa nga ita uri na vhathu vhahulwane vha thetshelese nahone vha ṱoḓe u guda zwo engedzeaho nga ha Mufunzi Muhulu.

Hu na vhafumakadzi vhanzhi vhe na vhone vha vha vhafunziwa vha Yesu. Vhaṅwe vho tshimbila nae musi a tshi ya u huwelela kha  miṅwe miḓi. Vhaṅwe vhe vha tshimbila nae ndi Maria Magdalena, Yohana, Susana. Khamusi vho thusa u mu bikela zwiḽiwa na u mu kuvhela zwiambaro.—Luka 8:1-3.

Ni a ṱoḓa u vha mufunziwa wa Yesu?— Humbulani uri arali ra amba uri ri muṅwe wa vhafunziwa a zwi ambi uri ri mufunziwa. Ri fanela u ḓifara sa muṅwe wa vhafunziwa vhawe huṅwe na huṅwe hune ra vha hone, hu si musi ri tshi ya miṱanganoni ya Vhukriste fhedzi. Ni humbula uri ndi ngafhi hune zwa vha zwa ndeme uri ri ḓifare sa vhafunziwa vha Yesu?—

Ee, ri fanela u ita nga u ralo musi ri hayani. Fhedzi huṅwe fhethu ndi tshikoloni. Zwine nṋe na inwi ra sa fanele u vhuya ra zwi hangwa ndi uri u itela uri ri vhe vhafunziwa vha ngoho vha Yesu, ri fanela u mu edzisa ḓuvha ḽoṱhe, ḓuvha ḽiṅwe na ḽiṅwe, huṅwe na huṅwe hune ra vha hone.