ROṰHE ri ṱoḓa u takala a thi ri?— Fhedzi vhathu vhanzhi a vho ngo takala. Ni a ḓivha uri ndi ngani?— Ndi nga ṅwambo wa uri a vha ḓivhi tshiphiri tsha dakalo. Vha humbula uri arali vha wana zwithu zwinzhi vha ḓo takala. Fhedzi musi vha tshi wana zwenezwi zwithu, dakalo ḽavho a ḽi fhedzi tshifhinga tshilapfu.

Khetshi tshiphiri tsha dakalo. Mufunzi Muhulu o ri: “U ṋea hu ḓisa dakalo ḽihulwane u fhira u ṋewa.” (Mishumo 20:35, NW) Nga zwenezwo, ndi mini zwine zwa nga ita uri ni takale?— Ndi u ṋea vhathu zwithu na u vha itela zwithu. Naa no vha ni tshi zwi ḓivha zwenezwo?—

Kha ri dovhe ri humbulusise nga haya mafhungo. Naa Yesu o vha a tshi khou amba uri muthu ane a ṋewa tshifhiwa ha nga takali?— Hai, ho ngo ralo. Ni a funa u ṋewa zwifhiwa a thi ri?— Muthu muṅwe na muṅwe u a zwi funa. Ri a takala musi ri tshi ṋewa zwithu zwavhuḓi.

 Fhedzi Yesu o amba uri ri wana dakalo ḽihulwane musi ri tshi ṋea. Ndi nnyi ane na humbula uri o ṋea vhathu zwithu zwinzhi u fhira vhathu vhoṱhe?— Ee, ndi Yehova Mudzimu.

Bivhili i amba uri Mudzimu ndi “ene muṋei wa vhutshilo na u fema na zwoṱhe.” U ri ṋea mvula dzi bvaho ṱaḓulu na masana a ḓuvha, u itela uri zwimela zwi hule nahone ri wane zwiḽiwa. (Mishumo 14:17; 17:25) Ndi ngazwo Bivhili i tshi amba uri Yehova ndi “Mudzimu o takalaho”! (1 Timotheo 1:11, NW) Mudzimu u dzula o takala ngauri u ṋea vhathu zwithu. Na riṋe-vho ri nga takala arali ri tshi ṋea.

Ndi mini tshine ra nga tshi ṋea vhaṅwe vhathu? Ni nga ri ndi mini?— Nga zwiṅwe zwifhinga, tshifhiwa tshi ṱoḓa tshelede. Arali ni tshi ṱoḓa u ṋea muthu tshifhiwa tshine tsha wanala vhengeleni, ni fanela u tshi renga. Nga zwenezwo, arali ni tshi ṱoḓa u ṋea muthu tshifhiwa tsho raloho, ni fanela u sengedza tshelede u swika i tshi lingana u itela uri ni renge tshenetsho tshifhiwa.

Fhedzi zwiṅwe zwifhiwa a zwi bvi vhengeleni. Sa tsumbo, musi ḓuvha ḽi tshi khou fhisa, maḓi a rotholaho a a homolosa vhukuma. Musi ni tshi a ṋea muthu a re na ḓora, ni ḓo takadzwa nga honoho u ṋea.

Khamusi ḽiṅwe ḓuvha inwi na mme aṋu ni nga baka makhekhe. Zwenezwo zwi a takadza. Fhedzi ndi mini tshine na nga tshi ita nga maṅwe a eneo makhekhe, tshine tsha ḓo ita uri ni takale vhukuma u fhira u a ḽa oṱhe ni noṱhe?— Maṅwe ao ni nga a ṋea khonani dzaṋu. Naa ni nga takalela u ita zwenezwo?—

Mufunzi Muhulu na vhaapostola vhawe vho vha vha tshi ḓivha dakalo ḽine ḽa ḓiswa nga u ṋea. Ni a ḓivha uri vho ṋea mini vhaṅwe  vhathu?— Vho vha ṋea tshithu tsha ndeme vhukuma shangoni! Vho vha vha tshi ḓivha mafhungo-ngoho nga ha Mudzimu, nahone vha vhudza vhaṅwe enea mafhungo maḓifha. Vho vha vha sa badelisi muthu.

Ḽiṅwe ḓuvha muapostola Paulo na khonani yawe khulwane mufunziwa Luka, vho ṱangana na muṅwe mufumakadzi we na ene a vha tshi ṱoḓa u wana dakalo ḽine ḽa ḓiswa nga u ṋea. Vho ṱangana nae mulamboni. Paulo na Luka vho ya henefho nge vha pfa uri ndi fhethu hune ha rabelelwa hone. Nangoho zwa ralo, musi vha tshi swika vha wana vhaṅwe vhafumakadzi vha tshi khou rabela.

Paulo a thoma u vhudza vhenevha vhafumakadzi mafhungo maḓifha nga ha Yehova Mudzimu na Muvhuso wawe. Muṅwe wavho ane a pfi Lidia, a thetshelesa vhukuma. Nga murahu, Lidia a ṱoḓa u ita tshiṅwe tshithu u itela u sumbedza uri vhukuma u a funa mafhungo maḓifha e a a pfa. Ndi hezwi a tshi mbo ḓi amba na Paulo na Luka a ri: “Arali ni tshi vhona uri ndo tenda Murena, iḓani nḓuni yanga ni dzule hone.” Nahone a vha kombetshedza uri vha ye hayani hawe.—Mishumo 16:13-15.

Lidia o takalela u dalelwa nga vhenevha vhashumeli vha Mudzimu hayani hawe. O vha a tshi vha funa nga ṅwambo wa uri vho mu thusa uri a gude nga ha Yehova na Yesu na nga nḓila ine vhathu vha nga tshila ngayo nga hu sa fheli. Zwo mu takadza u ṋea Paulo na Luka zwiḽiwa na fhethu ha u awela. Lidia o takalela u ṋea ngauri o zwi ita zwi tshi bva mbiluni. Zwenezwo ndi zwithu zwine ra fanela u zwi humbula. Muṅwe muthu a nga ri vhudza uri ri fanela u ṋea muṅwe tshifhiwa. Fhedzi arali ra zwi ita zwi sa bvi mbiluni, ri nga si takale musi ro mu ṋea.

Sa tsumbo, kha ri ri ni na maḽegere ane na ṱoḓa u a ḽa. Arali nda ni vhudza uri maṅwe ni a ṋee muṅwe ṅwana, ni nga takala?— Fhedzi no vha ni tshi nga ita mini arali na ṱangana na khonani yaṋu ine na i funesa no fara maḽegere? Arali na ṋea khonani yaṋu maḽegere ni songo vhudzwa nga muthu, naa zwenezwo zwi nga si ni takadze?—

 Nga zwiṅwe zwifhinga ri funesa muthu lune ri tama u mu ṋea zwithu zwoṱhe, riṋe ra sala ri si na tshithu. Musi ri tshi bvela phanḓa u funa Mudzimu, ri fanela u ḓipfa nga yeneyo nḓila nga Hae.

Mufunzi Muhulu o vha a tshi ḓivha nga ha mufumakadzi wa tshisiwana we a vha a tshi ḓipfa nga yeneyo nḓila. O mu vhona thembeleni ngei Yerusalema. Onoyo mufumakadzi o vha e na tshelede mbili ṱhukhu dza tsimbi fhedzi. Fhedzi a longela dzenedzo tshelede mbili bogisini ḽa thembeleni uri dzi vhe muṋeelo, kana tshifhiwa. A huna we a mu kombetshedza uri a ite nga u ralo. Vhathu vhanzhi vhe vha vha vhe henefho a vho ngo zwi vhona uri o ṋeela. O ṋeela nge zwa bva mbiluni yawe na ngauri o vha a tshi funa nga maanḓa Yehova. O takadzwa nge a kona u ṋea.—Luka 21:1-4.

Hu na nḓila nnzhi dzine ra nga ṋea ngadzo. Naa dziṅwe dza hone ni a dzi ḓivha?— Arali ra ṋea zwi tshi bva mbiluni, ri ḓo takala. Ndi ngazwo Mufunzi Muhulu a tshi ri vhudza uri: “Ḓiḓowedzeni u ṋea.” (Luka 6:38, NW) Arali ra ita zwenezwo, ri ḓo ita uri vhaṅwe vhathu vha takale. Nahone riṋe ri ḓo takala u fhira vhathu vhoṱhe!