Ndima Ya 62

Ngudo kha U Ḓiṱukufhadza

MUSI o no fhodza mutukana a re na muya muvhi dzinguni ḽi re tsini ha Kesarea Filipi, Yesu u tama u vhuyelela hayani Kapernaume. Naho zwo ralo, u ṱoḓa u vha eṱhe na vhafunziwa vhawe lwendoni u itela uri a bvele phanḓa u vha lugisela lufu lwawe na vhuḓifhinduleli havho nga murahu. U a vha ṱalutshedza: “Murwa-muthu u ḓo ṋekedzwa zwanḓani zwa vhathu, vha ḓo mu vhulaha; u ḓo ri ó vhulahwa a dovha a vuwa hó fhela maḓuvha mararu.”

Naho Yesu o vha o no amba nga hazwo u thomani, nahone vhaapostola vhararu vho ita na u vhona u shandukiswa he khaho ‘u ṱuwa’ hawe ha vha ho haseledzwa, vhatevheli vhawe a vha athu u pfesesa malugana na haya mafhungo. Naho hu si na na muthihi ane a lingedza u hanedza uri u ḓo vhulahwa, samusi Petro o zwi ita u thomani, vha a ofha u bvela phanḓa u mu vhudzisa nga hazwo.

Mafheleloni vha swika Kapernaume, he ha vha hu tshi nga hayani ha Yesu misini ya vhuḓinḓa hawe. Hu dovha ha vha ḓorobo ya hayani ha Petro na vhaṅwe vhaapostola. Henefho, vhanna vhane vha kuvhanganya muthelo wa thembele vha ḓa ha Petro. Khamusi vha tshi lingedza u dzhenisa Yesu kha u vunḓa miṅwe mikhuvha i ṱanganedzwaho, vha a vhudzisa: “Naa mufunzi waṋu u n’o u bvisa muthelo naa?”

Petro u a fhindula: “Iina.”

Yesu, we khamusi a vha a tshi nga vha o ḓa henefho nḓuni nga murahu, u ṱhogomela zwe zwa itea. Ngauralo naho Petro a sa athu u vhuya a amba nga hazwo, Yesu u a vhudzisa: “Naa Simoni, iwe U ri mini? Mahosi a shango a bvisisa vho-nnyi muthelo wa zwivhiho? A thelisa vhakololo kana a thelisa vhatsinda?”

Petro u a fhindula: “Vha thelisa vhatsinda.”

Yesu u swaya uri: “Atsina vhakololo a vha theli.” Samusi Khotsi a Yesu e Khosi ya fhethu hoṱhe, Ane a gwadamelwa thembeleni, vhukuma a zwo ngo fanela uri Murwa wa Mudzimu a bvise muthelo wa thembele. Yesu u ri: “Hone, uri ri si vha khakhise, tshimbila U yo posa tshilazwulo dzivhani; huno khovhe ine ya thoma u fashiwa, i dzhie; U tshi ganulula mulomo wayo U ḓo wana yó khuba mali ya lutho. Dzhia yeneo U vha fhe, u vhe muthelo wanga na wau.”

Musi vhafunziwa vha tshi kuvhangana musi vho no vhuya Kapernaume, khamusi nḓuni ya Petro, vha a vhudzisa: “Naa muhulwane muvhusoni wa ṱaḓulu ndi nnyi?” Yesu u a ḓivha uri ndi mini tshine tsha ita uri vha vhudzise yeneyo mbudziso, a tshi ḓivha zwe zwa vha zwi tshi khou itea vhukati havho musi vha tshi khou mu tevhela vha tshi bva Kesarea Filipi. Zwenezwo a vhudzisa: “Nḓilani no vha ni tshi khou fhindulana mini?” Vho shona, vhafunziwa vha fhumula, ngauri vho vha vha tshi khou ṱaṱisana nga ḽa uri ndi nnyi we a vha a tshi ḓo vha muhulwane.

Nga murahu ha miṅwaha i ṱoḓaho u vha miraru musi Yesu a tshi khou funza, naa zwi a mangadza uri vhafunziwa vha ṱaṱisane nga u ralo? Ee, hezwi zwi dzumbulula ṱhuṱhuwedzo i re na maanḓa ya u sa fhelela ha muthu, khathihi na vhubvo ha vhurereli. Vhurereli ha Tshiyuda he vhafunziwa vha alutshela khaho ho vha vhu tshi ombedzela vhuimo ha nṱha kha mishumo yoṱhe. Zwiṅwe hafhu, khamusi Petro, nga ṅwambo wa uri Yesu o mu fulufhedzisa u mu ṋea “khoṋo” dza Muvhuso, o ḓipfa e muhulwane. Yakobo na Yohane na vhone vha nga kha ḓi vha vho vha na mihumbulo yo raloho vha tshi ḓipfa vho thakhiwa nge vha vhona Yesu a tshi shandukiswa.

Hu sa londwi izwo, Yesu u vha vhetshela tshifanyiso tshi tshilaho a tshi itela u khakhulula mavhonele avho. U vhidza ṅwana, u mu imisa vhukati havho, u a mu kuvhatedza, a ri: “Arali ná sa shanduka na nga vhana, ni nga si dzhene muvhusoni wa ṱaḓulu. Ané a ḓi-ṱukufhadza a nga ṅwana uyu, ndi ene muhulwane muvhusoni wa ṱaḓulu. Ané a vhuya a ṱanganedza ṅwana muthihi a ngaho uyu a tshi itela dzina ḽanga, u ṱanganedza nṋe.”

Ndi nḓila yavhuḓi lungafhani ya u khakhulula vhafunziwa vhawe! Yesu ha vha sinyutsheli a vha vhidza uri vha a ḓikukumusa, ndi dziphangwa, kana uri vha na vhuhovheleli. Hai, fhedzi u fanyisedza pfunzo yawe i khakhululaho nga u shumisa vhana vhaṱuku, vhane vha vha na pfaneleo dza u ḓiṱukufhadza na vha si na vhuhovheleli nahone nga u tou angaredza vhane vha si vhe na muhumbulo wa tshidulo tsha nṱha vhukati havho. Nga zwenezwo Yesu u sumbedza uri vhafunziwa vhawe vha fanela u bveledza hedzi pfaneleo dzine dza ṱalula vhana vha ḓiṱukufhadzaho. Samusi Yesu a tshi phetha nga uri: “A re muṱuku kha inwi noṱhe, ndi ene muhulwane.” Mateo 17:22-27; 18:1-5; Marko 9:30-37; Luka 9:43-48.

▪ Musi a tshi vhuya Kapernaume, ndi pfunzo ifhio ine Yesu a i dovholola, nahone i ṱanganedzwa hani?

▪ Ndi ngani Yesu a songo vhofhea u lifha muthelo wa thembele, fhedzi ndi ngani a tshi u lifha?

▪ Ndi mini khamusi zwe zwa ita uri vhafunziwa vha ṱaṱisane nahone Yesu u vha khakhulula hani?