Ndima Ya 87

U Lugiselela Vhumatshelo nga Vhuṱali vhu Shumaho

YESU u kha ḓi bva u fhedza u amba nga ha mafhungo a murwa wa ḽihwarahwara a tshi vhudza magogo ane a katela na vhafunziwa vhawe, vha lutho vha sa fulufhedzei na vhaṅwe vhaitazwivhi vha ḓivheaho, na vha maṅwalo na Vhafarisei. Zwino, a tshi amba na vhafunziwa vhawe, u vha anetshela tshifanyiso malugana na munna o pfumaho we a ṱanganedza muvhigo u sa takadzi nga ha mulanguli wawe, kana mukoma wa nnḓu yawe.

U ya nga Yesu, onoyo mupfumi u vhidza mukoma wawe nahone a mu vhudza uri u ḓo mu pandela. Mukoma a ḓivhudzisa: “Ndi ita’ni, huufha muṋe wanga a tshi ndzhiela vhukoma? U lima a thi hu koni, u humbela ha vha na ṱhoni. Ndi vhó tshi ḓivha tshiné nda ḓo ita, tshiné zwino ndi tshi bviswa vhukomani, vha ḓo nṱanganedzela tshone dzinḓuni dzavho.”

Maano a onoyo mukoma ndi afhio? U vhidza vha re na milandu na muṋe wawe. U a vhudzisa: “Mulandu wau kha muṋe wanga ndi mungafhani?”

Wa u thoma u a fhindula, ‘ndi lithara dza 2 200 dza mapfura.’

U mu vhudza uri, ‘dzhia maṅwalo au u ṱavhanye u ṅwale uri 1 100.’

U vhudzisa muṅwe: “Iwe-ha mulandu wau ndi mungafhani?”

U ri, ‘lithara dza 22 000 dza goroi.’

‘Dzhia maṅwalo au U ṅwale 18 000.’

Onoyo mukoma u na ndugelo ya u fhungudza milandu ine ya kolodiwa muṋe wawe, samusi a tshi kha ḓi shumela muṋe wawe kha zwa mabindu. Nga u fhungudza milandu, u khou ḓiitela vhukonani na vhane vha nga mu thakha-vho musi a tshi xelelwa nga mushumo wawe.

Musi muṋe a tshi pfa zwe zwa itea, u a takala. Zwi re zwone ndi uri u “renda mukoma wa u sa luga ó ita maano.” I ngoho, Yesu u a engedza: “Vhana vha ḽino shango maano ané vha itela lushaka lwa havho vha fhira vhana vha tshedza.”

Zwino, musi a tshi funza vhafunziwa vhawe, Yesu u a khuthadza: “Ḓi-ṱoḓeleni dzikhonani nga Mamona u songo lugaho, uri musi ni tshi ḓo u shaya, dzikhonani dzaṋu dzi ni ṱanganedze zwifhaṱoni zwi sá ṱahali na lini na lini.”

Yesu ha khou khoḓa mukoma nga u sa luga hawe, fhedzi nga ha luvhonela lwawe hu tshee nga phanḓa, vhuṱali vhu shumaho. Kanzhi “vhana vha ḽino shango” nga vhuṱali vha shumisa tshelede yavho kana zwine vha vha nazwo u ita vhukonani na vhane vha nga kona u vha thakha-vho. Ngauralo vhashumeli vha Mudzimu, “vhana vha tshedza,” na vhone vha fanela u shumisa thundu yavho i vhonalaho, “Mamona u songo lugaho,” nga nḓila ya vhuṱali u itela u ḓivhuyedza.

Fhedzi samusi Yesu a tshi amba, vha fanela u ita vhukonani nga haya mamona na vhane vha ḓo vha ṱanganedza “zwifhaṱoni zwi sá ṱahali na lini na lini.” Kha vha miraḓo ya vha sambi ḽiṱuku, hezwi zwifhaṱo zwi ṱaḓulu; kha vha “dziṅwe nngu,” zwi Paradisoni kha ḽifhasi. Samusi i Yehova Mudzimu na Murwa wawe fhedzi vhane vha nga ṱanganedza havha vhathu kha hezwi zwifhaṱo, ri fanela u fhisetshela u ṱahulela vhukonani hashu navho nga u shumisa “Mamona u songo lugaho” une ra vha nawo u itela u tikedza madzangalelo a Muvhuso. Nga zwenezwo, musi zwithu zwi vhonalaho zwi tshi kundwa kana zwi tshi fhela, samusi zwa vhukuma zwi tshi ḓo ralo, vhumatshelo hashu vhu sa gumi ri ḓo vhu wana.

Yesu u bvela phanḓa u amba uri vhathu vhane vha fulufhedzea kha u ṱhogomela hezwi zwithu, kana zwiṱuku, vha ḓo fulufhedzea na kha u ṱhogomela zwithu zwa ndeme vhukuma. O bvela phanḓa: “Arali ni sa fulufhedzei kha Mamona wa u sa luga, ndi nnyi ane a ḓo ni kumedza zwithu vhukuma [ndi uri madzangalelo a muya, kana a Muvhuso]? Arali ni sa fulufhedzei kha zwi re zwa muṅwe [madzangalelo a Muvhuso ane Mudzimu a a ṋea vhashumeli vhawe], ndi nnyi ane a ḓo ni fha zwi re zwaṋu [malamba a vhutshilo zwifhaṱoni zwi sa ṱahali]?”

Zwi nga si konadzee uri ri vhe vhashumeli vha Mudzimu hu uri nga thungo ri phuli dza mamona, zwithu zwi vhonalaho, samusi Yesu a tshi phetha: “A huna mulanda a konaho u shumela vhaṋe vhavhili; a nga ḓo vhénga muṅwe, muṅwe a mu funa; a nambatela muṅwe, muṅwe a mu nyadza. A ni koni uri Mudzimu na Mamona na vha shumela vhoṱhe.” Luka 15:1, 2; 16:1-13; Yohane 10:16.

▪ Mukoma a re kha tshifanyiso tsha Yesu u ita vhukonani hani na vhane vha nga mu thusa nga murahu?

▪ “Mamona u songo lugaho” ndi mini, nahone ri nga ita hani vhukonani ngawo?

▪ Ndi vhafhio vhane vha nga ri ṱanganedza “zwifhaṱoni zwi sá ṱahali na lini na lini,” nahone izwi zwifhaṱo ndi mini?