Nganea 30: Tshiṱaka tshi Swaho
Mushe o vha o ḓa thavhani ya Horebe u wanela nngu dzawe hatsi. Henefha a vhona tshiṱaka tshi na mulilo, fhedzi tsho vha tshi sa khou swa!
Mushe a humbula: ‘Zwi a mangadza. Ndi ḓo sendela tsini nda sedza zwavhuḓi.’ Musi a tshi sendela, ha bva ipfi tshiṱakani, ḽi tshi ri: ‘U songo sendela tsini. Bvula thovho dzau, ngauri wo ima fhethu hukhethwa.’ O vha e Mudzimu we a vha a tshi khou amba nga muruṅwa, ngauralo Mushe a ḓithivha tshifhaṱuwo.
Zwenezwo Mudzimu a ri: ‘Ndo vhona u ṱhuphea ha vhathu vhanga Egipita. Ngauralo ndi ḓo vha vhofholola, nahone Nne ndi ruma iwe u bvisa vhathu vhanga Egipita.’ Yehova o vha a tshi ṱoḓou ḓisa vhathu vhawe shangoni ḽa u naka ḽa Kanana.
Fhedzi Mushe a ri: ‘Ndì nnyi nṋe? Ndi nga zwi itisa hani izwi? Arali nda ya, Vhaisiraele vha ḓo ri kha nṋe, “Wo rumiwa nga nnyi?” Ndi ḓo ri mini?’
Mudzimu a fhindula: ‘Hezwi ndi zwine wa ḓo amba. “Yehova Mudzimu wa Abrahamu, Mudzimu wa Isaka na Mudzimu wa Yakobo o nthuma ha vhoinwi.”’ Yehova a engedza: ‘Iḽi ndi dzina ḽanga nga hu sa fheli.’
Mushe a fhindula: ‘Khamusi vha si ntende musi ndi tshi ri wo nthuma.’
Mudzimu a vhudzisa: ‘Ndi mini tshi re tshanḓani tshau?’
Mushe a fhindula: ‘Ndi lubaḓa.’
Mudzimu a ri: ‘Lu pose fhasi.’ Musi Mushe o lu posa, lubaḓa lwa vha ṋowa. Zwenezwo Yehova a sumbedza Mushe vhuṅwe vhuṱolo. A ri: ‘Dzhenisa tshanḓa tshau nguvhoni yau.’ Mushe a dzhenisa, nahone musi a tshi bvisa tshanḓa tshawe, tsho vha tshi tshi nga tsho vha tshi na vhulwadze vhuvhi vhu vhidzwaho mapele. Yehova a dovha a fha Mushe maanḓa a u ita vhuṱolo ha vhuraru. Mafheleloni a ri: ‘Musi u tshi ita vhuṱolo uvhu Vhaisiraele vha ḓo tenda zwauri ndo u ruma.’
Murahu ha henefho Mushe a ya hayani a ri kha Yetero: ‘Nnditshe ndi vhuelele ha mashaka anga Egipita u vha vhona.’ Vha onesana, Mushe a thoma lwendo lwawe lwa u vhuelela Egipita.
Ekisodo 3:1-22; 4:1-20.
Mbudziso
- Thavha i re kha tshifanyiso i pfi mini?
- Ṱalusani tshithu tshi songo ḓoweleaho tshe Mushe a tshi vhona musi a tshi ya thavhani na nngu dzawe
- Ipfi ḽi bvaho tshiṱakani tshi swaho ḽo ri mini, nahone ḽo vha ḽi ḽa nnyi?
- Mushe o aravha hani musi Mudzimu a tshi mu vhudza uri u ḓo ranga phanḓa vhathu vha Mudzimu vha tshi bva Egipita?
- Mudzimu o vhudza Mushe uri a ri mini musi vhathu vha tshi mu vhudzisa uri o rumiwa nga nnyi?
- Mushe o vha a tshi ḓo kona hani u sumbedza uri o vha o rumiwa nga Mudzimu?
Mbudziso dzo engedzeaho
- Vhalani Ekisodo 3:1-22.
Tshenzhelo ya Mushe i ri ṋea hani fulufhelo ḽa uri naho ri tshi vhona ri sa fanelei u ita mushumo wa lwa ṱaḓulu, Yehova u ḓo ri thusa? (Ek. 3:11, 13; 2 Vha-Kor. 3:5, 6)
- Vhalani Ekisodo 4:1-20.
Mavhonele a Mushe o shanduka hani miṅwahani ya 40 ye a i fhedza e ngei Midiani, nahone ndi ngudo ifhio ine vhane vha khou swikelela ndugelo dza tshivhidzoni vha nga i guda kha zwenezwi? (Ek. 2:11, 12; 4:10, 13; Mixa 6:8; 1 Tim. 3:1, 6, 10)
Naho ri tshi laiwa nga ndangulo ya Yehova, tsumbo ya Mushe i ri ṋea fulufhelo ḽifhio? (Ek. 4:12-14; Ps. 103:14; Vha-Heb. 12:4-11)
