Loto na muṱa wawe vho vha vha tshi dzula na Abrahamu shangoni ḽa Kanana. Ḽiṅwe ḓuvha Abrahamu a ri kha Loto: À hu na shango ḽo eḓanaho fhano ḽa zwipuka zwashu zwoṱhe. Nga khumbelo, kha ri fhandekane. Arali iwe wa ya huṅwe, nṋe ndi ḓo ya huṅwe.’

Loto a sedza shangoni ḽoṱhe. A vhona fhethu ha u naka he ha vha hu na maḓi na hatsi vhunzhi havhuḓi ha zwipuka. Itshi tsho vha tshi Tshiṱiriki tsha Yorodane. Ngauralo Loto a ya henengei na muṱa wawe na zwipuka zwawe vha dzula muḓini wa Sodoma.

Vhathu vha Sodoma vho vha vhe vhavhi zwihulu. Hezwi zwa dina Loto, ngauri o vha e munna wavhuḓi. Mudzimu na ene a dinalea. Mafheleloni, Mudzimu a ruma vharuṅwa vhavhili a vhudza Loto uri u ḓo fhelisa Sodoma na muḓi wa nga tsini wa Gomora.

Vharuṅwa vha vhudza Loto: ‘Ṱavhanya! Dzhia musadzi wau na vhananyana vhau vhavhili ni bve afha!’ Loto na muṱa wawe vho vha vha tshi ongolowa u bva, ngauralo vharuṅwa vha vha fara nga zwanḓa vha vha bvisa muḓini. Muṅwe wa vharuṅwa a ri: ‘Shavhisani vhutshilo ha vhoinwi! Ni songo sedza murahu. Shavhelani dzithavhani, uri ni si fe.’

Loto na vhananyana vhawe vha thetshelesa vha shavha Sodoma. Vha si ime, vha si sedze murahu. Fhedzi musadzi wa Loto a si thetshelese, a ima a sedza murahu. Zwenezwo musadzi wa Loto a vha tshiunga tsha muṋo. Ni khou mu vhona tshifanyisoni?

Ri nga guda ngudo yavhuḓi kha izwi. Zwi sumbedza uri Mudzimu u tshidza vha mu thetshelesaho, fhedzi vha sa mu thetshelesi vha ḓo xelelwa nga vhutshilo havho.

Genesi 13:5-13; 18:20-33; 19:1-29; Luka 17:28-32; 2 Petro 2:6-8.