Vhonani uri mutukana o ṱungufhala hani. Ndi Yosefa. Vhakomana vhawe vha kha ḓi bva u mu rengisela avha vhanna vhane vha khou ya Egipita. Henengei Yosefa u ḓo itwa phuli. Ndi ngani vhakomana vhawe vho ita itshi tshithu tshivhi? Ndi ngauri vho vha vhe na vivho kha Yosefa.

Khotsi avho Yakobo o vha a tshi funesa Yosefa. O sumbedza u mu funa nge a ita uri a itelwe dzhasi ḽa u naka. Musi vhakomana vhawe vha 10 vha tshi vhona uri Yakobo u funesa hani Yosefa

Yosefa o vha na miḽoro mivhili. Kha miḽoro yoṱhe ya Yosefa vhakomana vhawe vho mu gwadamela. Musi Yosefa a tshi vhudza vhakomana vhawe miḽoro iyi, vha tou ṋaṋa u mu vhenga.

Ḽiṅwe ḓuvha musi vhakomana vha Yosefa vha tshi khou lisa nngu dza khotsi avho, Yakobo a humbela Yosefa u ya u sedza uri vha khou lisa hani. Vhakomana vhawe vha tshi mu vhona a tshi ḓa, vhaṅwe vhavho vha ri: ‘Kha ri mu vhulahe!’ Fhedzi Rubeni, mukomana muhulwane a ri: ‘Hai, ni songo ita izwo!’ Nṱhani ha izwo vha fara Yosefa vha mu posa dindini ḽo omaho maḓi. Vha dzula fhasi vha humbula zwe vha vha vha tshi nga ita ngae.

Nga tshenetsho tshifhinga ha ḓa vhaṅwe vhanna vha Vhaisimaele. Yuda a ri kha vhaṅwe: ‘Kha ri mu rengisele Vhaisimaele.’ Vha ita ngauralo. Vha rengisa Yosefa nga maseṱha a 20. Zwo vha zwi tshiṱuhu tshingafhani izwo!

Vhakomana vho vha vha tshi ḓo vhudza khotsi avho mini? Vha vhulaha mbudzi vha lovhea dzhasi ḽa Yosefa malofhani a mbudzi. Vha isa dzhasi hayani ha khotsi avho vha ri: ‘Ro wana hezwi. Ḽi sedze, u vhone arali ḽi si dzhasi ḽa Yosefa.’

Yakobo a vhona uri ndi ḽone. A lila: ‘Phukha ya ḓaka i fanela u vha yo vhulaha Yosefa.’ Ndi zwone zwe vhakomana vha Yosefa vha ṱoḓa khotsi avho a tshi zwi humbula. Yakobo a lila maḓuvha manzhi. Fhedzi Yosefa o vha a songo fa. Kha ri vhone uri ho itea mini khae he a iswa hone.

Genesi 37:1-35.