Vhanna afha vha khou kombetshedza vhathu u shuma. Vhonani munna a khou rwaho muṅwe wa vhashumi nga tshimebi! Vhashumi ndi vha muṱa wa Yakobo, nahone vha vhidzwa Vhaisiraele. Vhanna vha khou vha kombetshedzaho u shuma ndi Vhaegipita. Vhaisiraele vho vha dziphuli dza Vhaegipita. Izwi zwo itea hani?

Nga miṅwaha minzhi muṱa wa Yakobo wo dzula nga mulalo Egipita. Yosefa, we a vha a tsini na khosi Farao nga vhuhulwane Egipita, o vha a tshi vha londa. Fhedzi Yosefa a fa. Nahone Farao muswa, we a vha a sa funi Vhaisiraele, a vha khosi Egipita.

Ngauralo uyu Farao muvhi a ita Vhaisiraele dziphuli. A vhea vhanna vha vha vhusaho vhe vha vha vhe na tshiṱuhu. Vha kombetshedza Vhaisiraele u shumesa vha tshi fhaṱela Farao miḓi. Fhedzi Vhaisiraele vha ḓi ḓala. Nga murahunyana Vhaegipita vha ofha uri Vhaisiraele vha ḓo ḓalesa vha vha na maanḓa mahulu.

Ni a ḓivha uri Farao o ita mini? O amba na vhasadzi vhe vha thusa vhomme vha Vhaisiraele musi vha tshi beba vhana vhavho, a ri: ‘Ni fanela u vhulaha vhana vhoṱhe vha vhatukana vha bebwaho.’ Fhedzi vhasadzi avha vho vha vhe vhavhuḓi, vha si vhulahe vhana.

Ngauralo Farao a fha vhathu vhawe vhoṱhe hoyu mulayo: ‘Dzhiani vhana vha Vhaisiraele vha vhatukana ni vha vhulahe. Ni litshe vhana vha vhasidzana fhedzi vha tshile.’ Naa itsho tsho vha tshi si tshithu tshivhi a tshi laedza? Kha ri vhone uri muṅwe wa vhana vha vhatukana o tshidzwa hani.

Ekisodo 1:6-22.