Vhonani mitshelo yo hwalwaho nga avha vhanna. Vhonani uri itsho tshiṱokola tsha nḓirivhe tsho hula hani. Tshi ṱoḓa vhanna vhavhili uri vha tshi hwale nga danda. Ni vhone na mahuyu na maramba. Mitshelo iyi yo vha i tshi bva Kanana. Humbulani, Kanana ndi he Abrahamu, Isaka na Yakobo vha vhuya vha dzula hone. Fhedzi nga mulandu wa nḓala henengei, Yakobo na muṱa wawe, vha ya Egipita. Zwino, hu ṱoḓaho u vha miṅwaha ya 216 nga murahu, Mushe o vha a tshi khou humisela Vhaisiraele Kanana. Vho vha vho ḓa sogani fhethuni hu vhidzwaho Kadese.

Ho vha hu tshi dzula vhathu vhavhi Kanana. Ngauralo Mushe a ruma ṱholi dza 12, a dzi vhudza: ‘Ni wane uri hu dzula vhathu vhangafhani henengei, na uri vha na maanḓa mangafhani. Ni wane arali mavu e avhuḓi a u ṱavha zwithu. Ni vhuye na miṅwe ya mitshelo.’

Musi ṱholi dzi tshi vhuya Kadese, dza vhudza Mushe: ‘Ndi shango ḽavhuḓi vhukuma.’ Nahone u zwi khwaṱhisa, vha sumbedza Mushe miṅwe ya mitshelo. Fhedzi vha 10 vha dziṱholi vha ri: ‘Vhathu vha hone ndi vhahulu nahone vha na maanḓa. Ri ḓo vhulawa arali ra lingedza u dzhia shango.’

Vhaisiraele vha ofha musi vha tshi zwi pfa. Vha ri: ‘Zwo vha zwi tshi nga vha khwine u fela Egipita kana fhano sogani. Ri ḓo vhulawa nndwani, na vhasadzi vhashu na vhana vha thubiwa. Kha ri nange murangaphanḓa muswa ri vhuelele Egipita!’

Fhedzi ṱholi mbili dza fulufhela Yehova, dza lingedza u fhumudza vhathu. Madzina adzo ndi Yoshua na Kalebe. Dza ri: ‘Ni songo ofha. Yehova u na rine. Shango ri ḓo ḽi wana.’ Fhedzi vhathu vha si thetshelese. Vha ṱoḓa na u vhulaha Yoshua na Kalebe.

Izwi zwa tou sinyusa Yehova, nahone a vhudza Mushe: ‘A hu na wa vhathu vha miṅwaha ya 20 u ya nṱha ane a ḓo dzhena shangoni ḽa Kanana. Vho vhona vhuṱolo he nda ita Egipita na sogani, fhedzi a vha mpfulufhedzi. Ngauralo vha ḓo tshimbila sogani miṅwaha ya 40 u swikela hu tshi fa muthu wa u fhedza. Ndi Yoshua na Kalebe fhedzi vhane vha ḓo dzhena Kanana.’

Numeri 13:1-33; 14:1-38.