Saulo a dovha a lingedza u fara Davida. A dzhia vha 3 000 vha maswole awe a ya u mu ṱoḓa. Davida a tshi zwi pfa, a ruma dziṱholi u sedza he Saulo a dzula hone vhusiku. Zwenezwo Davida a vhudzisa vhanna vhawe vhavhili: ‘Ndi nnyi ane a ḓo ṱuwa na nṋe denndeni ya Saulo?’

Abisai murwa wa Tseruya khaladzi a Davida a fhindula: ‘Ndi ḓo ṱuwa na iwe.’ Musi Saulo na vhanna vhawe vho eḓela, Davida na Abisai vha dzhena denndeni nga u dodela. Vha doba pfumo ḽa Saulo na tshinwelo tshawe tsha maḓi, tshe tsha vha tshi tsini ha ṱhoho ya Saulo. Ho vha hu si na a vha vhonaho kana u vha pfa ngauri vhoṱhe vho vha vho eḓela.

Vhonani Davida na Abisai zwino. Vho vha vho no ṱuwa vha nṱha ha thavha. Davida a vhidzelela muhulwane wa mmbi ya Isiraele: Àbinere, ndi ngani u sa tsireledzi muṋe wau, khosi? Vhona! Pfumo ḽawe na tshinwelo tshawe tsha maḓi zwi ngafhi?’

Saulo a vuwa. A ḓivha ipfi ḽa Davida, a vhudzisa: ‘Ndi iwe Davida?’ Saulo na Abinere ni a vha vhona fhala fhasi?

Davida a fhindula Saulo: ‘Ee, murena wanga khosi.’ Davida a vhudzisa: ‘Ndi ngani u tshi khou lingedza a mpfara? Ndo tshinyani? Pfumo ḽau ngeḽi, khosi. Muṅwe nga a ḓe a ḽi dzhie.’

Saulo a ri: ‘Ndo khakha. Ndo ita nga vhutsilu.’ Zwenezwo Davida a ṱuwa, na Saulo a vhuelela hayani. Fhedzi Davida a ri kha ene muṋe: ‘Ḽiṅwe ḽa ano maḓuvha Saulo u ḓo mmbulaha. Ndi fanela u shavhela shangoni ḽa Vhafilisita.’ A ita ngauralo. Davida a kona u fhura Vhafilisita a vha ita uri vha tende uri u ima navho.

Nga murahunyana, Saulo na Yonathani vha vhulwawa nndwani na Vhafilisita. Izwi zwa ṱungufhadza Davida zwihulu, nahone a ṅwala luimbo lwa u naka, lwe a ri khalwo: ‘Ndi vhaisalela iwe, mukomana wanga Yonathani. Ndo vha ndi tshi u funa hani!’

Nga murahu ha izwi Davida a vhuelela Isiraele muḓini wa Heburoni. Ho vha hu na nndwa vhukati ha vhanna vhe vha nanga Isibosete murwa wa Saulo u vha khosi na vhaṅwe vhanna vhe vha ṱoḓa uri Davida a vhe khosi. Fhedzi vhanna vha Davida vha kunda. Davida o vha e na miṅwaha ya 30 a tshi itwa khosi. Miṅwaha ya sumbe na hafu a vhusa Heburoni. Vhaṅwe vha vharwa vhe a bebelwa vhone henefho vho vha vhe Aminoni, Abesalomo na Adonia.

Ha ḓa tshifhinga tsha musi Davida na vhanna vhawe vha tshi gonya u thuba muḓi wa u naka we wa vha u tshi pfi Yerusalema. Yoaba, muṅwe murwa wa Tseruya khaladzi a Davida, a ranga phanḓa nndwani. Davida a holela Yoaba nga u mu ita muhulwane wa mmbi yawe. Zwenezwo Davida a thoma u vhusa muḓini wa Yerusalema.

1 Samuele 26:1-25; 27:1-7; 31:1-6; 2 Samuele 1:26; 3:1-21; 5:1-10; 1 Koronika 11:1-9.