Musidzana ane na mu vhona afha u na miṅwaha ya 12. Yesu o fara tshanḓa tshawe, mme awe na khotsi awe vho ima tsini. Ni a ḓivha uri ndi ngani vho takala ngaurali? Kha ri zwi wane.

Khotsi a musidzana o vha e munna a ḓivhaleaho a no pfi Yairo. Ḽiṅwe ḓuvha ṅwananyana wawe a lwala, a ladzwa vhulaloni. Fhedzi a tou ṋaṋa u lwala. Yairo na musadzi wawe vha vhilaela zwihulu, ngauri zwo vha zwi tshi nga u ḓo fa. O vha e ene ṅwananyana wavho muthihi fhedzi. Ngauralo Yairo a ya u ṱoḓa Yesu. O vha o pfa nga ha vhuṱolo he a vha a tshi khou ita.

Musi Yairo a tshi wana Yesu, ho vha hu na gogo ḽihulu ḽo mu tangaho. Fhedzi Yairo a dzhena vhukati ha gogo a wela milenzheni ya Yesu a ri: ‘Ṅwananyana wanga u khou lwala zwihulu. Nga khumbelo i ḓa u mu fhodze.’ Yesu a ri u ḓo ḓa.

Samusi vha tshi khou tshimbila, gogo ḽa ḓi sukumedza uri ḽi sendele. Nga u ṱavhanya Yesu a ima a vhudzisa: ‘Ndi nnyi o nkwamaho?’ Yesu o vha o pfa maanḓa a tshi bva khae, ngauralo a zwi ḓivha uri muṅwe o vha o mu kwama. Fhedzi nnyi? O vha e musadzi we a vha a tshi khou lwala zwihulu miṅwaha ya 12. O vha o ḓa a kwama zwiambaro zwa Yesu, a fhola!

Izwi zwa ita uri Yairo a pfe e khwine, ngauri o vha a tshi zwi vhona uri zwo vha zwi tshi leluwa hani kha Yesu u fhodza muthu. Fhedzi zwenezwo ha ḓa murumiwa. A vhudza Yairo: ‘U songo tsha dina Yesu. Ṅwananyana wau o fa.’ Yesu a pfa izwi a ri kha Yairo: ‘U songo vhilaela, ṅwananyana u ḓo tshila.’

Musi vha tshi swika nḓuni ya Yairo, vhathu vho vha vha tshi khou lila nga u ṱungufhala huhulu. Fhedzi Yesu a ri: ‘Ni songo lila. Ṅwana ho ngo fa. O tou eḓela.’ Fhedzi vha sea Yesu, ngauri vho vha vha tshi ḓivha uri ṅwananyana o vha o fa.

Zwenezwo Yesu a dzhia khotsi na mme a musidzana na vhararu vha vhaapostola vhawe a dzhena navho nḓuni ye ṅwana a vha o lala khayo. A mu fara nga tshanḓa a ri: ‘Vuwa!’ Musidzana a tshila, samusi ni tshi zwi vhona afha. A vuwa a tshimbila! Ndi nga hone mme awe na khotsi awe vho takala ngaurali.

Uyu a si muthu wa u thoma we Yesu a mu vusa vhafuni. Wa u thoma ane Bivhili ya amba nga hae o vha e murwa wa tshilikadzi ya muḓini wa Naini. Yesu o vusa na Lazaro, khaladzi a Maria na Martha, vhafuni. Musi Yesu a tshi vhusa sa khosi, u ḓo humisela vhathu vhanzhi vho faho vhutshiloni. Naa zwi nga si ri takadze?

Luka 8:40-56; 7:11-17; Yohane 11:17-44.