1. Ndi ifhio thabelo ya bvumo ine ya ḓo ṱolisiswa zwino?

VHATHU vha dzimilioni shangoni ḽoṱhe vha a ḓivha thabelo ine vhanzhi vha i vhidza Khotsi ashu wa Ṱaḓulu, kana Thabelo ya Murena. Yeneyo mibulo yoṱhe i ambela kha thabelo i re na bvumo ye Yesu Kristo a i ṋea sa tsumbo. Ndi thabelo i swayeaho vhukuma, nahone u ṱhogomela khumbelo dzayo tharu dza u thoma zwi ḓo ni thusa u guda zwo engedzeaho nga ha zwine vhukuma zwa funzwa nga Bivhili.

2. Ndi zwifhio zwithu zwiraru zwe Yesu a funza vhafunziwa vhawe uri vha zwi rabelele?

² Mathomoni a yeneyi thabelo ya tsumbo, Yesu o laedza vhathetshelesi vhawe a ri: “Ni tshi rabela ni ambe ni ri: Khotsi-ashu wa ṱaḓulu! dzina ḽau ḽi khethwe; Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:9-13) Dzenedzo khumbelo tharu dzi amba mini?

3. Ndi mini zwine ra tea u zwi ḓivha nga ha Muvhuso wa Mudzimu?

³ Ro no ḓi guda zwinzhi nga ha dzina ḽa Mudzimu, Yehova. Nahone ro haseledzanyana nga ha zwi funwaho nga Mudzimu—zwe a zwi ita na zwine a kha ḓi ḓo zwi itela vhathu. Nga zwenezwo-ha, Yesu o vha a tshi khou ambela kha mini musi a tshi ri vhudza uri ri tshi rabela ri ri: “Muvhuso wau u ḓe”? Muvhuso wa Mudzimu ndi mini? U ḓa hawo zwi ita uri dzina ḽa Mudzimu ḽi khethwe nga nḓila-ḓe? Nahone u ḓa ha  Muvhuso zwi tshimbidzana hani na u ita zwi funwaho nga Mudzimu?

4. Muvhuso wa Mudzimu ndi mini, nahone Khosi yawo ndi nnyi?

⁴ Muvhuso wa Mudzimu ndi hulumeni yo tikwaho nga Yehova Mudzimu i re na Khosi yo khethwaho nga Mudzimu. Khosi ya Muvhuso wa Mudzimu ndi nnyi? Ndi Yesu Kristo. Yesu ane a vha Khosi ndi muhulwane kha vhavhusi vhoṱhe vha vhathu nahone u vhidzwa “Khosi ya vha re mahosi, Ḽirena ḽa vha re marena.” (1 Timotheo 6:15) U na maanḓa a u ita zwithu zwinzhi zwavhuḓi u fhira muvhusi naho e ufhio wa ṋama, na ane a vhonala e wa khwine u fhira vhoṱhe.

5. Muvhuso wa Mudzimu u vhusa u ngafhi, nahone u ḓo vhusa mini?

⁵ Muvhuso wa Mudzimu u ḓo vhusa u ngafhi? Yesu ene u ngafhi? Ni songo hangwa uri o vhulahwa kha danda ḽa tshengedzo, nahone a vuswa. Nga murahunyana ha zwenezwo, a gonya ṱaḓulu. (Mishumo 2:33) Nga zwenezwo, Muvhuso wa Mudzimu u ṱaḓulu. Ndi ngazwo Bivhili i tshi u vhidza ‘muvhuso wa ṱaḓulu.’ (2 Timotheo 4:18) Naho Muvhuso wa Mudzimu u ṱaḓulu, u ḓo vhusa ḽifhasi.—Ndzumbululo 11:15.

6, 7. Ndi mini zwine zwa ita uri Yesu a vhe Khosi i swayeaho?

⁶ Ndi mini zwine zwa ita uri Yesu a vhe Khosi i swayeaho? Tshiṅwe tshiitisi ndi uri a nga si vhuye a fa. Musi Bivhili i tshi vhambedza Yesu na mahosi a vhathu, i mu vhidza “ané u sá fa ha vha hawe e eṱhe.” (1 Timotheo 6:16) Hezwi zwi amba uri zwithu zwoṱhe zwavhuḓi zwine Yesu a zwi ita zwi ḓo fhedza tshifhinga tshilapfu. Nahone u ḓo ita zwithu zwihulwane zwine zwa vhuyedza vhathu.

⁷ Ṱhogomelani vhuporofita vhu tevhelaho ha Bivhili nga ha Yesu: “Muya wa Yehova u ḓo dzula ú khae’, muya wa vhuṱali na wa ṱhalukanyo, na muya wa nyeletshedzo na wa maanḓa, na muya wa nḓivho na wa u ofha Yehova. U ofha Yehova zwi ḓo mu ḓifhela; ha nga haṱuli ó vhona nga maṱo awe, ha nga fhedzi mafhungo ó ranga u pfa nga nḓevhe dzawe. U ḓo haṱulela vhaṱoma nga zwivhuya; vhaṱhuphei vha fhano shangoni  u ḓo fhedza mafhungo avho nga u lulamisa.” (Yesaya 11:2-4) Eneo maipfi a sumbedza uri Yesu u ḓo vha Khosi yo lugaho na i pfelaho vhuṱungu vhathu kha ḽifhasi. Naa ni nga ṱoḓa u vhuswa nga muvhusi o raloho?

8. Ndi vhafhio vhane vha ḓo vhusa na Yesu?

⁸ Iṅwe mbuno nga ha Muvhuso wa Mudzimu ndi i tevhelaho: Yesu ha nga vhusi e eṱhe. Hu ḓo vha na vhane a ḓo vhusa navho. Sa tsumbo, muapostola Paulo o vhudza Timotheo a ri: “Arali ri tshi konḓelela, ri ḓo vha mahosi-vho.” (2 Timotheo 2:12) Ee, Paulo na Timotheo na vhaṅwe vhathu vha fulufhedzeaho vhe vha khethiwa nga Mudzimu vha ḓo vhusa na Yesu Muvhusoni wa ṱaḓulu. Ndi vhangana vhane vha ḓo vha na yeneyo ndugelo?

9. Ndi vhangana vhane vha ḓo vhusa na Yesu, nahone Mudzimu o thoma lini u vha khetha?

⁹ Samusi zwo bulwa kha Ndima ya 7 ya yeneyi bugu, muapostola Yohane o sumbedzwa bono ḽe khaḽo a vhona “Ngwana [Yesu Kristo] yó ima kha thavha ya Tsioni [vhuimo hawe ha vhuhosi ṱaḓulu], í na ḓana na mahumi maṋa a makhu̗lu na makhu̗lu maṋa a vho ṅwalwaho dzina ḽawe na ḽa Khotsi-awe kha dziphanḓa dzavho.” Vhenevho vha 144 000 ndi vhafhio? Yohane nga dzawe u a ri vhudza: “Ndi vhone vha tevhelaho Ngwana henefho huné ya ya. Havha ndi vho rengululwaho kha vhathu uri vha vhe zwiranzhe zwa Mudzimu na zwa Ngwana.” (Ndzumbululo 14:1, 4) Ee, ndi vhatevheli vha fulufhedzeaho vha Yesu Kristo vhe zwihuluhulu vha khethwa u itela u vhusa nae ṱaḓulu. Musi vho no vuselwa u tshila ṱaḓulu, “vha ḓo vhusa fhano shangoni” na Yesu. (Ndzumbululo 5:10) U bva misini ya vhaapostola, Mudzimu o vha a tshi khou ḓikhetha Vhakriste vha fulufhedzeaho u itela uri vha ṱhaphudze tshenetsho tshivhalo tsha 144 000.

10. Ndi ngani i ndugiselelo ya lufuno uri Yesu na vhathu vha 144 000 vha vhuse vhathu?

¹⁰ Ndi ndugiselelo ya lufuno u dzudzanya uri Yesu na vha 144 000 vha vhuse vhathu. Hafhu Yesu u a ḓivha nḓila ine zwa vha ngayo u vha muthu wa ṋama na u shengela. Paulo o  amba uri Yesu “u ri pfela vhuṱungu ri tshi shaya nungo; o lingwa kha zwoṱhe a nga vho-riṋe, hone o vha a si na zwivhi.” (Vha-Heberu 4:15; 5:8) Na vhane vha ḓo vhusa nae vho shengela nahone vha konḓelela musi vha tshee vhathu vha ṋama. Zwiṅwe hafhu, vho lwisana na u sa fhelela nahone vha konḓelela malwadze a mifuda yoṱhe. I ngoho, vha ḓo pfesesa vhuleme vhune vhathu vha sedzana naho!

11. Ndi ngani Yesu o amba uri vhafunziwa vhawe vha fanela u rabelela uri zwi funwaho nga Mudzimu zwi itwe ngei ṱaḓulu?

¹¹ Musi Yesu a tshi amba uri vhafunziwa vhawe vha fanela u rabelela Muvhuso wa Mudzimu uri u ḓe, o dovha a amba uri vha fanela u rabelela uri zwi funwaho nga Mudzimu zwi itwe “fhano fhasi vhunga zwi tshi itwa ngei ṱaḓulu.” Mudzimu u ṱaḓulu, nahone zwine a zwi funa zwo vha zwi tshi khou ḓi itwa henengei nga vharuṅwa vha fulufhedzeaho. Naho zwo ralo, kha Ndima ya 3 ya yeneyi bugu, ro zwi guda uri muruṅwa muvhi o litsha u ita zwi funwaho nga Mudzimu nahone a ita uri Adamu na Eva vha ite tshivhi. Kha Ndima ya 10, ri ḓo guda zwo engedzeaho nga ha zwine Bivhili ya zwi funza malugana na onoyo muruṅwa muvhi, ane a vhidzwa Sathane Diabolo. Sathane na zwivhumbiwa zwa muya zwa vharuṅwa zwe zwa khetha u mu tevhela—zwine zwa vhidzwa madimoni—vho tendelwa uri vha dzule ṱaḓulu lwa tshifhinganyana. Nga zwenezwo, a si vhoṱhe vhe vha vha vhe ṱaḓulu vhe nga tshenetsho tshifhinga vha vha vha tshi ita zwi funwaho nga Mudzimu. Zwenezwo zwo shanduka musi Yesu a tshi thoma u vhusa. Yesu Kristo, Khosi ye ya vha i tshi kha ḓi tou bva u vhewa, o lwa na Sathane.—Ndzumbululo 12:7-9.

12. Ndi zwifhio zwiitea zwivhili zwa ndeme zwe zwa ṱaluswa kha Ndzumbululo 12:10?

¹² Maipfi a tevhelaho a vhuporofita a ṱalusa zwe zwa vha zwi tshi ḓo itea: “Nda pfa ipfi ḽihulu ngei ṱaḓulu ḽi tshi ri: Zwino vhutshidzi na maanḓa na vhuhosi ha Mudzimu washu zwo bvelela na nungo dza Muḓodzwa wawe, ngauri mufheṱi wa  vharathu vhashu [Sathane] we a vha a tshi dzula a tshi vha fheṱa Mudzimuni masiari na vhusiku, o pandelwa.” (Ndzumbululo 12:10) Naa no zwi ṱhogomela zwiitea zwivhili zwa ndeme vhukuma zwe zwa ṱaluswa kha yeneyo ndimana ya Bivhili? Tsha u thoma, Muvhuso wa Mudzimu nga fhasi ha Yesu Kristo u thoma u vhusa. Tsha vhuvhili, Sathane u pandelwa ṱaḓulu a poswa kha ḽifhasi.

13. Ho bvelela mini musi Sathane a tshi pandelwa ṱaḓulu?

¹³ Zwenezwo zwiitea zwivhili zwo bveledza mini? Malugana na zwe zwa itea ṱaḓulu, ri a vhala: “Ndi zwone, takalani-ha inwi maṱaḓulu na vho dzulaho hone!” (Ndzumbululo 12:12) Ee, vharuṅwa vha fulufhedzeaho ngei ṱaḓulu vha a takala nga ṅwambo wa uri Sathane na madimoni awe vho pandelwa, muṅwe na muṅwe a re ṱaḓulu u a fulufhedzea kha Yehova Mudzimu. Hu na mulalo wo fhelelaho, wa tshoṱhe na pfano henengei. Zwi funwaho nga Mudzimu zwi khou itwa ṱaḓulu.

14. Ho itea mini nga ṅwambo wa uri Sathane o poswa kha ḽifhasi?

¹⁴ Naho zwo ralo, hu pfi mini nga ḽifhasi? Bivhili i ri: “Yawee! [Khombo, NW] ḽifhasi na lwanzhe! Ngauri Diabolo o tsela henengeo ha vho inwi e na mbiti khulu, a tshi zwi ḓivha zwauri o salelwa nga tshifhinga tshiṱuku.” (Ndzumbululo 12:12) Sathane o sinyuwa nga ṅwambo wa uri o pandelwa ṱaḓulu nahone o salelwa nga tshifhinga tshiṱuku. U bveledza tshengelo kana “khombo” kha ḽifhasi nga ṅwambo wa uri o sinyuwa. Ri ḓo guda zwo engedzeaho nga ha yeneyo “khombo” kha ndima dzi tevhelaho. Fhedzi ri na zwenezwo muhumbuloni, ri nga vhudzisa, Muvhuso u nga ita hani zwi funwaho nga Mudzimu kha ḽifhasi?

15. Ndi mini zwine Mudzimu a ṱoḓa u zwi ita nga ḽifhasi?

¹⁵ Ni songo hangwa zwine Mudzimu a ṱoḓa u zwi ita nga ḽifhasi. No zwi guda kha Ndima ya 3. Ngei Edeni, Mudzimu o sumbedza uri u funa ḽino ḽifhasi ḽi tshi ḓala nga vhathu vho lugaho, vhane vha sa ḓo fa. Sathane o ita uri Adamu na Eva vha fe, nahone zwenezwo zwo kwama zwine zwa funwa nga Mudzimu nga ha ḽifhasi, fhedzi a zwo ngo zwi shandula. Yehova u  tshee o livha uri “vhaṋe vha shango ndi vhavhuya, ndi vhone vha u ḓo dzula khaḽo’ lini na lini.” (Psalme ya 37:29) Nahone Muvhuso wa Mudzimu u ḓo khunyeledza zwenezwo. Nga nḓila-ḓe?

16, 17. Daniele 2:44 i ri vhudza mini nga ha Muvhuso wa Mudzimu?

¹⁶ Ṱhogomelani vhuporofita vhu wanalaho kha Daniele 2:44. Henefho ri a vhala: “Hone, misi ya eneo mahosi, ndi hone Mudzimu wa ṱaḓulu a tshi ḓo vusa muvhuso une wa sa ḓo tshinyala lini na lini, une vhuhosi hawo ha sa ḓo wetshela kha luṅwe lushaka. Wonoyo u ḓo pwashakanya mivhuso yoṱhe wa i lozwa; wone uṋe wa ima lini na lini.” Zwenezwi zwi ri vhudza mini nga ha Muvhuso wa Mudzimu?

¹⁷ Tsha u thoma, zwi ri vhudza uri Muvhuso wa Mudzimu wo vha u tshi ḓo tikwa “misi ya eneo mahosi,” kana musi miṅwe mivhuso i tshi kha ḓi vhusa. Tsha vhuvhili, zwi ri vhudza uri Muvhuso u ḓo vha wa tshoṱhe. A u nga kundwi nahone wa dzhielwa vhudzulo nga muṅwe muvhuso. Tsha vhuraru, ri a zwi vhona uri hu ḓo vha na nndwa vhukati ha Muvhuso wa Mudzimu na mivhuso ya ḽino shango. Muvhuso wa Mudzimu u ḓo kunda. Mafheleloni, vhathu vha ḓo vhuswa nga muvhuso muthihi fhedzi. Nga zwenezwo, vhathu vha ḓo ḓiphina nga vhuvhusi ha khwine u fhira yoṱhe.

18. I pfi mini nndwa ya u fhedza vhukati ha Muvhuso wa Mudzimu na hulumeni dza ḽino shango?

¹⁸ Bivhili i amba zwinzhi nga ha nndwa ya u fhedza vhukati ha Muvhuso wa Mudzimu na hulumeni dza ḽino shango. Sa tsumbo, i amba uri musi vhufhelo vhu tshi khou sendela, zwivhumbiwa zwivhi zwa muya zwi ḓo phaḓaladza mazwifhi u itela u fhura “mahosi a ḽifhasi ḽoṱhe.” Nga ndivho ifhio? “U yo vha ramba [mahosi], uri vha ḓe nndwani ya ḽone ḓuvha ḽihulu ḽa Mudzimu, Mu-vhusa-hoṱhe.” Mahosi a shango a ḓo kuvhanganywa “fhethu huné nga Tshi-Heberu ha pfi: Haramagedo.” (Ndzumbululo 16:14, 16) Nga ṅwambo wa zwine zwa khou ambiwa kha dzenedzo ndimana mbili, nndwa ya u fhedza vhukati ha hulumeni dza vhathu na Muvhuso wa Mudzimu i vhidzwa nndwa ya Haramagedo.

19, 20. Ndi mini zwine zwa ita uri zwi funwaho nga Mudzimu zwi sa itwe kha ḽifhasi zwa zwino?

 ¹⁹ Muvhuso wa Mudzimu u ḓo khunyeledza mini nga Haramagedo? Dovhani ni humbule nga ha zwine Mudzimu a zwi funa nga ha ḽifhasi. Yehova Mudzimu o livha uri ḽifhasi ḽi ḓale nga vhathu vho lugaho, vho fhelelaho vhane vha mu shumela vhe Paradisoni. Ndi mini zwine zwa ita uri zwenezwo zwi sa konadzee zwa zwino? Tsha u thoma, ri na tshivhi, nahone ri a lwala ra fheleledza nga u fa. Naho zwo ralo, ro zwi guda kha Ndima ya 5 uri Yesu o ri fela u itela uri ri tshile tshoṱhe. Zwi vhonala uri ni a humbula maipfi o ṅwalwaho kha Evangeli ya Yohane, ane a ri: “Mudzimu o funa shango zwingafha-ngafha, a vhuya a ṋekedza Murwa wawe mu-bebwa-eṱhe, uri vhoṱhe vha mu tendaho, vha si lovhe, tshavho hu vhe u tshila tshoṱhe.”—Yohane 3:16.

²⁰ Vhuṅwe vhuleme ndi uri vhathu vhanzhi vha ita zwithu zwivhi. Vha a zwifha, vha a fhura, nahone vha ḓifara luvhi. A vha ṱoḓi u ita zwi funwaho nga Mudzimu. Vhathu vhane vha ita zwithu zwivhi vha ḓo fheliswa nga nndwa ya Mudzimu ya Haramagedo. (Psalme ya 37:10) Tshiṅwe tshiitisi tshine tsha ita uri zwi funwaho nga Mudzimu zwi sa itwe kha ḽifhasi ndi uri mivhuso a i ṱuṱuwedzi vhathu uri vha zwi ite. Mivhuso minzhi a i na maanḓa, i na tshiṱuhu, kana a i fulufhedzei. Bivhili i amba nga ho livhaho uri: ‘Muthu a tshi vhusa muthu muṅwe u a mu tshinya.’—Muhuweleli 8:9.

21. Muvhuso u ḓo zwi itisa hani u ita uri zwine zwa funwa nga Mudzimu zwi itwe kha ḽifhasi?

²¹ Nga murahu ha Haramagedo, vhathu vha ḓo vha vhe nga fhasi ha hulumeni muthihi, Muvhuso wa Mudzimu. Wonoyo Muvhuso u ḓo ita zwi funwaho nga Mudzimu nahone u ḓo ḓisa phaṱutshedzo dzi mangadzaho. Sa tsumbo, u ḓo fhelisa Sathane na madimoni awe. (Ndzumbululo 20:1-3) Hu ḓo shumiswa maanḓa a tshiṱhavhelo tsha Yesu u itela uri vhathu vha fulufhedzeaho vha si tsha dovha vha lwala nahone vha fa. Nṱhani hazwo, vha ḓo tshila tshoṱhe nga fhasi ha wonoyo Muvhuso. (Ndzumbululo 22:1-3) Ḽifhasi ḽi ḓo itwa paradiso. Nga  zwenezwo Muvhuso u ḓo ita uri hu itwe zwi funwaho nga Mudzimu kha ḽifhasi, nahone u ḓo khetha dzina ḽa Mudzimu. Zwenezwi zwi amba mini? Zwi amba uri musi hu tshi vho vhusa Muvhuso wa Mudzimu muṅwe na muṅwe ane a ḓo vha a tshi khou tshila u ḓo fheleledza a tshi vho hulisa dzina ḽa Yehova.

22. Ndi ngani ri tshi zwi ḓivha uri Muvhuso wa Mudzimu a wo ngo ḓa musi Yesu e kha ḽifhasi kana musi a tshi kha ḓi tou bva u vuswa vhafuni?

²² Musi Yesu a tshi vhudza vhatevheli vhawe uri vha rabele vha ri, “Muvhuso wau u ḓe,” zwo vha zwi khagala uri Muvhuso wo vha u sa athu ḓa nga tshenetsho tshifhinga. Naa wo ḓa musi Yesu a tshi gonya ṱaḓulu? Hai, ngauri Petro na Paulo vho amba uri musi Yesu o no vuswa vhafuni, vhuporofita vhu re kha Psalme ya 110:1 ho ḓadzea khae: “U amba ha Yehova a tshi redza Murena wanga: Dzula thungo ya tshanḓa tsha u ḽa tshanga, ndi vhuye ndi ite maswina au vhukando ha milenzhe yau.” (Mishumo 2:32-34; Vha-Heberu 10:12, 13) Ho vha na tshifhinga tsha u lindela.

23. (a) Muvhuso wa Mudzimu wo thoma lini u vhusa? (b) Hu ḓo haseledzwa mini kha ndima i tevhelaho?

²³ U lindela tshifhinga tshingafhani? Ḓanani ḽa vhu-19 ḽa miṅwaha vhagudiswa vha Bivhili vho vhalela uri tshifhinga tsha u lindela tsho vha tshi tshi ḓo fhela nga 1914. (Malugana na ḽeneḽi ḓuvha, sedzani Ṱhumetshedzo, masiaṱari 215-18.) Zwiitea zwa shango zwe zwa thoma nga 1914 zwi khwaṱhisedza  uri vhagudiswa vha fulufhedzeaho vha Bivhili vho vha vho vhalela zwone. U ḓadzea ha vhuporofita ha Bivhili zwi sumbedza uri nga 1914, Kristo o vha Khosi nahone Muvhuso wa Mudzimu wa ṱaḓulu wo thoma u vhusa. Nga zwenezwo, ri khou tshila kha “tshifhinga tshiṱuku” tshe tsha salela Sathane. (Ndzumbululo 12:12; Psalme ya 110:2) Ri nga dovha ra amba nga ho khwaṱhaho uri hu si kale, Muvhuso wa Mudzimu u ḓo dzhia vhukando u itela uri zwi funwaho nga Mudzimu zwi itwe kha ḽifhasi. Naa zwi a ni takadza u pfa zwenezwi? Naa ni a zwi tenda? Ndima i tevhelaho i ḓo ni thusa u vhona uri vhukuma Bivhili i a funza zwenezwi zwithu.