Zwi ṱoḓa vhuḓidini u ita vhukonani; zwi ṱoḓa vhuḓidini u dzula u na khonani. Vhuḓidini haṋu ha u vha khonani na u dzula ni khonani ya Mudzimu vhu ḓo fhaṱutshedzwa zwihulu. Yesu o amba zwi tevhelaho kha vhane vha mu tenda: “Huno mafhungo-ngoho a ḓo ni vhofholola.” (Yohane 8:32) Zwenezwo zwi amba mini?

Ni nga ḓiphina nga mbofholowo zwino. Ni ḓo vhofholowa kha pfunzo dza mazwifhi na mazwifhi o phaḓaladzwaho nga Sathane. Ni nga vha na fulufhelo ḽine vhathu vha dzimilioni vha sa ḓivhi Yehova vha sa vhe naḽo. (Vha-Roma 8:22) Khonani dza Mudzimu dzo vhofholowa na kha u “ofha lufu.”—Vha-Heberu 2:14, 15.

Ni nga ḓiphina nga mbofholowo shangoni ḽiswa ḽa Mudzimu. Ndi mbofholowo yavhuḓi lungafhani ine na ḓo ḓiphina ngayo tshifhingani tshi ḓaho! Paradisoni kha ḽifhasi, a hu tsha ḓo vha na nndwa, vhulwadze, na vhutshinyi. Mbofholowo kha vhushai na nḓala. A hu tsha ḓo vha na vhulala na lufu. A hu tsha ḓo vha na u ofha, mitsiko, na tshikhetho. Bivhili i amba zwi tevhelaho nga ha Mudzimu: “U putulula tshanḓa tshau, huno zwoṱhe zwi tshilaho U zwi fusha dakalo.”—Psalme ya 145:16.

 Khonani dza Mudzimu dzi ḓo tshila nga hu sa fheli. Vhutshilo vhu sa fheli ndi tshifhiwa tsha ndeme vhukuma tshine Mudzimu a ḓo ṋea vhoṱhe vhane vha ṱoḓa u vha khonani dzawe. (Vha-Roma 6:23) Humbulani uri vhutshilo vhu sa gumi vhu ḓo amba mini kha inwi!

Ni ḓo vha na tshifhinga tsha u ita zwithu zwinzhi. Khamusi ni ḓo ṱoḓa u guda u lidza tshilidzo tsha muzika. Kana khamusi ni ṱoḓa u guda u ola zwifanyiso kana u vha muvhaḓi. Khamusi ni ḓo ṱoḓa u guda nga ha zwipuka na zwimela. Khamusi ni ṱoḓa u enda u vhona mashango na vhathu vho fhamba-fhambanaho. Vhutshilo vhu sa fheli vhu ḓo ita uri zwenezwi zwithu zwoṱhe zwi konadzee!

Ni ḓo vha na tshifhinga tsha u vha na khonani nnzhi. U tshila tshoṱhe zwi ḓo konadzea uri ni kone u ḓivha vhanzhi vhe vha vha khonani dza Mudzimu. Ni ḓo kona u ḓivha vhutsila havho na pfaneleo dzavho dzavhuḓi, nahone vha ḓo vha khonani dzaṋu-vho. Ni ḓo vha funa, nahone vha ḓo ni funa. (1 Vha-Korinta 13:8) U vha na vhutshilo vhu sa gumi zwi ḓo ni ṋea tshifhinga tsha u vha khonani ya muṅwe na muṅwe kha ḽifhasi! Zwi fhiraho zwoṱhe, vhukonani haṋu na Yehova vhu ḓo hula ha khwaṱha musi maḓana na miṅwaha a tshi ṱanḓulukana. U nga ri ni nga vha khonani ya Mudzimu nga hu sa fheli!