Musiki washu o ṱalifha u ri fhira. U na ndavha na riṋe samusi e Khotsi ane a ri funa. Zwiṅwe hafhu, ho ngo ri sika uri ri ḓivhuse. (Yeremia 10:23) Samusi ṅwana muṱuku a tshi tea u livhiswa nga vhabebi, roṱhe ri fanela u livhiswa nga Mudzimu. (Yesaya 48:17, 18) Bivhili ndi tshifhiwa tshi bvaho ha Mudzimu ngauri ri livhiswa ngayo.​—Vhalani 2 Timotheo 3:16.

Bivhilini, Yehova u ri gudisa milayo yawe na nḓila ya khwine ya u tshila zwino. I dovha ya ri sumbedza nḓila ine ra nga wana ngayo malamba a tshoṱhe tshifhingani tshi ḓaho. Samusi ro sikwa nga Mudzimu, zwo tea uri ri ṱanganedze vhulivhisi hawe.​—Vhalani Phisalema 19:7, 11; Nzumbululo 4:11.

Naho Bivhili i si na milayo ya zwithu zwoṱhe, i nga ri funza zwine Mudzimu a ṱoḓa ri tshi zwi ita kha vhuimo ho fhamba-fhambanaho. Milayo i nga shuma kha vhuimo ho ambiwaho nga ho livhaho. (Dotoronomio 22:8) Kha vhuimo vhu songo ambiwaho nga ho livhaho, ri fanela u shumisa vhukoni hashu ha u humbula u itela u vhona nḓila ine ra nga shumisa ngayo zwe ra zwi guda Bivhilini kha honoho vhuimo. (Mirero 2:10-12) Sa tsumbo, Bivhili i funza uri vhutshilo ndi tshifhiwa tshi bvaho ha Mudzimu. Zwenezwo zwi nga ri thusa uri ri si vhee vhutshilo hashu na ha vhaṅwe khomboni musi ri mushumoni, hayani kana ri lwendoni.​—Vhalani Mishumo 17:28.

Yesu o amba nga ha zwithu zwivhili zwa ndeme vhukuma. Tsha u thoma: Ri fanela u ḓivha Mudzimu, u mu funa na u mu shumela nga u fhulufhedzea, zwenezwo zwi ḓo ita uri ri  ḓivhe uri ri khou tshilela mini. Ri tea u humbula nga ha zwenezwi musi ri tshi ita phetho dzashu dzoṱhe. (Mirero 3:6) Vhane vha tshila u tendelana na zwenezwi, vha vha khonani dza Mudzimu, vha a takala nahone vha ḓo wana vhutshilo vhu sa fheli.​—Vhalani Mateo 22:36-38.

Tsha vhuvhili: Ri fanela u funa vhaṅwe. Zwi ḓo ri thusa uri ri vhe na vhushaka havhuḓi navho. (1 Vhakorinta 13:4-7) Zwenezwi zwi katela u edzisa nḓila ine Mudzimu a fara ngayo vhathu.​—Vhalani Mateo 7:12; 22:39, 40.

Bivhili i ri funza nḓila ine lufuno lwa nga ita ngayo uri muṱani hu vhe na vhuthihi. (Vhakolosa 3:12-14) I dovha ya ri funza zwithu zwine zwa nga tsireledza miṱa. I funza uri mbingano i tea u vha ya tshoṱhe.​—Vhalani Genesi 2:24.

Musi ri tshi tevhedza zwine Bivhili ya zwi funza, zwi ḓo ri thusa musi ri mushumoni na u ita uri ri vhe na mulalo na vhaṅwe. Sa tsumbo, Bivhili i funza uri ri fanela u fhulufhedzea na u shuma nga mafulufulu, kanzhi vhatholi vha ṱoḓa vhashumi vho raloho. (Mirero 10:4, 26; Vhahevheru 13:18) Ipfi ḽa Mudzimu ḽi ri funza uri ri fushee nga zwine ra vha nazwo na u dzhia vhushaka hashu na Mudzimu vhu ha ndeme u fhira zwithu zwoṱhe.​—Vhalani Mateo 6:24, 25, 33; 1 Timotheo 6:8-10.

U shumisa zwine Bivhili ya zwi funza zwi nga tsireledza mutakalo washu. (Mirero 14:30; 22:24, 25) Sa tsumbo, u tevhela mulayo wa Mudzimu wa uri ri songo kambiwa, zwi ri tsireledza kha khombo na kha malwadze a vhulayaho. (Mirero 23:20) Yehova u a ri tendela uri ri nwe nga nḓila yo linganyiselwaho. (Phisalema 104:15; 1 Vhakorinta 6:10) Zwine Bivhili ya zwi funza zwi a ri vhuyedza ngauri zwi ri gudisa uri ri lange zwine ra zwi ita na zwine ra zwi humbula. (Phisalema 119:97-100) Fhedzi Vhakriste vha ngoho a vha tevhedzi zwine zwa funzwa nga Bivhili u itela u sokou ḓivhuyedza. Vha vha vha tshi khou zwi itela u hulisa Yehova.​—Vhalani Mateo 5:14-16.