Sathane na madimoni vho ḓi vha vhe na tshiṱuhu nahone vhe na khombo. Kale-kale Sathane o vhulaha zwifuiwa na vhaḓinḓa vha Yobo a fulufhedzeaho. A dovha a vhulaha vhana vha fumi vha Yobo nge a ita uri “ḓumbu ḽihulu” ḽi wise nnḓu ye vha vha vhe nga ngomu hayo. Nga murahu ha zwenezwo Sathane a rwa Yobo nga “mamota a ṱhoṱhonaho, a bva kha muvhili woṱhe, a guma ṋayoni a guma na kha thovuma.”​—Yobo 1:7-19; 2:7.

Misini ya Yesu, madimoni o ita uri vhaṅwe vhathu vha vhe zwimuma na mabofu. (Mateo 9:32, 33; 12:22) O shengedza muṅwe munna nahone a mu ita uri a ḓi-kanḓekanye nga matombo. (Marko 5:5) O dovha a ita uri muṅwe mutukana a tzheme, a mu undudzela fhasi, nahone a “mu khwiḓukanya.”​—Luka 9:42.

Ṋamusi, Sathane na madimoni vha khou vhulaha u fhira naho hu lini. Zwi re zwone ndi uri mushumo wavho muvhi wo engedzea u bva tshee vha pandelwa ṱaḓulu.  Mivhigo i bvaho shangoni ḽoṱhe i ṱanziela tshiṱuhu tshavho. Vha rwa vhaṅwe vhathu nga malwadze. Vhaṅwe vha vha shushedza vhusiku, vha sa vha ladzi kana vha tshi vha lorisa miloro i ofhisaho. Vhaṅwe vha a vha fara luvhi nga zwa u ṱangana nga dzimbeu. Vhaṅwe vha a vha ita uri vha penge, vha vhulahe, kana vha ḓivhulahe.

Lintina, ane a dzula Suriname, u anetshela uri dimoni, kana muya muvhi, ḽo vhulaha miraḓo ya muṱa wahawe ya 16 nahone ḽa mu shengedza ṋamani na muhumbuloni miṅwaha ya 18. U bva kha zwe a zwi tshenzhela ene muṋe u amba uri madimoni “a ḓiphina nga u shengedza vhane vha si fune u a gwadamela u swikela vha tshi fa.”

Fhedzi Yehova u a kona u tsireledza vhashumeli vhawe kha u vutshela ha Sathane.​—Mirero 18:10.