Roṱhe ri na khetho. Ri nga shumela Yehova kana ra shumela Sathane na madimoni awe. Ri nga si ite zwivhili. Ndi vhuṱali lungafhani u shumela Yehova!

Samusi ro zwi vhona, madimoni a ḓiphina nga u huvhadza na u fhura vhathu. Yehova ho ngo ralo. U funa vhathu sa khotsi a tshi funa vhana vhawe. Ndi Muṋei wa “zwifhiwa zwoṱhe zwavhuḓi na zwoṱhe, zwiné ra ṋewa zwi sí na tshiṱahe.” (Yakobo 1:17) Ha tshivheli vhathu na tshithihi tshavhuḓi, naho zwi tshi ṱoḓa uri a ite zwo engedzeaho.​—Vha-Efesa 2:4-7.

Humbulani nga ha zwithu zwe zwa itwa fhano kha ḽifhasi nga Yesu, Murwa wa Mudzimu. O ita uri zwimuma zwi ambe nahone a bonyolosa mabofu. O fhodza vha mapele na zwihole. O pandela madimoni a fhodza mifuda yoṱhe ya malwadze. Yesu, nga maanḓa a Mudzimu, o ita na u vusa vhafu vha tshila.​—Mateo 9:32-35; 15:30, 31; Luka 7:11-15.

Nṱhani ha u amba mazwifhi u itela u ri xedza, zwifhinga zwoṱhe Mudzimu u amba ngoho. Ha vhuyi a fhura naho e nnyi.​—Numeri 23:19.

U fana na musi lubuvhi lu tshi nga fasha thunzi, vhathu vha dzimilioni vho fashwa vhukuma nga u tenda zwi si zwone na mazwifhi. Vha ofha vhafu. Vha ofha madimoni. Vha vhilaedziswa nga u seṅwa, maṱula, manditi, na zwitungulo. Vho vhoxwa nga thendo na masialala zwo thewaho kha mazwifhi a Sathane Diabolo. Vhashumeli vha Mudzimu a vho ngo fashwa na nga tshithihi tsha hezwi zwithu.

Yehova u na maanḓa a fhiraho kule a Sathane. Arali ni tshi shumela Yehova, u ḓo ni tsireledza kha madimoni. (Yakobo 4:7) Vhuloi a vhu nga shumi kha inwi. Sa tsumbo, kha ḽa Nigeria, ṅanga tharu dza maanḓa dzo lingedza u lowa u itela u vhulaha Ṱhanzi ya Yehova ye ya hana u ṱuwa ḓoroboni yeneyo. Musi honoho vhuloi vhu tshi kundwa, muṅwe wa dzenedzo ṅanga a tshuwa, a ya ha yeneyo Ṱhanzi, nahone a humbela khathutshelo.

Arali madimoni a tshi ni dina, ni nga vhidza Yehova nga dzina nahone u ḓo ni tsireledza. (Mirero 18:10) Fhedzi u itela uri ni tsireledzwe nga Mudzimu, ni fanela uri ni laṱe tshoṱhe naho tshi tshini tshine tsha tshimbidzana na vhungome na u gwadamela madimoni. Vhagwadameli vha Mudzimu kha ḽa Efeso ḽa kale vho ita nga u ralo. Vho kuvhanganya bugu dzavho dzoṱhe dza manditi nahone vha dzi fhisa. (Mishumo 19:19, 20) Vhashumeli vha Mudzimu ṋamusi vha fanela u ita zwenezwo. Litshani zwa manditi, zwitungulo, miḓali “ya u ḓitsireledza,” bugu dza manditi, na naho  tshi tshini tshine tsha tshimbidzana na u shumisa mimuya.

Arali ni tshi ṱoḓa u takadza Mudzimu, a zwo ngo eḓana u sokou litsha vhurereli ha mazwifhi na u litsha u ita zwithu zwivhi. Ni fanela u shumisa nga mafulu­fulu vhurereli ho kunaho. Bivhili i sumbedza zwine zwa ṱoḓea:

Sathane na madimoni vha na vhathu kha ḽifhasi vhane vha funza na u ita zwithu zwo khakheaho. Fhedzi Yehova u na vhathu-vho. Ndi Ṱhanzi dza Yehova. (Yesaya 43:10) Ḽifhasi ḽoṱhe, hu na Ṱhanzi dzine dza fhira milioni nṋa. Vhoṱhe vha lingedza vhukuma u ita zwithu zwo lugaho na u funza vhathu mafhungo-ngoho. Mashangoni manzhi, ni nga vha wana Holoni ya Muvhuso, hune vha ḓo ni ṱanganedza nga lufuno.

Mushumo wavho ndi u thusa vhaṅwe uri vha shumele Mudzimu. Vha ḓo guda Bivhili na inwi hayani haṋu, vha tshi ni thusa u guda nḓila ya u gwadamela Yehova nga nḓila yo teaho. A zwi ṱoḓei uri ni lifhe. Ṱhanzi dzo ḓiimisela u ni gudisa mafhungo-ngoho ngauri vha funa vhathu nahone vha funa Yehova Mudzimu.