Samusi no zwi guda kha yeneyi bugwana, Bivhili i na maitele manzhi ane a nga thusa inwi na muṱa waṋu. Yehova u ṱoḓa uri ni takale. U fulufhedzisa uri arali na vhea phanḓa vhurabeli hawe, “zwiṅwe zwithu zwoṱhe ni ḓo engedzwa ngazwo.” (Mateo 6:33) U ṱoḓa ni tshi vha khonani yawe zwa vhukuma. Shumisani tshibuli tshiṅwe na tshiṅwe u itela u ṱahulela vhukonani na Mudzimu. Yeneyi ndi ndugelo khulwane ine muthu a nga vha nayo.—Mateo 22:37, 38.

ZWINE BIVHILI YA ZWI AMBA: “‘Ndi ḓo vha khotsi aṋu, inwi ni ḓo vha vharwa na vhananyana vhanga,’ Yehova . . . u ralo.” (2 Vhakorinta 6:18) Mudzimu u ṱoḓa ni tshi vha khonani yawe ya tsini. Thabelo ndi iṅwe ya nḓila dzine na nga ita zwenezwo ngayo. Yehova u ni ramba uri “ni dzule ni tshi rabela.” (1 Vhathesalonika 5:17) O ḓiimisela u pfa mihumbulo na mbilaelo dzaṋu dzoṱhe. (Vhafilipi 4:6) Musi ni tshi rabela na muṱa waṋu, vha ḓo vhona uri Mudzimu ndi wa vhukuma hani kha inwi.

Nga nnḓa ha u amba na Mudzimu, ni fanela u mu thetshelesa. Ni nga ita zwenezwi nga u vhala Ipfi ḽawe na khandiso dzo thewaho Bivhilini. (Psalme ya 1:1, 2) Elekanyani nga zwine na zwi guda. (Psalme ya 77:11, 12) U thetshelesa Mudzimu zwi dovha zwa amba uri ni fanela u ya miṱanganoni ya Vhukriste tshifhinga tshoṱhe.—Psalme ya 122:1-4.

U amba na vhaṅwe nga ha Yehova ndi iṅwe nḓila ya ndeme ya u khwaṱhisa vhushaka haṋu nae. Musi ni tshi ita zwenezwi, ndi hone ni tshi ḓo ḓipfa ni tsini-tsini nae. —Mateo 28:19, 20.

ZWINE NA NGA ZWI ITA:

• Vhetshelani thungo tshifhinga tsha u vhala Bivhili na u rabela ḓuvha ḽiṅwe na ḽiṅwe

• Sa muṱa, itani uri mishumo ya lwa muya i ḓe u thoma u fhirisa vhuḓimvumvusi na u awela

ZWINE BIVHILI YA ZWI AMBA: “Sendelani tsini ha Mudzimu, na ene u ḓo sendela tsini haṋu.” (Yakobo 4:8) Ni tea u vha na mbekanyo ya vhurabeli ha muṱa nahone ni i tevhele tshifhinga tshoṱhe. (Genesi 18:19) Fhedzi a zwi fheleli henefho. Mudzimu u tea u vha tshipiḓa tsha vhutshilo ha vhoiwe ha ḓuvha ḽiṅwe na ḽiṅwe. Khwaṱhisani vhushaka ha muṱa waṋu na Mudzimu nga u amba nga hae ‘no dzula nḓuni yaṋu, na musi no fara lwendo, musi ni tshi ya u lala na musi ni tshi vuwa.’ (Doiteronomio 6:6, 7) Zwi iteni tshipikwa tshaṋu uri ni nge Yoshua, we a ri: “A vha nṋe na vha muṱani wanga ri shumela Yehova.”—Yoshua 24:15.

ZWINE NA NGA ZWI ITA:

• Ivhani na mbekanyo ya u guda ya misi yoṱhe ine ya katela ṱhoḓea dza muraḓo muṅwe na muṅwe wa muṱa