LWA miṅwaha minzhi, Vhaisiraele vho dzula Egipita, vha tshi khou engedzea na u bvelela. Naho zwo ralo, ho mbo ḓi thoma u vhusa Farao muswa. Onoyu muvhusi o vha a sa ḓivhi Yosefa. Onoyu muvhusi wa tshiṱuhu o vha a tshi ofha uri Vhaisiraele ndi vhanzhi, o mbo ḓi thoma u vha ita dziphuli nahone a laedza uri vhana vhoṱhe vha vhatukana vhane vha kha ḓi bva u bebiwa vha poswe Mulamboni wa Nile. Fhedzi muṅwe mme a re na tshivhindi o tsireledza murwa wawe, o mu dzumba nga ngomu kha kudata ṱhangasini. Ṅwananyana wa Farao o mbo ḓi wana onoyo ṅwana, a mu ira dzina ḽa Mushe, nahone a mu alusela musanda wa Egipita.

Musi Mushe e na miṅwaha ya 40, o ḓi dzhenisa khomboni a tshi khou lamulela phuli ya Muisiraele kha mulavhelesi wa mushumo wa Muegipita. Mushe o shavhela kha ḽiṅwe shango, he a dzula sogani. Musi Mushe e na miṅwaha ya 80, Yehova o mu ruma uri a ye Egipita kha Farao uri a vhofholole vhathu vha Mudzimu.

Farao o hana nga tshipimbi. Nga zwenezwo Mudzimu a rwa Egipita nga ṱhamu dza fumi. Tshifhinga tshoṱhe musi Mushe a tshi ya kha Farao u itela u mu ṋea tshiṅwe tshibuli tsha u iledza ṱhamu ine ya ḓo tevhela, Farao o hana u ṱhogomela zwe Mushe na Yehova vha vha vha tshi khou zwi ṱoḓa. Mafheleloni, ṱhamu ya vhufumi yo vhulaha matanzhe oṱhe a ḽeneḽo shango—nga nnḓa ha matanzhe a miṱani ye ya thetshelesa Yehova nga u swaya mihangambwa yavho nga malofha a ngwana ya tshiṱhavhelo. Muruṅwa wa Mudzimu o ḓa a fhelisa matanzhe oṱhe. Nga murahu ha zwenezwo Vhaisiraele vha elelwa honoho u vhofhololwa nga nḓila i mangadzaho nga vhuṱambo ha ṅwaha muṅwe na muṅwe vhune ha vhidzwa Paseka.

Musi tanzhe ḽa Farao ḽo fa, o mbo ḓi amba na Mushe na Vhaisiraele vhoṱhe uri vha ṱuwe Egipita. Vho mbo ḓi ṱuwa henefho nga u ṱavhanya. Fhedzi Farao a ḓisola uri ndi ngani o vha tendela vha tshi ṱuwa. O mbo ḓi vha pandamedza nga mmbi na goloi dza mmbi. Vhaisiraele vha vhonala vho hanganea musi vha tshi vhona Lwanzhe Lutswuku. Yehova a mbo ḓi fhandekana Lwanzhe Lutswuku, a tendela Vhaisiraele vha tshi fhira nga ho omaho, vhukati ha mbondo dza maḓi! Musi Vhaegipita vha tshi vha pandamedza, Mudzimu a litsha maḓi a tshi vhuyelela, a kumba Farao na mmbi yawe.

Nga murahu, musi Vhaisiraele vhe Thavhani ya Sinai, Yehova o vhofha mulanga navho. A tshi shumisa Mushe sa mupfumedzanyi, Mudzimu o ṋea Isiraele milayo u itela uri i mu livhise na u mu tsireledza kha masia oṱhe a vhutshilo. Arali Isiraele a fulufhedzea na u ṱanganedza vhuvhusi ha Mudzimu, Yehova o vha a tshi ḓo vha nae nahone o vha a tshi ḓo ita uri lwonolwo lushaka lu vhe phaṱhutshedzo kha vhaṅwe.

Naho zwo ralo, vhunzhi ha Vhaisiraele vho sinyusa Mudzimu nga u sa vha na lutendo. Nga zwenezwo Yehova o ita uri wonoyo murafho u tshimbile miṅwaha ya 40 sogani. Ngauralo, Mushe o khetha Yoshua munna o lugaho u itela u sala vhuimoni hawe. Mafheleloni, Isiraele o mbo ḓi dzhena shangoni ḽe Mudzimu a dzula o ḽi fulufhedzisa Abrahamu.

—Enea mafhungo a wanala kha Ekisodo; Levitiko; Numeri; Doiteronomio; Psalme ya 136:10-15; Mishumo 7:17-36.