1, 2. Ndi zwifhio zwe muapostola Yohane a zwi bvisela khagala nga ha vhusiku ha u fhedza he vhaapostola vha vhu fhedza vha tshi khou dzedza na Yesu?

MUṄWE mukalaha o mbo ḓi mbwandamedza tsha u ṅwala kha ennge, nahone a thoma u humbula mafhungo manzhi a takadzaho. Dzina ḽawe ndi Yohane, nahone ndi ene muapostola wa Yesu Kristo we a lalama u fhira vhaṅwe. Musi e miṅwahani i ṱoḓaho u vha 100, Yohane o humbula nga ha vhusiku vhu sa hangwei—vhusiku ha u fhedza he ene na vhaapostola ngae vha vhu fhedza vha tshi khou dzedza na Yesu nga phanḓa ha lufu Lwawe. A tshi khou livhiswa nga muyamukhethwa wa Mudzimu, Yohane o kona u humbula na u ṅwala zwe zwa itea nga vhuḓalo.

² Nga honoho vhusiku, Yesu o zwi bvisela zwavhuḓi khagala uri o vha a tshi ḓo vhulahwa hu si kale. Ndi Yohane e eṱhe we a bvisela khagala tshiitisi tsha uri ndi ngani Yesu o amba uri u ḓo fa nga yeneyo nḓila i vhavhaho: “Uri shango ḽi zwi ḓivhe zwauri Khotsi ndi a mu funa, na zwauri zwe Khotsi a ndaya ndi ita zwenezwo, ndi ri: Takuwani, nḓarieni ri ṱuwe.”—Yohane 14:31.

3. Yesu o zwi sumbedza hani uri u a funa Khotsi awe?

³ “Khotsi ndi a mu funa.” U funa Khotsi zwo vha zwi zwa ndeme vhukuma kha Yesu. Ho ngo dovholola lunzhi-lunzhi eneo maipfi. Zwi re zwone ndi uri kha Yohane 14:31 ndi hone fhethu hu hoṱhe kha mafhungo a Bivhili hune ra wana Yesu a tshi khou amba uri u funa Khotsi awe nga ho livhaho. Naho zwo ralo, Yesu o tshila u tendelana na eneo maipfi. O vha a tshi zwi sumbedza ḓuvha ḽiṅwe na ḽiṅwe uri u a funa Yehova. U vha ha Yesu na tshivhindi, u thetshelesa hawe, na u konḓelela hawe, zwoṱhe zwo vha zwi vhuṱanzi ha u funa Mudzimu. Vhuḓinḓa hawe hoṱhe ho ṱuṱuwedzwa nga lwonolu lufuno.

4, 5. Bivhili i ṱuṱuwedza lufuno lwa mufuda-ḓe, nahone hu nga ambiwa mini nga ha nḓila ye Yesu a vha a tshi funa ngayo Yehova?

⁴ Ṋamusi, vhaṅwe vha nga humbula uri vhathu vhane vha  sumbedza lufuno vha na vhushayanungo. Vha nga humbula nga ha zwirendo na nyimbo dza lufuno, khamusi na nga ha u nyanyulea hune nga zwiṅwe zwifhinga ha tshimbidzana na lufuno lwa vhukati ha munna na musadzi. Bivhili i a haseledza nga ha lufuno lwa vhukati ha munna na musadzi, nahone nga nḓila i re na tshirunzi u fhira yo ḓoweleaho ṋamusi. (Mirero 5:15-21) Naho zwo ralo, Ipfi ḽa Mudzimu ḽo haseledza nga maanḓa nga lufuno lwa muṅwe mufuda. Wonoyu mufuda wa lufuno a si une wa sokou vha wa u swa nga lufuno kana u vha na maḓipfele ane a vha a tshifhinganyana, kana maitele o ḓoweleaho a u tshilisana na vhathu. Lu katela mbilu na muhumbulo. Lwonolwo lufuno lu bva nga ngomu-ngomu mbiluni, lu langiwa na u tendelana na maitele a nṱha, nahone lu sumbedzwa nga nyito yavhuḓi. A si lufuno lwa muhoyo. Ipfi ḽa Mudzimu ḽi ri: “Lufuno na lini na lini a lu lovhi.”—1 Vha-Korinta 13:8.

⁵ Kha vhathu vhoṱhe vhe vha vhuya vha tshila, Yesu o vha e ene we a vha a tshi funa nga maanḓa Yehova. A hu na muthu we a vha a tshi fhira Yesu nga u tshila u tendelana na maipfi e a a amba sa mulayo muhulwane kha milayo ya Mudzimu a ri: “U fune Murena Mudzimu wau nga mbilu yau yoṱhe, na nga muya wau woṱhe, na nga u ṱalukanya hau hoṱhe, na nga maanḓa au oṱhe.” (Marko 12:30) Yesu o ṱahulela hani lwonolwo lufuno? O zwi itisa hani uri u funa hawe Mudzimu hu dzule ho khwaṱha musi e kha ḽifhasi? Nahone ri nga mu edzisa hani?

6, 7. Ri zwi ḓivha hani uri Mirero 8:22-31 i ṱalusa Murwa wa Mudzimu, hu si pfaneleo zwayo ya vhuṱali?

⁶ Naa no no vhuya na shuma muṅwe mushumo na khonani yaṋu nahone na wana uri vhushaka ha vhoiwe vhu khou bvela phanḓa vhu tshi khwaṱha nga ṅwambo wa zwenezwo? Yeneyo tshenzhelo yavhuḓi i nga ni thusa u pfesesa lufuno lwe lwa vha hone vhukati ha Yehova na Murwa wawe mubebwa e eṱhe. Ro no amba lunzhi-lunzhi nga ha Mirero 8:30, fhedzi kha ri ṱolisise nga vhuronwane vhubvo ha yeneyo ndimana. Kha ndimana 22 u ya kha 31, ri wana ṱhaluso yo hevhedzwaho ya vhuṱali ho fanyiswaho  na muthu. Ri zwi ḓivha hani uri enea maipfi a ambela kha Murwa wa Mudzimu?

⁷ Kha ndimana 22, vhuṱali vhu ri: “Yehova o vha e na nṋe a tshi ranga nḓila dzawe; ndi wa zwiḽa hú sathu u vha na zwe a vhumba.” Hafha hu nga vha hu tshi khou ambiwa zwiṅwe nga nnḓa ha vhuṱali, ngauri vhuṱali a ho ngo tou bveledzwa. A vhu na mathomo ngauri tshifhinga tshoṱhe Yehova u dzula e hone nahone u dzula o ṱalifha tshifhinga tshoṱhe. (Psalme ya 90:2) Naho zwo ralo, Murwa wa Mudzimu o vhe e “tanzhe ḽa zwivhumbwa zwoṱhe.” O tou bveledzwa, kana u sikwa; ndi ene wa u thoma kha zwoṱhe zwe Yehova a zwi vhumba. (Vha-Kolosa 1:15) Murwa o vha e hone musi hu sa athu vha na ḽifhasi na maṱaḓulu, samusi zwo ṱaluswa kha Mirero. Nahone samusi o vha e Ipfi, Muambeli wa Mudzimu, o vha a tshi sumbedza nga ho fhelelaho vhuṱali ha Yehova.—Yohane 1:1.

8. Murwa o vha o farakanea nga mini tshifhingani tsha musi a sa athu ḓa kha ḽifhasi, nahone ri nga humbula nga ha mini musi ri tshi takadzwa nga tsiko?

⁸ Murwa o vha a tshi khou ita mini tshifhingani tshilapfu tshe a tshi fhedza musi a sa athu ḓa kha ḽifhasi? Ndimana 30 i ri vhudza uri o vha e na Mudzimu sa “muḓinḓa wawe.” Zwenezwo zwi amba mini? Vha-Kolosa 1:16 i a ṱalutshedza: “Zwithu zwoṱhe zwi tshi sikiwa, ndi nga ene, hu’ zwa ṱaḓulu na zwa kha ḽifhasi, . . . zwoṱhe zwo sikiwa nga ene, zwo sikelwa ene.” Ngauralo Yehova, Musiki, o shumisa Murwa wawe, Muḓinḓa, u itela uri zwiṅwe zwivhumbwa zwoṱhe zwi vhe hone—u bva kha zwivhumbiwa zwa muya zwi re ngei ṱaḓulu na dzipulanete, ḽifhasi na zwimela na zwipuka zwi mangadzaho zwo fhamba-fhambanaho, u ya kha zwivhumbiwa zwihulwane kha ḽifhasi: vhathu. Ngauralo, ri nga vhambedza honohu u shumisana vhukati ha Khotsi na Murwa na muoli wa dzipulane ane a shuma na mufhaṱi, ane a fhaṱa tshifhaṱo nga nḓila ye muoli wa pulane a ola ngaho. Musi ri tshi mangadzwa nga ḽiṅwe sia ḽa tsiko, vhukuma ri vha ri tshi khou renda Muoli Muhulwane. (Psalme ya 19:1) Naho zwo ralo, ri nga humbula nga ha u shumisana ha tshifhinga tshilapfu na hu takadzaho vhukati ha Musiki na “muḓinḓa” wawe.

9, 10. (a) Ndi mini zwe zwa khwaṱhisa vhushaka vhukati ha Yehova na Murwa wawe? (b) Ndi mini zwine zwa nga khwaṱhisa mbofho yaṋu na Khotsi aṋu wa ṱaḓulu?

 ⁹ Musi vhathu vhavhili vha songo fhelelaho vha tshi shuma vhoṱhe tsini na tsini, nga zwiṅwe zwifhinga vha a vha na vhuleme ha u sa pfana. Zwenezwo zwo vha zwi songo ralo nga ha Yehova na Murwa wawe! Murwa o shuma tshifhinga tshilapfu na Khotsi awe nahone o ‘vha o takala phanḓa hawe misi yoṱhe.’ (Mirero 8:30, maḽeḓeretsendama ndi ashu) Ee, o vha a tshi takalela u vha na Khotsi awe, nahone vho vha vhe na maḓipfele a fanaho. Zwi tou vha khagala uri Murwa o vha a tshi fana vhukuma na Khotsi awe, nahone o guda u edzisa pfaneleo dza Mudzimu. Ndi ngazwo ho vha hu na vhushaka ho khwaṱhaho vhukati ha Khotsi na Murwa! Zwo tea u amba uri vhushaka havho ndi ha kale vhukuma nahone ho khwaṱha vhukuma u fhira naho vhu vhufhio vhu re hone fhethu hoṱhe.

¹⁰ Naho zwo ralo, zwenezwo zwi amba mini kha riṋe? Ni nga ḓipfa uri ni nga si kone u ṱahulela vhushaka ho raloho na Yehova. Vhukuma, a huna na muthihi kha riṋe a re na vhuimo ha nṱha vhu fanaho na ha Murwa. Naho zwo ralo, ri na tshibuli tshi swayeaho. Humbulani uri Yesu o vha na vhushaka vhuhulwane na Khotsi awe nga u shuma Nae. Yehova u ri ṋea nga lufuno tshibuli tsha u vha “vhashumisani” vhawe. (1 Vha-Korinta 3:9) Musi ri tshi tevhela tsumbo ya Yesu vhuḓinḓani, ri fanela u humbula tshifhinga tshoṱhe uri ri vhashumisani na Mudzimu. Nga u ita nga ralo, mbofho ya lufuno ine ya ita uri ri vhe vhathihi na Yehova i a khwaṱha vhukuma. U vha mushumisani na Mudzimu ndi ndugelo khulwane vhukuma.

11-13. (a) Ndi ngani zwi tshi thusa u humbula nga ha lufuno sa tshithu tshi tshilaho, nahone Yesu we a vha a tshi kha ḓi vha muṱuku o ita uri lufuno lwawe kha Yehova lu dzule lwo khwaṱha nga nḓila-ḓe? (b) Murwa wa Mudzimu o sumbedza hani dzangalelo ḽawe ḽa u guda kha Yehova musi a sa athu ḓa kha ḽifhasi, na musi o no vha muthu wa ṋama?

¹¹ Zwi a thusa u humbula nga ha lufuno lu re mbiluni dzashu sa tshithu tshine tsha tshila. U fana na luvha ḽo nakaho, lufuno lu  ṱoḓa u ṱahulelwa na u ṱhogomelwa uri lu aluwe. Arali lwa litshelelwa, nahone lu sa ṱahulelwe, lu a fhungudzea nahone lwa fa. Yesu o vha a tshi dzhiela nṱha nḓila ye a vha a tshi funa ngayo Yehova. O ita uri lufuno lu dzule lwo khwaṱha nahone lu luhulwane musi a tshi kha ḓi vha kha ḽifhasi. Kha ri vhone uri nga nḓila-ḓe?

¹² Dovhani ni humbule nga ha tshiitea tsha Yesu we a vha a tshi kha ḓi vha muṱuku musi a tshi amba thembeleni ngei Yerusalema. Humbulani maipfi e a a vhudza vhabebi vhawe vhe vha vha vha tshi khou vhilaela: “Naa no nṱoḓela’ni? A ni zwi ḓivhi zwauri ndi fanela u vha nḓuni ya khotsi-anga naa?” (Luka 2:49, vhambedzani NW.) Samusi o vha a tshi kha ḓi vha mutukana, zwi khagala uri Yesu o vha a sa humbuli tshithu nga ha vhutshilo hawe a sa athu ḓa kha ḽifhasi. Naho zwo ralo, o vha a tshi funa vhukuma Khotsi awe, Yehova. O vha a tshi zwi ḓivha uri lufuno lwo raloho lwo vha lu tshi sumbedzwa vhurabelini. Ngauralo ho vha hu si na huṅwe fhethu kha ḽifhasi he ha vha hu tshi takadza Yesu u fana na u vha nḓuni ya Khotsi awe ya vhurabeli ho kunaho. O vha a tshi takalela u vha henefho nahone o vha a sa ṱoḓi u ṱuwa henefho. Zwiṅwe hafhu, o vha a sa sokou dzula a puta zwanḓa. O vha o ḓiimisela u guda nga ha Yehova na u amba zwine a zwi ḓivha. Eneo maḓipfele ho ngo thoma musi e na miṅwaha ya 12, kana u fhela kha yeneyo miṅwaha.

¹³ Musi a sa athu ḓa kha ḽifhasi, Murwa o vha a tshi fhisetshela u guda kha Khotsi awe. Vhuporofita ho ṅwaliwaho kha Yesaya 50:4-6 vhu amba uri Yehova o gudisa Murwa wawe pfunzo yo khetheaho malugana na mushumo wawe sa Messia. Naho yeneyo pfunzo yo vha i tshi katela u guda nga ha vhuṅwe vhuleme he a vha a tshi ḓo ṱangana naho musi e Muḓodzwa wa Yehova, Murwa o guda nga u fhisea. Nga murahu, musi Yesu o no ḓa kha ḽifhasi nahone o no vha mualuwa, o dzula a tshi fhisetshela u ya nḓuni ya Khotsi awe na u ṱanganela kha vhurabeli na kha pfunzo ye Yehova a vha a tshi ṱoḓa uri i ṋekedzwe henefho. Nga zwenezwo, Bivhili i vhiga uri Yesu o vha a tshi ya thembeleni na tshikoloni misi yoṱhe. (Luke 4:16; 19:47, vhambedzani NW.) Arali ri tshi ṱoḓa uri lufuno lwashu kha Yehova lu dzule lu tshi tshila na u engedzea, ri fanela u fhisetshela u vha hone miṱanganoni ya Vhukriste, hune ra gwadamela hone Yehova na u engedza nḓivho yashu na u mu livhuha.

14, 15. (a) Ndi ngani Yesu o ṱoḓa u vha e eṱhe? (b) Thabelo dza Yesu kha Khotsi awe dzo dzumbulula vhushaka ha tsini-tsini na u ṱhonifha nga nḓila-ḓe?

 ¹⁴ Yesu o dovha a khwaṱhisa lufuno lwawe kha Yehova nga u rabela tshifhinga tshoṱhe. Naho o vha e muthu we a vha e na vhukonani, zwi a swayea u ṱhogomela uri o vha a tshi dzhiela nṱha u vha e eṱhe. Sa tsumbo, Luka 5:16 i ri: “Ene a tsiruwa a ya masogani a yo rabela.” Nga hu fanaho, Mateo 14:23 i ri: “O onesana na mavhuthu, a gonya thavha é eṱhe a tshi yo rabela; ḽa kovhela é henefho é eṱhe.” Yesu o vha a tshi ṱoḓa u vha e eṱhe kha zwenezwo zwiitea na zwiṅwe, hu si nga ṅwambo wa uri o vha e tshilendele kana a sa ṱoḓi u tshilisana na vhaṅwe, fhedzi ngauri o vha a tshi ṱoḓa u vha e eṱhe na Yehova, u amba na Khotsi awe nga thabelo o vhofholowa.

¹⁵ Musi a tshi rabela, Yesu nga zwiṅwe zwifhinga o vha a tshi shumisa mubulo une wa ri “Aba, Khotsi.” (Marko 14:36, vhambedzani NW.) Misini ya Yesu, “Aba” ḽo vha ḽi ipfi ḽine ḽa amba uri “khotsi,” ipfi ḽe ḽa vha ḽi tshi shumiswa muṱani. Kanzhi ḽo vha ḽi ḽiṅwe ḽa maipfi a u thoma e ṅwana a vha a tshi a guda. Naho zwo ralo, ho vha hu u ṱhonifha. Naho ḽeneḽo ipfi ḽo dzumbulula vhushaka ha tsini-tsini ha Murwa a tshi khou amba na Khotsi awe a funwaho, ḽi dovha ḽa sumbedza u ṱhonifha nga ho dzikaho maanḓa ane Yehova a vha nao sa khotsi. Ri wana honoho vhushaka ha tsini-tsini vhu tshi tshimbidzana na u ṱhonifha kha thabelo yoṱhe yo ṅwaliwaho ya Yesu. Sa tsumbo, kha Yohane ndima ya 17, muapostola Yohane o ṅwala thabelo ndapfu i bvaho mbiluni ye Yesu a i rabela vhusikuni Hawe ha u fhedza. Zwi a ṱuṱuwedza vhukuma kha riṋe u guda yeneyo thabelo nahone ndi zwa ndeme uri ri i edzise—hu si nga u tou dovholola maipfi a Yesu, fhedzi nga u wana nḓila dza u amba zwi tshi bva mbiluni na Khotsi ashu wa ṱaḓulu lunzhi-lunzhi nga hune ra nga kona ngaho. U ita nga u ralo zwi ḓo ita uri lufuno lwashu khae lu dzule lu tshi tshila nahone lwo khwaṱha.

16, 17. (a) Yesu o sumbedza u funa Khotsi awe nga zwe a zwi amba nga nḓila-ḓe? (b) Yesu o sumbedza mafunda a Khotsi awe nga nḓila-ḓe?

¹⁶ Samusi ro no zwi ṱhogomela mathomoni, Yesu ho ngo amba  lunzhi-lunzhi maipfi ane a ri “Khotsi ndi a mu funa.” Naho zwo ralo, zwifhinga zwinzhi o vha a tshi sumbedza uri u funa Khotsi awe nga zwe a zwi amba. Nga nḓila-ḓe? Yesu ene muṋe o ri: “Ndi a Ú renda, Khotsi, Muṋe wa ḽiṱaḓulu na ḽifhasi.” (Mateo 11:25, maḽeḓeretsendama ndi ashu.) Musi ri tshi guda Tshipiḓa 2 tsha ino bugu, ro zwi vhona uri Yesu o vha a tshi funa u renda Khotsi awe nga u thusa vhathu uri vha Mu ḓivhe. Sa tsumbo, o vhambedza Yehova na khotsi we a vha o ḓiimisela u hangwela murwa wawe wa ḽihwarahwara lwe a imela onoyo muṱhannga wawe o rembuluwaho u swika a tshi vhuya, lwe musi a tshi mu vhona a tshee kule, a gidima u itela u ṱangana nae nahone a mu kuvhatedza. (Luka 15:20) Ndi nnyi ane a nga vhala yeneyo ndimana a sa kwamee nga nḓila ye Yesu a sumbedza ngayo lufuno lwa Yehova na u hangwela hawe?

¹⁷ Yesu o vha a tshi anzela u renda Khotsi awe nga ṅwambo wa mafunda Awe. O shumisa tsumbo ya vhabebi vha songo fhelelaho u sumbedza nḓila ine ra nga vha na vhungoho ngayo uri Khotsi ashu u ḓo ri ṋea roṱhe muyamukhethwa une ra u ṱoḓa. (Luka 11:13) Yesu o dovha a amba nga ha fulufhelo ḽine Khotsi a ḽi ṋea nga mafunda. Yesu o ṱalusa fulufhelo ḽawe ḽe a vha o ḽi ṱulutshela ḽa u vhuyedzedzwa vhudzuloni tsini na Khotsi awe ngei ṱaḓulu. (Yohane 14:28; 17:5) O vhudza vhatevheli vhawe nga ha fulufhelo ḽe Yehova a ḽi ṋea “sambi ḽiṱuku” ḽa Kristo—ḽa u dzula ngei ṱaḓulu na u ṱanganela kha vhuvhusi ha Khosi ya Vhumessia. (Luka 12:32; Yohane 14:2) Nahone o khuthadza muitazwivhi we a vha a tshi khou fa nga u mu vhudza nga ha fulufhelo ḽa vhutshilo Paradisoni. (Luka 23:43) U amba nga mafunda mahulwane a Khotsi awe nga dzenedzi nḓila zwo thusa vhukuma Yesu u ita uri lufuno lwawe kha Yehova lu khwaṱhe. Vhunzhi ha vhatevheli vha Kristo vho wana uri a hu na tshithu tshine tsha khwaṱhisa lufuno lwavho kha Yehova kana lutendo lwavho khae u fhira u amba nga hae na nga fulufhelo ḽine a ḽi ṋea vhane vha mu funa.

18. Ndi ifhio nḓila ya ndeme vhukuma ine ra fanela u tevhela ngayo Yesu, nahone ndi ngani?

¹⁸ Kha nḓila dzoṱhe dzine ra fanela u tevhela ngadzo Yesu, a  hu na ine ya vha ya ndeme u fhira heyi: Ri fanela u funa Yehova nga mbilu yashu yoṱhe, muya washu woṱhe, ṱhalukanyo yashu, na maanḓa ashu oṱhe. (Luke 10:27) Lufuno lwo raloho a lu sokou sumbedzwa nga maḓipfele ashu fhedzi, fhedzi lu sumbedzwa na nga mishumo yashu. Yesu o vha a sa fushei fhedzi nga nḓila ye a vha a tshi ḓipfa ngayo a tshi funa Khotsi awe kana nga u sokou amba uri, “Khotsi ndi a mu funa.” O ri: “Hone uri shango ḽi zwi ḓivhe zwauri Khotsi ndi a mu funa, . . . zwe Khotsi a ndaya ndi ita zwenezwo.” (Yohane 14:31, maḽeḓeretsendama ndi ashu.) Sathane o amba uri vhathu vhoṱhe vha shumela Yehova vha tshi khou ṱuṱuwedzwa nga lufuno lwa tseḓa. (Yobo 2:4, 5) U itela u ṋea phindulo ya khwine vhukuma kha u remba luvhi ha Sathane, Yesu o dzhia vhukando nga tshivhindi nahone a sumbedza shango uri u funa lungafhani Khotsi awe. O thetshelesa u swika a tshi ṋekedza vhutshilo hawe. Naa ni ḓo tevhela Yesu? Naa ni ḓo sumbedza shango uri zwa vhukuma ni funa Yehova Mudzimu?

19, 20. (a) Ndi zwiitisi zwifhio zwa ndeme zwine zwa ita uri ri ṱoḓe u vha hone miṱanganoni ya Vhukriste tshifhinga tshoṱhe? (b) Ri fanela u dzhia hani pfunzo yashu ya muthu nga eṱhe, u elekanya, na u rabela?

¹⁹ Hu na ṱhoḓea khulwane ya muya ya uri ri sumbedze lwonolwo lufuno. Nga zwenezwo, Yehova o dzudzanya uri ri rabele nga nḓila ine u funa hashu Khotsi ashu zwa ḓo fushwa na u khwaṱhiswa ngayo. Musi ni tshi ya miṱanganoni ya Vhukriste, lingedzani u humbula uri no ya henefho u itela u gwadamela Mudzimu. Masia a honoho vhurabeli a katela u ṱanganela kha thabelo i bvaho mbiluni, u imba nyimbo dza thendo, u thetshelesa nga vhuronwane, na u ṱanganela musi zwi tshi konadzea. Yeneyo miṱangano i dovha ya ni ṋea tshibuli tsha u ṱuṱuwedza Vhakriste nga inwi. (Vha-Heberu 10:24, 25) U gwadamela Yehova tshifhinga tshoṱhe miṱanganoni ya Vhukriste zwi ḓo ni thusa u khwaṱhisa u funa haṋu Mudzimu.

²⁰ Nga hu fanaho, u funa hashu Mudzimu hu ḓo engedzea nga u vha na pfunzo ya muthu nga eṱhe, u elekanya, na u rabela. Dzhiani zwenezwi sa nḓila dza u vha na Yehova ni noṱhe. Musi ni tshi guda Ipfi ḽa Mudzimu ḽo ṅwaliwaho na u elekanya ngaḽo, Yehova u vha a tshi khou ni vhudza mihumbulo yawe. Musi ni  tshi rabela, ni vha ni tshi khou mu vhudza zwa mbiluni yaṋu. Humbulani uri thabelo i katela zwi fhiraho u sokou humbela Mudzimu uri a ri ṋee zwiṅwe zwithu. Thabelo i dovha ya vha tshibuli tsha u livhuha Yehova nga ṅwambo wa phaṱhutshedzo dze na dzi wana na u mu renda nga ṅwambo wa mishumo yawe i mangadzaho. (Psalme ya 146:1) Zwiṅwe hafhu, u renda Yehova khagala nga dakalo na nga mafulufulu ndi nḓila ya khwine ya u livhuha Yehova na u sumbedza uri ni a mu funa.

21. Ndi zwa ndeme lungafhani u funa Yehova, nahone hu ḓo haseledzwa mini kha ndima dzi tevhelaho?

²¹ Tshithu tshihulwane tshine tsha ḓo ita uri ni takale nga hu sa fheli ndi u funa Mudzimu. Adamu na Eva vho vha vho fanela u vha vho ita zwenezwo u itela uri vha bvelele—fhedzi vho kundwa u ṱahulela lwonolwo lufuno. Ndi zwa ndeme vhukuma uri ni fune Mudzimu u itela u kunda milingo yoṱhe ya lutendo, u kunda zwithu naho zwi zwifhio zwine zwa nga ri linga na u konḓelela mulingo muṅwe na muṅwe. Ndi zwa ndeme vhukuma u vha mutevheli wa Yesu. Vhukuma, u funa Mudzimu zwi tshimbidzana na u funa vhathu nga riṋe. (1 Yohane 4:20) Kha ndima dzi tevhelaho, ri ḓo ṱolisisa nḓila ye Yesu a sumbedza ngayo u funa vhathu. Kha ndima i tevhelaho, ri ḓo haseledza zwe zwa ita uri vhathu vhanzhi zwi vha lelutshele u ya kha Yesu u itela u amba nae.