NI ṄWETHUWA nga nḓila i ṱuṱuwedzaho no sedza tshiambi tshi re kha pulatifomo. Ndi wahaṋu wa tshinnani ane a kha ḓi vha muswa wa tshivhidzoni tsha vhoiwe nahone u khou ṋekedza nyambo ya u thoma kha mbekanyamushumo ya guvhangano. Musi no thetshelesa nyambo yawe, ni mangadzwa nga vhugudisi vhune vhathu vha Mudzimu vha vhu wana. Ni humbula nyambo yawe ya u tou thoma—na zwi vhambedza na zwine a vha zwone zwino! O gudiswa Tshikoloni tsha Tshumelo ya Vhuvulanḓila. Zwenezwino, ene na mufumakadzi wawe vha kha ḓi tou bva Tshikoloni tsha Vhahuweleli vha Muvhuso. Musi ni tshi khou vhanda zwanḓa nge onoyo wahashu a ṋekedza nyambo yavhuḓi, ni lavhelesa na humbula nga ha pfunzo ine vhathu vhoṱhe vha Mudzimu vha i wana.

Bivhili yo amba hu tshee nga phanḓa nga ha tshifhinga tshine vhathu vhoṱhe vha Mudzimu vha ḓo “funzwa nga Yehova.” (Yes. 54:13) Ri khou tshila kha tshenetsho tshifhinga. A ri wani yeneyi pfunzo kha khandiso dzashu fhedzi, ri i wana na nga miṱangano, maguvhangano, mabuthano na zwikolo zwo fhamba-fhambanaho zwo itelwaho u ri thusa uri ri ite mishumo yo khetheaho ndanguloni ya Yehova. Kha yeneyi khethekanyo, ri ḓo ṱhogomela nḓila ine yeneyi pfunzo ya ṋea ngayo vhuṱanzi ho khwaṱhaho ha uri Muvhuso wa Mudzimu u khou vhusa ṋamusi.