Vhuṅwe vhusiku, Nebukadanetsara o ḽora muḽoro u ofhisaho. A vhidza vhanna vhawe vha vhuṱali uri vha mu vhudze zwa uri u amba mini. A huna we a kona u ṱalutshedza zwine wa amba zwone. Mafheleloni, khosi ya amba na Daniele.

Nebukadanetsara a vhudza Daniele a ri: ‘Kha muḽoro, ndo vhona muri we wa lapfa wa swika ṱaḓulu. Wo vha u tshi vhonala naho ni ngafhi ḽifhasini. Wo vha u na maṱari avhuḓi na mitshelo minzhi. Zwivhanda zwo vha zwi tshi awela murunzini wawo, nahone zwiṋoni zwa ita zwiṱaha kha madavhi awo. Nga murahu ha tsa muruṅwa a tshi bva ṱaḓulu. A vhidzelela a ri: “Remani uyo muri, nahone ni tumule na matavhi awo. Fhedzi ni sie tshiguthe na midzi yatsho i mavuni, nahone ni tshi vhofhe nga tsimbi na khopha u mona natsho. Mbilu ya muri i ḓo shanduka i si tsha vha ya muthu fhedzi ya vha ya tshivhanda, hu vhuye hu fhele zwifhinga zwa sumbe. Vhathu vhoṱhe vha ḓo ḓivha uri Mudzimu ndi ene Muvhusi nahone a nga ṋea muvhuso ane a funa.”’

Yehova a dzumbululela Daniele zwine muḽoro wa amba zwone. Musi Daniele a tshi pfesesa wonoyo muḽoro, a tshuwa. A ri: ‘Khosi yanga, ndo vha ndi tshi tou tama arali hoyu muḽoro u vhe u tshi amba nga ha maswina avho, fhedzi wo livhiswa kha vhone. Muri muhulwane we wa remiwa ndi vhone. Vha ḓo xelelwa nga muvhuso wavho, nahone vha ḓo ḽa mahatsi masimuni u fana na zwivhanda. Fhedzi samusi muruṅwa o ri hu siiwe tshiguthe na midzi yatsho, vha ḓo dovha vha vha khosi.’

Nga murahu ha ṅwaha, Nebukadanetsara o vha a tshi khou tshimbila nṱha ha ṱhanga ya nnḓu yawe, o sedza vhuḓi ha Babele. A ri: ‘Edzani u vhona muḓi wo nakaho we nda u fhaṱa. Ndi munna vhukati ha vhanna!’ Musi a tshi kha ḓi amba, ipfi ḽi bvaho ṱaḓulu ḽa ri: ‘Nebukadanetsara! Zwino no dzhielwa muvhuso waṋu.’

Nga tshenetsho tshifhinga, Nebukadanetsara a mbo ḓi penga nahone a thoma u fana na zwivhanda. Vha mu pandela muḓini wawe nahone a yo tshila na zwivhanda masimuni. Mavhudzi a  Nebukadanetsara a lapfa vhukuma a nga mathenga a goni, nahone ṋala dzawe dza fana na dza tshiṋoni.

Nga murahu ha miṅwaha ya sumbe, Nebukadanetsara a fhola nahone Yehova a dovha a mu ita khosi ya Babele. Nga zwenezwo Nebukadanetsara a ri: ‘Ndi renda Yehova, Khosi ya Ṱaḓulu-ṱaḓulu. Zwino ndi a zwi ḓivha uri Yehova ndi Muvhusi. U ṱukufhadza vha ḓihudzaho, nahone u ṋea muvhuso ane a funa.’