Yosefa na Maria vho vha vha tshi dzula Nazareta na Yesu na vhaṅwe vhana vhavho vha vhatukana na vha vhasidzana. Yosefa o vha a tshi ṱhogomela muṱa nga u shuma sa muvhaḓi, nahone o vha a tshi vha funza nga ha Yehova na Mulayo wawe. Muṱa wo vha u tshi ya tshikoloni zwifhinga zwoṱhe u rabela na u ya Yerusalema ṅwaha muṅwe na muṅwe u itela Paseka.

Musi Yesu e na miṅwaha ya 12, muṱa wahawe nga nḓowelo wa fara lwendo lulapfu lwa u ya Yerusalema. Ḓorobo yoṱhe yo vha yo ḓala vhathu vhe vha vha vho ḓa u pembelela Paseka. Nga murahu, Yosefa na Maria vha fara lwendo lwa u ya hayani, vha tshi humbula uri Yesu u khou tshimbila na tshenetsho tshigwada. Fhedzi musi vha tshi mu ṱoḓa kha mashaka avho, vha si mu wane.

Vha humela Yerusalema, nahone vha ṱoḓa ṅwana wavho maḓuvha mararu oṱhe. Vha fheleledza vho ya thembeleni. Yesu khouḽaa, o dzula vhukati ha vhagudisi, a tshi khou thetshelesa vhukuma na u vhudzisa mbudziso dzavhuḓi. Vhagudisi vho  takadzwa nga Yesu lwe vha thoma u mu vhudzisa. Vha mangadzwa nga phindulo dzawe. Vha zwi vhona uri u a pfesesa Mulayo wa Mudzimu.

Yosefa na Maria vho vha vha tshi khou vhilaela nga maanḓa. Maria a ri: ‘Ṅwananga, ro ni ṱoḓa fhethu hoṱhe! No vha ni ngafhi?’ Yesu a ri: ‘Naa vho vha vha sa zwi ḓivhi uri ndi fanela u vha ndi fhano nḓuni ya Khotsi anga?’

Yesu a ya hayani Nazareta na vhabebi vhawe. Yosefa a funza Yesu u ita mushumo wa u vhaḓa. Ni humbula uri Yesu o vha e muthu-ḓe musi e muṱhannga? Musi Yesu a tshi khou ḓi aluwa, vhuṱali hawe ha engedzea na u funwa nga Mudzimu na nga vhathu.