Yohane, ṅwana wa mutukana wa Sakaria na Elisabetha o vha muporofita musi a tshi aluwa. Yehova o shumisa Yohane u funza vhathu uri Messia u khou ḓa. Fhedzi nṱhani ha u funza zwikoloni kana miḓini, Yohane o huwelela sogani. Vhathu vho vha vha tshi bva Yerusalema na kha ḽoṱhe ḽa Yudea u itela u ḓa u guda kha Yohane. O vha funza uri u itela u takadza Mudzimu, vha fanela u litsha u ita zwithu zwivhi. Vhathu vhanzhi vho rembuluwa musi vho no thetshelesa Yohane nahone a vha lovhedza Mulamboni wa Yorodane.

Yohane o vha a tshi tshila vhutshilo vhu leluwaho. Zwiambaro zwawe zwo vha zwo itwa nga mamvele a gamela nahone o vha a tshi ḽa nzie na mutoli wa ṋotshi dza ḓaka. Vhathu vho vha vha tshi ḓivhudzisa zwithu zwinzhi nga ha Yohane. Na Vhafarisei na Vhasadukei vha ḓikukumusaho vho ḓa u mu vhona. Yohane o vha vhudza a ri: ‘Ni fanela u shandula nḓila dza vhoiwe nahone ni rembuluwe. Ni songo humbula uri no khethea nga nṱhani ha uri ni ḓiamba uri ndi vhana vha Abrahamu. Zwenezwo a zwi ambi uri ni vhana vha Mudzimu.’

Vhathu vhanzhi vho ḓa kha Yohane nahone vha mu vhudzisa uri: ‘Ndi mini zwine ra fanela u zwi ita uri ri takadze Mudzimu?’ Yohane a vhudza Vhayuda a ri: ‘Arali ni na zwiambaro zwivhili, tshiṅwe tshi ṋeeni muthu ane a si vhe natsho.’ Ni a zwi ḓivha uri ndi ngani o amba nga u ralo? O vha a tshi ṱoḓa uri vhafunziwa vhawe vha zwi ḓivhe uri u vha fanela u funa vhathu u itela uri vha takadze Mudzimu.

Yohane o vhudza vhathelisi a ri: ‘Ni fulufhedzee nahone ni songo fhura muthu.’ O vhudza maswole a ri: ‘Ni songo ṱanganedza zwithu zwa vhufhura kana u amba mazwifhi.’

 Vhotshifhe na Vhalevi na vhone vho ḓa kha Yohane vha mu vhudzisa uri: ‘Ni nnyi? Vhathu vhoṱhe vha khou ṱoḓa u ḓivha.’ Yohane a ri: ‘Ndi huwelela sogani, ndi livhisa vhathu kha Yehova, samusi Yesaya o zwi amba hu tshee nga phanḓa.’

Vhathu vho funa zwe Yohane a vha a tshi khou vha funza zwone. Vhanzhi vho ḓivhudzisa arali Yohane e ene Messia. Fhedzi o vha vhudza a ri: ‘Hu khou ḓa ane a mphira nga maanḓa. A thi fanelei u bvula zwienda zwawe. Nṋe ndi lovhedza nga maḓi, fhedzi ene u ḓo ni lovhedza nga muya mukhethwa.’