Musi ṱholi dza Vhaisiraele dzi tshi ya muḓini wa Yeriko, dzo dzula nḓuni ya mufumakadzi ane a pfi Rahaba. Khosi ya Yeriko ya zwi pfa nahone ya rumela maswole nḓuni ya Rahaba. A dzumba ṱholi mbili kha ṱhanga ya nnḓu nahone a vhudza maswole uri vha yo dzi ṱoḓa huṅwe fhethu. O vhudza ṱholi a ri: ‘Ndi ḓo ni thusa ngauri ndi a zwi ḓivha uri Yehova u na vhoiwe na uri heḽi shango ḽi ḓo vha ḽaṋu. Ndi humbela uri ni mpfulufhedzise uri ni ḓo tshidza muṱa wahashu.’

Ṱholi dza vhudza Rahaba dza ri: ‘Ri a fulufhedzisa uri a hu na na muthihi nḓuni yaṋu ane a ḓo huvhala.’ Dza ri: ‘Vhofhelelani thambo tswuku kha fasiṱere ḽaṋu nahone muṱa wa haṋu u ḓo tshidzwa.’

Rahaba a bvisa ṱholi nga fasiṱere dzi tshi shumisa thambo. Dza ya thavhani nahone dza dzumbama henefho maḓuvha mararu dzi sa athu u vhuyelela ha Yoshua. Nga murahu Vhaisiraele vha wela Mulambo wa Yorodane nahone vha ḓilugiselela u dzhia shango. Muḓi wa u thoma we vha u dzhia ndi Yeriko. Yehova o vha vhudza uri vha mone wonoyo muḓi luthihi nga ḓuvha nahone vha zwi ite  maḓuvha a rathi. Nga ḓuvha ḽa vhusumbe, vho mona na muḓi lwa sumbe. Nga murahu vhotshifhe vha lidza phalaphala nahone maswole a ṱavha mukosi muhulu. Mbondo dza muḓi dza wa! Fhedzi nnḓu ya Rahaba, ye ya vha i kha lwonolwo luvhondo, a yo ngo wa. Rahaba na muṱa wa hawe vho tshidzwa ngauri o fulufhela Yehova.