Musi Salomo o no vha khosi ya Isiraele, Yehova a mu vhudzisa a ri: ‘Ni ṱoḓa ndi tshi ni fha mini?’ Salomo a ri: ‘Ndi tshee muṱuku, nahone a thi ḓivhi zwine nda khou ita. Ndi humbela uri u ṋee vhuṱali u ri ndi kone u ṱhogomela vhathu vhau.’ Yehova a ri: ‘Samusi no humbela vhuṱali, ndi ḓo ita uri ni vhe munna o ṱalifhesaho ḽifhasini ḽoṱhe. Ndi ḓo dovha nda ita uri ni pfume nga maanḓa. Nahone arali na nthetshelesa, ni ḓo tshila tshifhinga tshilapfu.’

Salomo a thoma u fhaṱa thembele. A shumisa musuku, siliva, matanda na matombo zwa nṱha vhukuma. Vhanna na vhafumakadzi vha zwigidi vha thusa u fhaṱa thembele. Nga murahu ha miṅwaha ya sumbe, thembele yo vha yo lugela u ṋekedzwa kha Yehova. Yo vha i na aletare, nahone ho vha hu na zwiṱhavhelo khayo. Salomo a gwadama phanḓa ha aletare nahone a rabela a ri: ‘Yawee Yehova, ino thembele yau yo hula na u naka vhukuma, fhedzi ndi humbela uri u ṱanganedze vhurabeli hashu na u thetshelesa thabelo dzashu.’ Yehova o dzhia hani thembele na thabelo ya Salomo? Nga u ṱavhanya musi Salomo a tshi fhedza u rabela, ha wa mulilo u tshi bva ṱaḓulu wa fhisa zwiṱhavhelo zwi re kha aletare. Yehova o ṱanganedza thembele. Vhaisiraele vho takala vhukuma musi vha tshi vhona zwenezwi.

Khosi Salomo o vha a tshi ḓivhelwa vhuṱali kha ḽoṱhe ḽa Isiraele na fhethu ha kule. Vhathu vho ḓa kha Salomo u itela u wana thandululo ya vhuleme havho. Na mufumakadzi wa Saba o ḓa a mu linga nga mbudziso dzi konḓaho. Musi a tshi pfa nḓila ine a fhindula ngayo, a ri: ‘A tho ngo tenda zwe vhathu vha mmbudza nga ha inwi, fhedzi zwino ndi a kona u vhona u ri no ṱalifha u fhira nḓila ye vha ni amba ngayo. Mudzimu waṋu, Yehova, o ni fhaṱutshedza.’ Vhutshilo ho vha vhu havhuḓi kha lushaka lwa Isiraele, nahone vhathu vho vha vho takala. Fhedzi zwithu zwo vha zwi tsini na u shanduka.