1, 2. Vhaisiraele vho vha vhe khomboni ifhio musi vha tshi dzhena dzinguni ḽa Sinai nga 1513 B.C.E., nahone Yehova o vha khwaṱhisedza hani?

 VHAISIRAELE vho vha vhe khomboni musi vha tshi dzhena dzinguni ḽa Sinai nga 1513 B.C.E. Vho vha vho sedzana na lwendo lu ofhisaho, u tshimbila “sogani ḽihulu ḽi ofhisaho ḽa dziḽa dziṋowa-mulilo na dziphame.” (Doiteronomio 8:15) Hafhu, vho vha vho sedzana na khombo ya u vutshelwa nga tshaka dzi re na tshiṱuhu. Ndi Yehova we a ḓisa vhathu vhawe kha vhuimo honovhu. Samusi e Mudzimu wavho, naa o vha a tshi ḓo kona u vha tsireledza?

² Maipfi a Yehova o vha a tshi khwaṱhisa vhukuma: “No zwi vhona inwi vhaṋe zwe nda ita Vha-Egipita, inwi nda ni hwala nga phapha dza goni, nda ni ḓisa fhano phanḓa hanga.” (Ekisodo 19:4) Yehova o humbudza vhathu vhawe uri o vha vhofholola kha Vhaegipita, a tshi shumisa magoni nga lwa pfanyisedzo, u itela u vha isa ho tsireledzeaho. Fhedzi hu na zwiṅwe zwiitisi zwi itaho uri “phapha dza goni” dzi fanyise nga ho teaho tsireledzo ya Mudzimu.

 3. Ndi ngani “phapha dza goni” dzi tshi fanyisa nga ho teaho tsireledzo ya Mudzimu?

³ Goni a ḽi shumisi phapha dzaḽo khulwane u itela u fhufha fhedzi, fhedzi na u ita zwiṅwe. Musi ḓuvha ḽi tshi khou fhisa vhukuma, mme wa goni u ṱharamudza phapha dzawe—dzine dza nga kha ḓi vha mithara mbili nga vhulapfu—u itela uri dzi tsireledze mafhondo awe uri a sa swe nga ḓuvha ḽi vhavhulaho. Nga zwiṅwe zwifhinga ḽi kuvhatedza mafhondo nga phapha dzaḽo u itela u a tsireledza kha muya u rotholaho. U fana na goni ḽi tshi tsireledza mafhondo aḽo, nga u ralo Yehova o tsireledza lushaka luṱuku lwa Isiraele. Zwino vhe  sogani, vhathu vhawe vha ḓo bvela phanḓa u wana vhukhudo murunzini wa phapha dzawe khulwane dza pfanyisedzo arali vha dzula vha tshi fulufhedzea. (Doiteronomio 32:9-11; Psalme ya 36:7) Fhedzi naa ṋamusi ri nga lavhelela uri Mudzimu a ri tsireledze?

4, 5. Ndi ngani ri tshi nga fulufhela tshoṱhe kha fulufhedziso ḽa Mudzimu ḽa uri u ḓo ri tsireledza?

⁴ Vhukuma Yehova u a kona u tsireledza vhashumeli vhawe. Ndi “Mudzimu, Ramaanḓa-oṱhe”—ḽeneḽi ndi dzina ḽi sumbedzaho uri u na maanḓa mahulwane. (Genesi 17:1) Maanḓa a Yehova a nga si thivhelwe, a fana na magabelo a re na maanḓa. Samusi a tshi kona u ita zwiṅwe na zwiṅwe zwine a funa, ri nga vhudzisa uri, ‘Naa Yehova u a funa u shumisa maanḓa awe u itela u tsireledza vhathu vhawe?’

⁵ Nga ho livhaho, phindulo ndi ee! Yehova uri khwaṱhisedza uri u ḓo tsireledza vhathu vhawe. Psalme ya 46:1 i ri: “Mudzimu kha riṋé ndi vhudzumbamo hashu na maanḓa ashu; ndi Mufarisi we ra mu vhona musi ró khakhelwa.” Samusi Mudzimu ‘a sá zwifhi,’ ri nga fulufhela tshoṱhe fulufhedziso ḽawe ḽa uri u ḓo ri tsireledza. (Tito 1:2) Kha ri ṱhogomele zwiṅwe zwa zwifanyiso zwe Yehova a zwi shumisa u ṱalusa tsireledzo yawe.

6, 7. (a) Mulisa wa zwifhingani zwa Bivhili o vha a tshi tsireledza nngu dzawe nga nḓila-ḓe? (b) Bivhili i sumbedza hani uri Yehova u a tama u tsireledza na u ṱhogomela nngu dzawe?

⁶ Yehova ndi Mulisa, nahone “ri vhathu vhawe; ri nngu dza pfulo yawe.” (Psalme ya 23:1; 100:3) Nngu ndi tshiṅwe tsha zwipuka zwi si gathi zwi sa koni u ḓipilela. Mulisa wa zwifhingani zwa Bivhili o vha a tshi fanela u vha na tshivhindi u itela u tsireledza nngu dzawe kha dzindau, dziphele, na zwivhingwi, u katela na dzimbava. (1 Samuele 17:34, 35; Yohane 10:12, 13) Fhedzi zwiṅwe zwifhinga zwo vha zwi tshi ṱoḓa uri u vhe na vhulenda musi u tshi tsireledza nngu. Musi nngu i tshi dzwalela kule na danga, mulisa a londaho o vha a tshi linda mme zwifhingani  zwine ya vha i sa koni tshithu nahone nga zwenezwo a dzhia ngwana a i isa dangani.

⁷ Nga u ḓivhambedza na mulisa, Yehova uri khwaṱhisedza uri u tama u ri tsireledza nga mbilu yoṱhe. (Hesekiele 34:11-16) Humbulani ṱhaluso ya Yehova i wanalaho kha Yesaya 40:11, yo haseledzwaho kha Ndima ya 2 ya yeneyi bugu: “U ḓo lisa sambi ḽawe sa mulisa; dzingwana u ḓo dzi takula a dzi kuvhatedza.” Zwi ḓa hani uri ngwana i ‘kuvhatedzwe’ nga mulisa—a i fukedze nguvho yawe ya nga nṱha? Ngwana i nga ya kha mulisa, nahone ya ḓikweta nga mulenzhe wawe. Naho zwo ralo, ndi mulisa ane a fanela u kotama, a i takula nahone a i kuvhatedza. Ndi tshifanyiso tshavhuḓi lungafhani tsha u ḓiimisela ha Mulisa washu Muhulwane u itela u ri tsireledza!

 8. (a) Fulufhedziso ḽa Mudzimu ḽa tsireledzo ḽo livhiswa kha vhafhio, nahone zwenezwi zwo sumbedzwa hani kha Mirero 18:10? (b) Ndi mini zwine zwa katelwa kha u wana vhukhudo dzinani ḽa Mudzimu?

⁸ Fulufhedziso ḽa Mudzimu ḽa u tsireledza ḽi ya nga zwiimo—u tsireledza vhane vha sendela tsini nae fhedzi. Mirero 18:10 i ri: “Dzina ḽa Yehova ndi [“mutsheṱo,” NW] vhukuma; muvhuya u shavhela henefho a khuda.” Zwifhingani zwa Bivhili, nga zwiṅwe zwifhinga mitsheṱo yo vha i tshi fhaṱiwa sogani ya vha dzhavhelo. Fhedzi ho vha hu vhuḓifhinduleli ha muthu a re khomboni uri a shavhele kha wonoyo mutsheṱo uri a tsireledzee. Zwi a fana na u wana vhukhudo dzinani ḽa Mudzimu. A zwi kateli u sokou dovholola dzina ḽa Mudzimu; dzina ḽa Mudzimu a ḽi na madambi. Nṱhani hazwo, ri fanela u ḓivha na u fulufhela Muṋe wa dzina ḽeneḽo na u tshila u tendelana na zwilinganyo zwawe zwo lugaho. Yehova u na vhulenda vhukuma, ngauri u ri khwaṱhisedza uri arali ra ya khae nga lutendo, u ḓo vha mutsheṱo wa tsireledzo kha riṋe!

 9. Ndi mini tshi sumbedzaho uri Yehova ho ngo sokou fulufhedzisa tsireledzo?

⁹ Yehova ho ngo sokou fulufhedzisa tsireledzo. Zwifhingani zwa Bivhili, o zwi sumbedza nga nḓila dza lwa vhuṱolo uri u a  kona u tsireledza vhathu vhawe. Tshifhingani tsha ḓivhazwakale ya Vhaisiraele, “tshanḓa” tsha maanḓa tsha Yehova tsho bvela phanḓa tshi tshi kunda maswina. (Ekisodo 7:4) Naho zwo ralo, Yehova o dovha a shumisa maanḓa awe a u tsireledza kha vhathu nga muthihi nga muthihi.

10, 11. Ndi tsumbo dzifhio dza Bivhili dzine dza sumbedza nḓila ye Yehova a shumisa ngayo maanḓa awe a u tsireledza kha vhathu nga muthihi nga muthihi?

¹⁰ Musi Vhaheberu vhararu—Sadaraka, Mesaka, na Abedenego—vha tshi hana u gwadamela tshifanyiso tsha musuku tsha Khosi Nebukadanetsara, yeneyo khosi yo sinyuwa ya vha shushedza ya ri i ḓo vha posa ṋanḓoni yo vhasedzwaho vhukuma. Nebukadanetsara khosi ya maanḓa, a tshi amba nga lunyadzo o ri: “Ri ḓo vhona, arali hu na Mudzimu ane a ḓo kona u ni lamulela zwanḓani zwanga.” (Daniele 3:15) Vhaṱhannga vhararu vho vha vhe na fulufhelo ḽo khwaṱhaho ḽa uri Mudzimu wavho u na maanḓa a u vha tsireledza, fhedzi vho vha vha tshi zwi ḓivha uri zwi nga kha ḓi itea a sa vha tsireledze. Nga zwenezwo, vho fhindula vha ri: “Ha itwa zwenezwo, hone Mudzimu washu ane ra mu rerela, u ḓo kona u ri lamulela.” (Daniele 3:17) I ngoho, naho yeneyo ṋanḓo yo vha yo vhasedzwa kaṱanu na kavhili u fhira misi miṅwe, a yo ngo itela khaedu Mudzimu wavho wa maanḓa oṱhe. O vha tsireledza, nahone yeneyo khosi ya kombetshedzea u amba uri: “A huna muṅwe Mudzimu ane a kona u lamulela sa hezwi.”—Daniele 3:29.

¹¹ Yehova o dovha a sumbedza maanḓa awe a u tsireledza nga nḓila i swayeaho musi a tshi fhirisela vhutshilo ha Murwa mubebwa-eṱhe mbumbeloni ya Maria musidzana wa Muyuda. Muruṅwa o vhudza Maria uri “u ḓo vha muthu wa thovhela, [a] beba murwa.” Muruṅwa o ṱalutshedza uri: “Muya mukhethwa u ḓo ḓa kha iwe; maanḓa a Wa-Ṱaḓulu-ṱaḓulu a ḓo vha murunzi wau.” (Luka 1:31, 35) Zwi vhonala uri Murwa wa Mudzimu o vha a sa athu vhuya a vha vhuimoni vhu re na khombo u fana na honoho. Naa tshivhi na u sa fhelela zwa mme wa ṋama zwo vha zwi tshi ḓo tshikafhadza lwonolwo lutshetshe? Naa Sathane o vha a tshi ḓo kona u huvhadza kana u vhulaha onoyo Murwa musi A sa athu bebwa? Zwo vha zwi si nga si konadzee! Zwi  re zwone ndi uri Yehova o vha o fhaṱa luvhondo lwa u tsireledza Maria uri hu sa vhe na tshithu—hu nga vha u sa fhelela, maanḓa a huvhadzaho, muvhulahi, kana dimoni naho ḽi ḽifhio—zwine zwa nga tshinyadza ṅwana ane a khou aluwa mbumbeloni, u bva musi mme a wonoyo ṅwana vha tshi kha ḓi tou bva u vhifha muvhilini. Yehova o bvela phanḓa a tshi tsireledza Yesu tshifhingani tsha vhuswa hawe. (Mateo 2:1-15) U swika nga tshifhinga tsho vhewaho nga Mudzimu, ho vha hu si na tshine tsha nga tshinyadza Murwa wawe ane a mu funa.

12. Ndi ngani Yehova o tsireledza vhaṅwe vhathu nga lwa vhuṱolo zwifhingani zwa Bivhili?

¹² Ndi ngani Yehova o tsireledza vhaṅwe vhathu nga nḓila dzo raloho dza vhuṱolo? Kanzhi Yehova o tsireledza vhathu u itela u tsireledza tshiṅwe tshithu tsha ndeme vhukuma: u ḓadzea ha ndivho yawe. Sa tsumbo, u tshidzwa ha lushie Yesu ho vha hu ha ndeme kha u ḓadzea ha ndivho ya Mudzimu, ine mafheleloni ya ḓo vhuyedza vhathu vhoṱhe. Mafhungo a misumbedzo minzhi ya maanḓa a u tsireledza ndi tshipiḓa tsha Maṅwalo o hevhedzwaho, e a “ṅwalelwa u ri funza, uri nga u konḓelela na nga u fhembeledzwa nga maṅwalo ri wane fulufhelo.” (Vha-Roma 15:4) Ee, dzenedzi tsumbo dzi khwaṱhisa lutendo lwashu kha Mudzimu washu ramaanḓaoṱhe. Fhedzi ndi tsireledzo ifhio ine ra nga i lavhelela kha Mudzimu ṋamusi?

13. Naa Yehova u a kombetshedzea u ri itela vhuṱolo? Ṱalutshedzani.

¹³ Fulufhedziso ḽa tsireledzo ya Mudzimu a ḽi ambi uri Yehova u a kombetshedzea u ri itela vhuṱolo. Hai, Mudzimu washu ha ri vhudzi uri ri nga si vhe na vhuleme kha ano maitele a kale. Vhashumeli vhanzhi vha Yehova vha fulufhedzeaho vha sedzana na maṱungu a vhavhaho, a katelaho vhushai, nndwa, vhulwadze, na lufu. Yesu o vhudza vhafunziwa vhawe nga hu pfalaho uri sa vhathu vha nga vhulahwa nga ṅwambo wa lutendo lwavho. Ndi ngazwo Yesu o ombedzela uri vha fanela u konḓelela u swika vhufheloni. (Mateo 24:9, 13) Arali Yehova a nga shumisa maanḓa awe nga lwa vhuṱolo u itela u ri vhofholola kha vhuimo hoṱhe, Sathane o vha a tshi ḓo vha na tshiitisi tsha u nyadza Yehova  nahone a timatima u ḓikumedza hashu ha vhukuma kha Mudzimu washu.—Yobo 1:9, 10.

14. Ndi tsumbo dzifhio dzi sumbedzaho uri Yehova ha tsireledzi vhashumeli vhawe vhoṱhe nga nḓila dzi fanaho misi yoṱhe?

¹⁴ Na zwifhingani zwa Bivhili, Yehova ho ngo shumisa maanḓa awe a u tsireledza u itela u tsireledza muṅwe na muṅwe wa vhashumeli vhawe uri vha sa fe. Sa tsumbo, muapostola Yakobo o vhulahwa nga Herode hu ṱoḓaho u vha nga 44 C.E.; naho zwo ralo, nga murahunyana ha zwenezwo, Petro o tshidzwa “zwanḓani zwa Herode.” (Mishumo 12:1-11) Nahone Yohane, murathu wa Yakobo, o tshila tshifhinga tshilapfu u fhira Petro na Yakobo. Zwi khagala uri ri nga si lavhelele Mudzimu washu uri a tsireledze vhashumeli vhawe vhoṱhe nga nḓila dzi fanaho. Nga nnḓa ha zwenezwo, roṱhe ri “sokou ṱangana nazwo.” (Muhuweleli 9:11) Nga zwenezwo-ha, Yehova u ri tsireledza hani ṋamusi?

15, 16. (a) Ndi vhuṱanzi vhufhio vhu re hone ha uri Yehova o tsireledza vhagwadameli vhawe ṋamani sa tshigwada? (b) Ndi ngani ri tshi nga vha na vhungoho ha uri Yehova u ḓo tsireledza vhashumeli vhawe zwino na tshifhingani tsha ‘maṱungu mahulu?’

¹⁵ Tsha u thoma, ṱhogomelani mafhungo a u tsireledza ṋamani. Sa vhagwadameli vha Yehova, ri nga lavhelela u tsireledzwa ho raloho sa tshigwada. Zwa sa ralo, Sathane o vha a tshi ḓo ri vutshela nga hu leluwaho. Humbulani hezwi: Sathane, “muvhusi wa shango ḽino,” u ḓo ṱoḓa u fhelisa vhurabeli ha ngoho. (Yohane 12:31; Ndzumbululo 12:17) Miṅwe mivhuso ya maanḓa vhukuma ya kha ḽifhasi yo thivhela mushumo washu wa u huwelela nahone yo lingedza u ri fhelisa tshoṱhe. Naho zwo ralo, vhathu vha Yehova vho dzula vho khwaṱha nahone vha bvela phanḓa u huwelela vha sa litshi! Ndi ngani tshaka dza maanḓa dzo kundwa u thivhela mushumo wa tshenetshi tshigwada tshiṱuku tsha Vhakriste, tshine tsha vhonala tshi songo tsireledzea? Nga ṅwambo wa uri Yehova o ri tsireledza nga phapha dzawe dza maanḓa!—Psalme ya 17:7, 8.

¹⁶ Hu pfi mini nga u tsireledzwa ṋamani tshifhingani tsha ‘maṱungu mahulu’ a ḓaho? A ro ngo fanela u ofha musi ri tshi  humbula nga ha khaṱulo dzine dza ḓo ḓiswa nga Mudzimu. Iṱali “Murena u a zwi ḓivha u ponyokisa mulingoni vha mu ofhaho, na u vha ó vhea khothoni vha songo lugaho, hu vhuye hu swike ḓuvha ḽa tsengo.” (Ndzumbululo 7:14; 2 Petro 2:9) Naho zwo ralo, misi yoṱhe ri nga vha na vhungoho ha zwithu zwivhili. Tsha u thoma, Yehova ha nga ḓo vhuya a tendela vhashumeli vhawe vha fulufhedzeaho vha tshi fheliswa kha ḽifhasi. Tsha vhuvhili, u ḓo lambedza vhane vha fulufhedzea nga vhutshilo vhu sa fheli kha ḽifhasi ḽawe ḽiswa ḽo lugaho—arali zwi tshi ṱoḓea, nga u vha vusa vhafuni. Kha vho faho, a hu na fhethu ho tsireledzeaho u fhira u vha muhumbuloni wa Mudzimu.—Yohane 5:28, 29.

17. Yehova uri tsireledza hani nga Ipfi ḽawe?

¹⁷ Na zwino, Yehova u ri tsireledza nga “ipfi” ḽawe ḽi tshilaho, ḽine ḽa vha na ṱhuṱhuwedzo ya maanḓa ya u fhodza mbilu dzashu na u shandula vhutshilo hashu. (Vha-Heberu 4:12) Nga u shumisa maitele aḽo, ri nga tsireledzea kha maṅwe masia uri ri sa vhaisale ṋamani. Yesaya 48:17 i ri: “Nṋe Yehova . . . ndi U funza zwi farisaho.” A zwi timatimisi uri u tshila u tendelana na Ipfi ḽa Mudzimu zwi nga khwinisa mutakalo washu na u engedza vhutshilo hashu. Sa tsumbo, nga ṅwambo wa uri ri tevhela nyeletshedzo ya Bivhili ya u sa ita vhupombwe na u sa ḓishata dzitshikha, ri iledza mishumo i songo kunaho na mikhwa i huvhadzaho ine ya bveledza khombo kha vhutshilo ha vhathu vhanzhi vha sa ofhi Mudzimu. (Mishumo 15:29; 2 Vha-Korinta 7:1) Ri livhuha lungafhani u tsireledzwa nga Ipfi ḽa Mudzimu!

18. Yehova u ri tsireledza muyani nga nḓila-ḓe?

¹⁸ Tsha ndeme vhukuma ndi uri Yehova u ri tsireledza siani ḽa muya. Mudzimu washu wa lufuno u ri tsireledza kha u tshinyadzwa muyani nga uri shomedza nga zwine ra zwi ṱoḓa u itela u konḓelela milingo na u tsireledza vhushaka hashu nae. Nga zwenezwo Yehova u dzhia vhukando u itela u tsireledza vhutshilo hashu, hu si miṅwaha ya si gathi fhedzi, fhedzi nga hu sa fheli. Ṱhogomelani dziṅwe ndugiselelo dza Mudzimu dzine dza nga ri tsireledza muyani.

19. Muya wa Yehova u nga ri thusa hani u sedzana na mulingo naho ufhio?

 ¹⁹ Yehova ndi “Mupfi wa dzithabelo.” (Psalme ya 65:2) Musi mitsiko ya vhutshilo i tshi vhonala i mihulwane, u mu vhudza zwi re mbiluni yashu zwi nga ri thusa vhukuma. (Vha-Filipi 4:6, 7) A nga kha ḓi sa fhelisa u lingwa hashu nga lwa vhuṱolo, fhedzi a tshi fhindula thabelo dzashu dzi bvaho mbiluni, a nga ri ṋea vhuṱali ha u sedzana nayo. (Yakobo 1:5, 6) Zwi fhiraho zwenezwo, Yehova u ṋea muya mukhethwa vhane vha mu humbela. (Luka 11:13) Wonoyo muya u re na maanḓa u nga ri thusa u sedzana na milingo naho ifhio kana vhuleme vhune ra nga sedzana naho. U nga ri ṋea ‘maanḓa mahulwane’ uri ri kone u konḓelela u swikela Yehova a tshi fhelisa vhuleme hoṱhe vhu vhavhaho shangoni ḽiswa ḽi re tsini vhukuma.—2 Vha-Korinta 4:7.

20. Yehova a nga sumbedza hani maanḓa awe a u tsireledza nga u shumisa vhagwadameli nga riṋe?

²⁰ Nga zwiṅwe zwifhinga, maanḓa a Yehova a u tsireledza a nga sumbedzwa kha vhagwadameli nga riṋe. Yehova o sendedza vhathu vhawe kha ‘vhahashu’ vha shangoni ḽoṱhe. (1 Petro 2:17; Yohane 6:44) Kha lwonolwo lufuno lwa vhenevho vhahashu, ri vhona vhuṱanzi ho khwaṱhaho ha maanḓa a Mudzimu a muyamukhethwa u tshi ṱuṱuwedzela vhathu uri  vha ite zwivhuya. Wonoyo muya u ita uri ri bveledze zwiaṋwiwa—pfaneleo dzi kungaho, dza ndeme dzi katelaho na lufuno, vhulenda, na vhuthu. (Vha-Galata 5:22, 23) Nga zwenezwo, musi ri mutsikoni nahone mutendi nga riṋe a sudzulusea u ṋea nyeletshedzo i shumaho kana u amba mafhungo manzhi a ṱuṱuwedzaho, ri nga livhuha Yehova nga misumbedzo yo raloho ya tsireledzo yawe.

21. (a) Ndi zwiḽiwa zwifhio zwi re tshifhingani zwine Yehova a zwi ṋekedza nga “mukoma a fulufhedzeaho na wa vhuṱali”? (b) Inwi nga dzaṋu no vhuyelwa hani nga ndugiselelo dza Yehova dza u ri tsireledza muyani?

²¹ Yehova u ri ṋea tshiṅwe tshithu tsha u ri tsireledza: zwiḽiwa zwa muya nga tshifhinga tshazwo. U itela uri thusa u wana maanḓa Ipfini ḽawe, Yehova o ruma, “mukoma a fulufhedzeaho na wa vhuṱali” uri a ri ṋee zwiḽiwa zwa muya. Tshenetsho tshigwada tsha mukoma a fulufhedzeaho tshi shumisa khandiso, u katela na magazini wa Tshiingamo na Awake!, kathihi na miṱangano, maguvhangano, na mabuthano u itela uri ṋea “zwiḽiwa nga tshikhathi tshazwo”—zwine ra zwi ṱoḓa, nga tshifhinga tshine ra zwi ṱoḓa ngatsho. (Mateo 24:45) Naa no no vhuya na pfa tshiṅwe tshithu muṱanganoni wa Vhukriste—kha phindulo, kha nyambo, kana kha thabelo—tshe tsha ni ṋea nungo dzi ṱoḓeaho na ṱhuṱhuwedzo? Naa vhutshiloni haṋu no no vhuya na kwamiwa nga thero yo livhaho yo gandiswaho kha muṅwe wa magazini dzashu? Humbulani uri Yehova o ita dzenedzo ndugiselelo u itela u ri tsireledza muyani.

22. Yehova u shumisa maanḓa awe misi yoṱhe nga nḓila dzifhio, nahone ndi ngani u ita hawe nga u ralo zwi tshi ri vhuyedza?

²² Vhukuma Yehova ndi tshiṱangu “tsha vhané vha [“khuda,” NW] ngae.” (Psalme ya 18:30) Ri a pfesesa uri ha shumisi maanḓa awe u ri tsireledza kha khombo dzoṱhe zwino. Naho zwo ralo, misi yoṱhe u shumisa maanḓa awe a u tsireledza u itela u khwaṱhisedza u ḓadzea ha ndivho yawe. Mafheleloni, u ita nga u ralo zwi ḓo vhuyedza vhathu vhawe. Arali ra sendela tsini nae nahone ra dzula ri lufunoni lwawe, Yehova u ḓo ri ṋea vhutshilo ho fhelelaho vhu sa fheli. Ri na tshilavhelelwa tshenetsho muhumbuloni, vhukuma ri nga vhona tshengelo naho ifhio kha ano maitele ‘i tshi khaukwa.’—2 Vha-Korinta 4:17.