1-3. Ndi ngani mbilu ya Hesekiele yo vha i tshi khou vhavha, nahone o hevhedzwa uri a ṅwale mini?

HO NO fhela miṅwaha ya rathi Hesekiele o thubiwa. * Zwi a mu ṱungufhadza vhukuma musi a tshi humbula nga ha nḓila i si yavhuḓi ine vhavhusi vha khou vhusa ngayo shango ḽa hawe ḽa Yuda. O vhona vhavhusi vha tshi bva vha tshi dzhena.

² Hesekiele o bebwa musi hu tshi khou vhusa Khosi Yosia we a vha a tshi fhulufhedzea. Hesekiele u fanela u vha o takala musi a tshi pfa uri Yosia o bva fulo ḽa u fhelisa midzimu ya zwifanyiso yo vhaḓwaho na u vusulusa vhurabeli ho kunaho kha ḽa Yuda. (2 Koron. 34:1-8) Fhedzi tshanduko dze Yosia a lingedza u dzi ita, a dzo ngo vha hone lwa tshoṱhe ngauri mahosi e a tevhela o bvela phanḓa a tshi gwadamela midzimu ya zwifanyiso. Ndi ngazwo musi lwonolwo lushaka lu tshi vhuswa nga eneo mahosi lwo tou ṋaṋa u ḓifara luvhi, lwa si tsha vha na vhushaka havhuḓi na Mudzimu. Naa zwo vha zwo bala tshoṱhe? Hai!

³ Yehova o hevhedza muporofita wawe a fhulufhedzeaho uri a ṅwale vhuṅwe ha vhuporofita ha u thoma nga ha Messia. Messia o vha a tshi ḓo vha Khosi na Mulisa tshifhingani tshi ḓaho. O vha a tshi ḓo dovha a vusulusa vhurabeli ho kunaho lwa tshoṱhe na u ṱhogomela nngu dza Yehova nga lufuno. Ndi zwa ndeme uri ri ḓivhe  zwavhuḓi honoho vhuporofita ngauri u itea haho zwi kwama vhumatshelo hashu ha tshoṱhe. Zwino kha ri ambe nga ha vhuporofita vhuṋa vhu ambaho nga ha Messia vhu re kha bugu ya Hesekiele.

4. Hesekiele o amba nga ha vhuporofita vhufhio, nahone Yehova o vhu ḓivhadza hani khae?

⁴ Hu ṱodaho u vha nga 612 B.C.E., ‘Yehova o dovha a amba’ na Hesekiele, a mu vhudza vhuporofita vhu sumbedzaho vhuhosi ha Messia na uri ndi ngani zwi zwa ndeme u fhulufhela Muvhuso wawe. Yehova o ḓivhadza honoho vhuporofita nga u vhudza Hesekiele uri a vhudze vhe a thubiwa navho thai. Yeneyo thai yo vha i tshi sumbedza uri vhavhusi vha Yuda a vha na lutendo na u ombedzela uri hu ṱoḓea Messia ane a vha Khosi yo lugaho.—Hesek. 17:1, 2.

5. Thai yo vha i tshi khou bvisela khagala mbuno ifhio?

⁵ Vhalani Hesekiele 17:3-10. Thai ya hone i ri: “Goni ḽihulu” ḽi ṱhukhula lutavhi lwa nṱha-nṱha lwa muri wa muṱaululo ḽa lu ṱavha “muḓini wa vharengisi.” Ḽeneḽo goni ḽa dzhia “iṅwe mbeu ya ḽeneḽo shango” ḽa i ṱavha tsimuni yo nonaho “tsini na maḓi manzhi.” Yeneyo mbeu ya mela, ya hula ya vha ‘munḓirivhe wo ṋavhaho.’ Ha dovha ha bvelela ḽiṅwe “goni ḽihulu.” Midzi ya wonoyo munḓirivhe ya ‘ṋavha i tshi ya’ kha ḽeneḽo goni, i tshi ṱoḓa uri ḽi i tupule ḽi i ise huṅwe fhethu hu re na maḓi manzhi. Yehova u sasaladza zwe wonoyo munḓirivhe wa ita, a sumbedza uri midzi yawo i ḓo ṱhukhuwa na uri u ḓo “puta.”

6. Ṱalutshedzani zwine thai ya amba zwone.

⁶ Yeneyo thai yo vha i tshi amba mini? (Vhalani Hesekiele 17:11-15.) Nga ṅwaha wa 617 B.C.E., Khosi Nebukadanetsara wa Babele (“goni ḽihulu” ḽa u thoma) o tanga muḓi wa Yerusalema. A bvisa Yehoyakini Khosi ya Yudea (“lutavhi lu re nṱha-nṱha”) kha khuluṋoni, a mu isa Babele (“muḓini wa vharengisi”). Nebukadanetsara a vhea Tsedekia (iṅwe “mbeu ya ḽeneḽo shango” ya vhuhosini) uri a vhe khosi ya Yerusalema. Nebukadanetsara o ita uri yeneyo khosi ntswa ya Yudea i ane nga dzina ḽa Mudzimu, a i kombetshedza uri i vhe mulanda. (2 Koron. 36:13) Fhedzi Tsedekia o nyadza muano wawe; a shandukela Babele, a ya u ṱoḓa thuso kha mmbi ya Farao wa Egipita (“goni ḽihulu” ḽa vhuvhili), fhedzi zwa si thuse nga tshithu. Yehova o sasaladza zwe Tsedekia a zwi ita nge a si fhulufhedzee, a nyadza muano we a u ita. (Hesek. 17:16-21) Tsedekia o fhedza o dzhielwa vhuhosi, a fela dzhele Babele.—Yer. 52:6-11.

7. Ri nga guda mini kha yeneyo thai?

⁷ Ri guda mini kha yeneyi thai? Tsha u thoma, sa vhagwadameli vha Yehova, ri fanela u ita zwe ra ana. Yesu o ri, “Itani uri ‘Ee’ yaṋu i vhe ee, ‘Hai’ yaṋu i vhe hai.” (Mat. 5:37) Arali zwi tshi ṱoḓea uri ri ane phanḓa ha Mudzimu uri ri ḓo amba ngoho, u fana na u ana khothe, ri dzhia wonoyo muano u wa ndeme. Tsha vhuvhili, a ro ngo tea u fhulufhela muṅwe na muṅwe. Bivhili i ri tsivhudza  uri: “Ni songo fhulufhela vharangaphanḓa kana na fhulufhela murwa muthu, ane a si kone u tshidza.”—Ps. 146:3.

8-10. Yehova o ṱalusa hani Khosi ya Vhumessia ya tshifhingani tshi ḓaho, nahone zwe zwa porofitiwa zwo itea hani? (Sedzani na bogisi “Vhuporofita Vhu Ambaho Nga Ha Messia—Muri Muhulu Wa Muṱaululo.”)

⁸ Fhedzi hu na muvhusi ane ra nga mu fhulufhela. Musi Yehova o no amba nga ha thai i ambaho nga lutavhi lwe lwa ṱavhiwa huṅwe, o shumisa tshenetsho tshifanyiso u ṱalusa Messia ane a ḓo vha Khosi.

⁹ Zwe zwa ambiwa kha vhuporofita. (Vhalani Hesekiele 17:22-24.) Zwazwino a si magoni mahulu ane a ḓo dzhia vhukando, fhedzi ndi Yehova nga dzawe. U ḓo ṱhukhula lutavhi “kha ṱhodzi ya muri mulapfu wa muṱaululo” a lu “ṱavha kha thavha khulwane yo lapfaho.” Lwonolu lutavhi lu ḓo titima, lwa vha “muri muhulu wa muṱaululo” une wa ḓo khudisa “zwiṋoni zwoṱhe.” Ndi hone “miri yoṱhe ya ḓaka” i tshi ḓo zwi ḓivha uri ndi Yehova nga dzawe we a ita uri wonoyu muri muhulu u titime.

¹⁰ Nḓila ye zwe zwa porofitiwa zwa itea ngayo. Yehova o bvisa Murwa wawe Yesu Kristo kha mutevhe wa vhuhosi ha Davida (“muri muhulu wa muṱaululo”), a mu vhea kha Thavha ya Tsioni ya ṱaḓulu (“thavha khulwane yo lapfaho”). (Ps. 2:6; Yer. 23:5; Nzumb. 14:1) Yehova o dzhia Murwa wawe we maswina awe a vha a tshi mu dzhia e “wa vhuimo ha fhasi-fhasi,” a mu hulisa nga u mu ṋea “khuluṋoni ya Davida khotsi awe.” (Dan. 4:17; Luka 1:32, 33) U fana na muri muhulu wa muṱaululo, Yesu Kristo ane a vha Khosi ya Vhumessia, u ḓo langa ḽifhasi ḽoṱhe, a fhaṱutshedza vhathu vhoṱhe vhane a ḓo vha vhusa. Ndi ene Muvhusi ane ra tea u mu fhulufhela. Musi vhathu vha thetshelesaho vha tshi khou vhuswa nga Yesu ḽifhasini ḽoṱhe, vha ḓo “dzula vho tsireledzea” nahone a vha “nga thithiswi nga u ofha khombo.”—Mir. 1:33.

11. Ndi zwithu zwifhio zwa ndeme zwine ra zwi guda kha vhuporofita ha “lutavhi” lwe lwa vha “muri muhulu wa muṱaululo”?

¹¹ Ri nga guda mini kha honovhu vhuporofita? Vhuporofita vhu takadzaho ha “lutavhi” lune lwa shanduka lwa vha “muri muhulu wa muṱaululo,” vhu ri thusa uri ri kone u fhindula mbudziso ya ndeme ine ya ri: Ri ḓo fhulufhela nnyi? Ndi vhutsilu u fhulufhela mivhuso ya vhathu na maanḓa a mmbi dzavho. U itea uri ri tsireledzee zwa vhukuma, ri ḓo vha ro ṱalifha arali ra fhulufhela nga vhuḓalo Yesu Kristo ane a vha Khosi ya Vhumessia. Muvhuso wa ṱaḓulu u re zwanḓani zwawe zwavhuḓi, ndi ḽone fhulufhelo ḽi ḽoṱhe ḽine vhathu vha vha naḽo.—Nzumb. 11:15.

12. Yehova o sumbedza hani uri o vha a songo shandula mulanga we a u vhofha na Davida?

¹² Hesekiele o ṱalutshedza zwe Mudzimu a mu vhudza nga ha zwine thai i ambaho nga ha magoni mavhili ya amba zwone. O pfesesa uri Tsedekia ane a vha khosi i sa fhulufhedzei, ane a bva kha mutevhe wa lushaka lwa Davida lwa vhuhosi, o vha a tshi ḓo bviswa kha khuluṋoni a iswa vhuthubwani Babele. Hesekiele a nga vha o ḓivhudzisa uri, ‘Hu ḓo itea mini kha mulanga we Mudzimu a u vhofha na Davida, wa uri kha lushaka lwa Davida hu ḓo bva  khosi ine ya ḓo vhusa u ya nga hu sa fheli?’ (2 Sam. 7:12, 16) Arali Hesekiele o ḓivhudzisa yeneyo mbudziso, ho ngo lenga u wana phindulo. ‘Yehova o amba’ na Hesekiele nga ṅwaha wa vhusumbe musi o thubiwa, hu ṱoḓaho u vha nga 611 B.C.E., musi Tsedekia a kha ḓi vhusa kha ḽa Yuda. (Hesek. 20:2) Yehova o ita uri Hesekiele a ambe nga ha vhuṅwe vhuporofita vhu ambaho nga ha Messia, he ha khwaṱhisedza uri mulanga we a u vhofha na Davida a wo ngo shanduka. Fhedzi honoho vhuporofita ho sumbedza uri Messia ane a ḓo vha Khosi tshifhingani tshi ḓaho, u ḓo fanelea u vhusa sa muḽaifa wa Davida.

13, 14. Vhuporofita ho ṅwaliwaho kha Hesekiele 21:25-27 vhu bvisela khagala mbuno ifhio, nahone zwe zwa porofitiwa zwo itea hani?

¹³ Zwe zwa ambiwa kha vhuporofita. (Vhalani Hesekiele 21:25-27.) Yehova o shumisa Hesekiele u itela u amba nga ha “murangaphanḓa muvhi wa Isiraele,” we tshifhinga tshawe tsha uri a pfiswe vhuṱungu tsha vha tsho swika. Yehova o vhudza onoyu muvhusi muvhi uri o vha a tshi ḓo dzhielwa “dugu” yawe na “khare” (zwine zwa fanyisela maanḓa a vhuhosi). Zwenezwo zwi amba uri mivhuso ya vhuimo ha “fhasi” yo vha i tshi ḓo takuselwa nṱha, ya vhuimo ha “nṱha” ya tsitselwa fhasi. Mivhuso yo takuselwaho nṱha yo dzula i tshi vhusa u swikela “ane a fanelea a tshi swika,” ndi ene we Yehova a mu ṋea Muvhuso.

 ¹⁴ Nḓila ye zwe zwa porofitiwa zwa itea ngayo. Nga 607 B.C.E., musi hu tshi fheliswa muḓi wa Yerusalema, muvhuso wa vhuimo ha “nṱha” we wa vha u Yerusalema wo tsitselwa fhasi musi Vhababele vha tshi fhelisa wonoyo muḓi, vha tsitsa Khosi Tsedekia kha khuluṋoni, vha mu thuba. Samusi ho vha hu si tsheena khosi i vhusaho Yerusalema ye ya vha i tshi bva kha lushaka lwa Davida lwa vhuhosini, mivhuso ya Vhannḓa ya vhuimo ha “fhasi” yo takuselwa nṱha ya langa ḽifhasi, fhedzi lwa tshifhinga tshiṱuku. Zwifhinga zwa Vhannḓa kana “zwifhinga zwo vhewaho zwa dzitshaka,” zwo fhela nga 1914 musi Yehova a tshi ṋea Yesu Kristo vhuhosi. (Luka 21:24) Samusi Yesu e muḓuhulu wa Davida, o vha o “fanelea” vhukuma u ṋewa Muvhuso wa Vhumessia. * (Gen. 49:10) Nga yeneyo nḓila, Yehova o ita zwe a vha o fhulufhedzisa Davida uri u ḓo mu ṋea muḽaifa wa tshoṱhe ane a ḓo vhusa kha Muvhuso wa lini na lini.—Luka 1:32, 33.

15. Ndi ngani ri tshi nga fhulufhela tshoṱhe Yesu Kristo ane a vha Khosi?

¹⁵ Ri nga guda mini kha honovhu vhuporofita? Ri nga fhulufhela tshoṱhe Yesu Kristo ane a vha Khosi. Ndi ngani? Ndi ngauri Yesu o tou nangiwa nga Yehova, ‘a ṋewa muvhuso’ wo mu fanelaho. Zwenezwo zwo fhambana na vhavhusi vha shango vhane vha nga nangiwa nga vhathu kana vha tou dzhavhula vhuhosi. (Dan. 7: 13, 14) Zwo tea uri ri fhulufhele Khosi ye Yehova a tou i vhea ene muṋe!

16. Yehova u ḓipfa hani nga nngu dzawe, nahone “vhalisa vha Isiraele” vha misini ya Hesekiele vho fara hani sambi?

¹⁶ Yehova ane a vha Mulisa Muhulwane, u na ndavha na nngu dzawe dzine dza vha vhagwadameli vhawe vha kha ḽifhasi. (Ps. 100:3) Musi a tshi khetha vhalisa vhane vha ḓo ṱhogomela nngu dzawe, u a sedza nga vhuronwane uri vha ḓo dzi fara hani. Humbulani nḓila ine Yehova a nga vha o ḓipfa ngayo nga “vhalisa vha Isiraele” vha misini ya Hesekiele. Vhenevho vharangaphanḓa vho lisa sambi “nga tshiṱuhu” vha sa shoni. Zwenezwo zwo ita uri sambi ḽi tambule, vhanzhi vha litsha vhurabeli ho kunaho.—Hesek. 34:1-6.

17. Yehova o tshidza hani nngu dzawe?

¹⁷ Yehova o vha a tshi ḓo ita mini? O amba na vhavhusi vha Isiraele vha re na tshiṱuhu a ri: ‘Ndi ḓo vha sengisa.’ O dovha a fhulufhedzisa a ri: “Ndi ḓo tshidza nngu dzanga.” (Hesek. 34:10) Yehova u dzula a tshi ita zwe a amba. (Yosh. 21:45) Nga 607 B.C.E., o tshidza nngu dzawe a tshi shumisa Vhababele uri vha dzhiele vhuhosi vhenevho vhalisa vha tseḓa. Nga murahu ha miṅwaha ya 70, o vhofholola vhagwadameli vhawe vhe vha vha vha tshi nga nngu Babele, a vha vhuyedzedza shangoni ḽa havho uri vha vusuluse vhurabeli ha ngoho henefho. Fhedzi nngu dza Yehova dzo vha dzi songo tsireledzea ngauri dzo vha dzi tshi ḓo bvela phanḓa dzi tshi vhuswa nga mivhuso ya shango. “Zwifhinga zwo vhewaho zwa dzitshaka” zwo vha zwi tshi kha ḓi ḓo bvela phanḓa lwa miṅwaha minzhi.—Luka 21:24.

18, 19. Hesekiele o amba nga ha vhuporofita vhufhio nga 606 B.C.E.? (Sedzani tshifanyiso tsha u thoma.)

¹⁸ Nga 606 B.C.E., ho vha ho no fhela ṅwaha muḓi wa Yerusalema wo fheliswa nahone Vhaisiraele vho vha vha tshee vho salelwa nga miṅwaha minzhi uri vha vhofhololwe vhuthubwani Babele. Yehova o hevhedza Hesekiele uri a ambe nga ha vhuporofita vhune ha sumbedza nḓila ine Mulisa Muhulwane a vha na ndavha ngayo na nngu dzawe. Honoho vhuporofita vhu ṱalusa nḓila ine Khosi ya Vhumessia ya ḓo lisa ngayo nngu dza Yehova.

¹⁹ Zwe zwa ambiwa kha vhuporofita. (Vhalani Hesekiele 34:22-24.) Mudzimu “u ḓo dzi ṋea mulisa” ane a mu vhidza “mushumeli wanga Davida.” Maipfi ane a ri “mulisa” na “mushumeli,” a sumbedza uri yeneyo Khosi yo vha i sa ḓo vusulusa mutevhe wa mahosi a lushaka lwa Davida, fhedzi yo vha i tshi ḓo vha muḽaifa muthihi wa tshoṱhe wa Davida. Khosi ine ya dovha ya vha Mulisa i ḓo fulisa nngu dza Mudzimu nahone i ḓo “vha murangaphanḓa wadzo.” Yehova u ḓo “vhofha . . . mulanga wa mulalo” na nngu dzawe. “Phaṱhutshedzo dzi ḓo [dzi nela] sa mvula,” dza pfa dzo tsireledzea, dzo takala nahone zwithu zwi ḓo dzi nakela. Zwi re zwone ndi uri hu ḓo vha na mulalo vhukati ha vhathu nga tshavho na vhukati ha vhathu na phukha!—Hesek. 34:25-28.

20, 21. (a) Zwe zwa porofitiwa nga ha “mushumeli wanga Davida” zwo itea hani? (b) Zwe Hesekiele a zwi amba nga ha “mulanga wa mulalo” zwi amba mini nga ha vhumatshelo?

²⁰ Nḓila ye zwe zwa porofitiwa zwa itea ngayo. Mudzimu o vhidza  yeneyi Khosi uri “mulanda wanga Davida,” a tshi khou ambela kha Yesu o faneleaho u vhusa ane a vha muḓuhulu wa Davida. (Ps. 89:35, 36) Musi Yesu e kha ḽifhasi, o sumbedza uri u “mulisa wavhuḓi” nga u “fela nngu.” (Yoh. 10:14, 15) Fhedzi zwino ndi Mulisa a re ṱaḓulu. (Vhahev. 13:20) Nga 1914, Mudzimu o vhea Yesu uri a vhe Khosi, a mu ṋea mushumo wa u lisa na u fulisa nngu dza Mudzimu dzi re kha ḽifhasi. Nga murahunyana, nga 1919, Khosi yo vhewaho kha khuluṋoni yo vhea “mulanda a fhulufhedzeaho na wa vhuṱali” uri a kanzwe “vha nnḓu yawe.” Vhenevho ndi vhagwadameli vha Mudzimu vha fhulufhedzeaho vha re na fhulufhelo ḽa u tshila ṱaḓulu kana ḽa u tshila kha ḽifhasi. (Mat. 24:45-47) Kristo u livhisa onoyu mulanda a fhulufhedzeaho uri a dzule a tshi kanzwa nngu dza Mudzimu. Zwenezwo zwi thusa dzenedzo nngu uri dzi tsireledzee na u vha na mulalo na Yehova na u vha na mulalo nga tshadzo.

²¹ Zwe Hesekiele a zwi amba nga ha “mulanga wa mulalo” na phaṱhutshedzo dzine dza ḓo na sa mvula, zwi amba mini nga ha vhumatshelo? Shangoni ḽiswa, vhagwadameli vha Yehova vha ngoho vhane vha ḓo tshila kha ḽifhasi, vha ḓo wana nga vhuḓalo phaṱhutshedzo dza “mulanga wa mulalo.” Shangoni ḽiswa ḽa pharadiso, vhathu vha fhulufhedzeaho a vha tsha ḓo ofha ngauri hu ḓo vha hu si tsheena nndwa, vhuvemu, nḓala, vhulwadze kana u ofha phukha dza ḓaka. (Yes. 11:6-9; 35:5, 6; 65:21-23) Naa a ni takaleli u tshila tshoṱhe kha ḽifhasi ḽa pharadiso ḽine khaḽo nngu dza Mudzimu dza ḓo ‘dzula dzo tsireledzea, hu si na ane a ḓo dzi tshuwisa’?—Hesek. 34:28.

22. Yesu u ḓipfa hani nga ha nngu, nahone vhalisa vha re kha ḽifhasi vha sumbedza hani uri u na ndavha nadzo?

²² Ri nga guda mini kha honovhu vhuporofita? Yesu u ṱhogomela nngu u fana na Khotsi awe. Yeneyo Khosi ine ya dovha ya vha Mulisa i ita vhungoho ha uri nngu dza Khotsi ayo dzi a kanzwiwa, u ita uri dzi tsireledze na u ḓiphina nga u vha na mulalo pharadisoni ya pfanyisedzo. Zwi a khuthadza vhukuma u ṱhogomelwa nga Mulisa o raloho! Vhalisa vha re kha ḽifhasi vha fanela u ṱhogomela nngu nga nḓila ine Yesu dzi ṱhogomela ngayo. Vhahulwane vha tshivhidzo vha fanela u lisa sambi “nga u ḓifunela” na “nga mbilu yoṱhe” na u vha tsumbo dzavhuḓi kha nngu. (1 Pet. 5:2, 3) Muhulwane wa tshivhidzo a nga si vhuye a ṱoḓa u vhaisa iṅwe ya nngu dza Yehova! Ni songo hangwa zwe Yehova a vhudza vhalisa vha Isiraele vha re na tshiṱuhu vha misini ya Hesekiele. O vha vhudza uri: ‘Ndi ḓo vha sengisa.’ (Hesek. 34:10) Mulisa Muhulwane u dzula o sedza uri nngu dzawe dzi khou farwa hani. Na Murwa wawe u ita zwi fanaho.

23. Yehova o fhulufhedzisa mini nga ha u ṱanganya lushaka lwa Isiraele, nahone o ita hani zwe a zwi fhulufhedzisa?

²³ Yehova u ṱoḓa uri vhagwadameli vhawe vha mu shumele nga vhuthihi. Kha vhuporofita vhu ambaho nga ha u vusuluswa,  Mudzimu o fhulufhedzisa uri u ḓo kuvhanganya vhathu vhawe, vhane vha imela tshaka mbili dza muvhuso wa Yuda na tshaka dza fumi dza muvhuso wa Isiraele. A dovha a vha ṱanganya vha vha “lushaka luthihi,” zwa tou nga u khou ṱanganyisa “thanda” mbili uri “dzi vhe nthihi” tshanḓani tshawe. (Hesek. 37:15-23) Musi Mudzimu a tshi ita zwe a zwi amba kha honovhu vhuporofita, o vhuyedzedza lushaka lwa Isiraele Shangoni ḽo Fhulufhedziswaho lwo no vha na vhuthihi nga 537 B.C.E. * Fhedzi zwenezwo zwo vha zwi tshi tou vha tsumbo ya vhuthihi ha tshoṱhe vhune ha ḓo vha hone. Yehova o fhulufhedzisa uri u ḓo ita uri Vhaisiraele vha vhe na vhuthihi. Nga murahu ha zwenezwo, a vhudza Hesekiele uri a porofite nga ha nḓila ine Khosi ya tshifhingani tshi ḓaho ya ḓo kuvhanganya ngayo vhagwadameli vha ngoho ḽifhasini ḽoṱhe uri vha vhe na vhuthihi vhune ha ḓo vha hone lwa tshoṱhe.

24. Yehova u ṱalusa hani Messia ane a vha Khosi, nahone hu ḓo vha hu hani musi yeneyo Khosi i tshi vhusa?

²⁴ Zwe zwa ambiwa kha vhuporofita. (Vhalani Hesekiele 37:24-28.) Yehova o dovha a vhidza Messia ane a vha Khosi uri ndi “mushumeli wanga Davida,” “mulisa muthihi” na “murangaphanḓa.” Fhedzi zwino Yehova u dovha a mu vhidza uri ndi “khosi” yo Fhulufhedziswaho. (Hesek. 37:22) Hu ḓo vha hu hani musi hu tshi vhusa yeneyo Khosi? Vhuhosi hawe vhu ḓo vha ha tshoṱhe. U shumiswa ha maipfi ane a ri “nga hu sa fheli” na “lwa tshoṱhe,” zwi  sumbedza uri phaṱhutshedzo dzine dza ḓo vha hone musi hu tshi vhusa yeneyo Khosi a dzi nga fheli. * Hu ḓo vha hu na vhuthihi musi Yesu a tshi vhusa. Samusi vhathu vha fhulufhedzeaho vha tshi ḓo vha vha tshi khou vhusiwa nga “khosi nthihi,” vha ḓo tevhela “milayo” i fanaho nahone “vha ḓo dzula kha shango” nga vhuthihi. Vhane vha vhuswa ngae vha ḓo vha na vhushaka ha tsini na Yehova Mudzimu. Yehova u ḓo vhofha “mulanga wa mulalo” navho. Yehova u ḓo vha Mudzimu wavho, vhone vha vha vhathu vhawe. Nnḓu yawe khethwa i ḓo vha “vhukati havho lwa tshoṱhe.”

25. Zwe zwa porofitiwa nga ha Messia ane a vha Khosi zwo itea hani?

²⁵ Nḓila ye zwe zwa porofitiwa zwa itea ngayo. Nga 1919, vhaḓodzwa vha fhulufhedzeaho vho kuvhanganywa nga fhasi ha “mulisa muthihi” ane a vha Yesu Kristo, Khosi ya Vhumessia. Nga murahu, “gogo ḽihulu” ḽi bvaho kha “tshaka dzoṱhe na ndimi dzoṱhe” ḽo vha na vhuthihi na vho ḓodzwaho. (Nzumb. 7:9) Vhoṱhe vha vha “sambi ḽithihi” fhasi ha “mulisa muthihi.” (Yoh. 10:16) Yehova u vha haṱula vhoṱhe nga nḓila i fanaho naho vhe na fhulufhelo ḽa u tshila ṱaḓulu kana kha ḽifhasi. Zwenezwo zwi ita uri vha dzule vhoṱhe sa vharathu na vhakomana ḽifhasini ḽoṱhe, vhe na vhuthihi pharadisoni ya pfanyisedzo. Yehova o vha fhaṱutshedza nga u ita uri vha vhe na mulalo na u vha ṋea nnḓu yawe khethwa i imelaho vhurabeli ho kunaho. Yehova ndi Mudzimu wavho nahone  vha ḓirwa khana ngauri ndi vhagwadameli vhawe zwino na u ya nga hu sa fheli!

26. Ni nga shela hani mulenzhe kha u ita uri hu vhe na vhuthihi pharadisoni ya pfanyisedzo?

²⁶ Ri nga guda mini kha honovhu vhuporofita? Ri na ndugelo yavhuḓi ya u vha na vhuthihi na vhahashu u mona na shango ḽoṱhe vhane ra gwadamela navho Yehova kha vhurabeli ho kunaho. Fhedzi yeneyo ndugelo i ḓa na vhuḓifhinduleli. Ri fanela u shela mulenzhe kha u ita uri hu vhe na vhuthihi. Ndi ngazwo roṱhe ri tshi fanela u ita zwine ra nga kona uri ri dzule ri tshi tenda zwithihi na u ita zwi fanaho. (1 Vhakor. 1:10) Zwenezwi zwi amba uri ri tea u kanzwiwa nga nḓila i fanaho, u ḓifara nga nḓila ine Maṅwalo a amba uri ri ḓifare ngayo na u shela mulenzhe kha u ita mushumo muthihi wa u huwelela nga ha Muvhuso na u ita vhafunziwa. Fhedzi lufuno ndi lwone lwa ndeme vhukuma kha u ita uri ri vhe na vhuthihi. Ri ita uri ri vhe na vhuthihi musi ri tshi lwela u vha na lufuno na u lu sumbedza nga nḓila dzo fhambananaho dzi ngaho u khathutshela, u pfela vhuṱungu na u hangwela. Bivhili i ri: “Lufuno lu ita uri vhathu vha vhe na vhuthihi nga ho fhelelaho.”—Vhakol. 3:12-14; 1 Vhakor. 13:4-7.

27. (a) Ni ḓipfa hani nga vhuporofita vhu ambaho nga ha Messia vhu re buguni ya Hesekiele? (b) Ri ḓo haseledza mini kha ndima dzi tevhelaho?

²⁷ Ri a livhuwa vhukuma vhuporofita vhu ambaho nga ha Messia vhu wanalaho buguni ya Hesekiele! U vhala nga ha honovhu vhuporofita na u elekanya ngaho zwi ri gudisa uri Yesu Kristo ane a vha Khosi yashu i funwaho, o tewa nga uri ri mu fhulufhele, u a fanelea u vhusa, u ri lisa nga lufuno nahone u ḓo ita uri ri dzule ri na vhuthihi lwa tshoṱhe. Ndi ndugelo yavhuḓi vhukuma u vhusiwa nga Messia ane a vha Khosi! Ri songo hangwa uri honovhu vhuporofita vhu ambaho nga ha Messia, ndi tshipiḓa tsha mafhungo a ndeme a ambaho nga ha u vusuluswa hune ha ambiwa ngaho Bivhilini kha bugu ya Hesekiele. Yehova u shumisa Yesu u itela u kuvhanganya vhathu Vhawe na u vusulusa vhurabeli ho kunaho. (Hesek. 20:41) Kha ndima dzi tevhelaho dza yeneyi bugu, ri ḓo haseledza yeneyo thero i takadzaho i ambaho nga ha u vusuluswa na nḓila ye yeneyo thero ya ṱanḓavhudzwa ngayo kha bugu ya Hesekiele.