Ndi ngani avha vhathu vho takala nga u rali? Vha kha ḽiṅwe ḽa maguvhangano ashu. U fana na vhashumeli vha Mudzimu vha tshifhingani tsho fhiraho, vhe vha laedzwa uri vha kuvhangane luraru nga ṅwaha, ri lavhelela u kuvhangana roṱhe nga zwigwada zwihulwane. (Doiteronomio 16:16) Ṅwaha muṅwe na muṅwe, ri na zwiitea zwiraru: maguvhangano a ḽiisela mavhili a ḓuvha ḽithihi na buthano ḽa dzingu ḽa maḓuvha mararu. Ri vhuyelwa hani nga enea maguvhangano?

A khwaṱhisa vhurathu na vhukomana hashu ha Vhukriste. Samusi Vhaisiraele vho takala musi vha tshi renda Yehova “tshivhidzoni,” na riṋe ri takalela u mu gwadamela roṱhe nga zwiitea zwo khetheaho. (Psalme ya 26:12; 111:1) Enea maguvhangano a vula zwibuli zwa u ṱangana na u konana na Ṱhanzi dzi bvaho kha zwiṅwe zwivhidzo kana kha maṅwe mashango. Nga masiari, ri ḓiphiṋa nga zwiḽiwa zwine ra zwi ḽela fhethu he guvhangano ḽa farelwa hone, zwenezwo zwi ita uri ri ḓiphiṋe nga ho engedzeaho nga zwenezwo zwiitea zwa lwa muya. (Mishumo 2:42) Musi ri henefho ri a kona u vhona lufuno lune lwa ita uri ‘vhahashu’ shangoni ḽoṱhe vha vhe na vhuthihi.—1 Petro 2:17.

A ri thusa u khwaṱhisa vhushaka hashu na Mudzimu. Na Vhaisiraele vho vhuyelwa nge vha “pfa mafhungo” a Maṅwalo e vha ṱalutshedzwa. (Nehemia 8:8, 12) Na riṋe ri a dzhiela nṱha nyeletshedzo ya Bivhili ine ra i wana maguvhanganoni ashu. Mbekanyamushumo iṅwe na iṅwe yo thewa kha ndimana i bvaho Maṅwaloni. Musi hu tshi ṋekedzwa nyambo dzi takadzaho, nyambo dza mutevheṱhaḓu na misumbedzo ya zwithu zwe zwa itea, ri guda nḓila ya u ita zwi funwaho nga Mudzimu vhutshiloni hashu. Ri a ṱuṱuwedzwa musi ri tshi pfa nga ha tshenzhelo dza vhane vha khou sedzana na khaedu dza u tshila sa Vhakriste kha zwino zwifhinga zwi konḓaho. Mabuthanoni ashu a dzingu, matambwa a tshikale a ita uri ri vhone mafhungo a Bivhili nga maṱo a muhumbulo nahone a ri funza ngudo dzi vhuyedzaho. Guvhanganoni ḽiṅwe na ḽiṅwe, hu vha na nyambo ya ndovhedzo u itela vhane vha ṱoḓa u sumbedza u ḓiṋekedza havho kha Mudzimu.

• Ndi ngani maguvhangano e zwiitea zwi takadzaho?

• Ni nga vhuyelwa hani nga u vha hone guvhanganoni?