Miraḓo ya muṱa wa Bethele i shuma kha mihasho yo fhamba-fhambanaho, i ṱhogomela mushumo wa u huwelela kha shango ḽithihi kana o vhalaho. Vha nga kha ḓi shuma kha zwigwada zwa u ṱalutshedzela, hune ha gandiswa dzimagazini, hune ha ṱanganywa dzibugu, hune ha vhulungwa khandiso, hune ha rekhodiwa zwithu kana hune ha bveledzwa dzividio kana u ṱhogomela maṅwe mafhungo a henefho fhethu.

Komiti ya Davhi i ingamela mushumo. Tshigwada tshi Langaho tshi hwesa Komiti ya Davhi vhuḓifhinduleli ha u ṱhogomela nḓila ine ofisi ya davhi iṅwe na iṅwe ya shuma ngayo, yeneyo komiti i vha yo vhumbwa nga vhahashu vha faneleaho vhukuma vhararu kana u fhira. Yeneyo komiti i dzula i tshi ḓivhadza Tshigwada tshi Langaho nga ha mvelaphanḓa ya mushumo kha shango ḽiṅwe na ḽiṅwe ḽe ya avhelwa uri i ḽi ṱhogomele na nga ha vhuleme vhune ha nga vha hone. Mivhigo yo raloho i thusa Tshigwada tshi Langaho uri tshi ite phetho nga ha thero dzine dza nga ṅwalwa kha khandiso dza tshifhingani tshi ḓaho, thero dzine dza nga haseledzwa miṱanganoni na maguvhanganoni. Vhaimeli vha Tshigwada tshi Langaho vha rumelwa misi yoṱhe uri vha dalele madavhi na u livhisa Komiti dza Davhi malugana na nḓila ine vha fanela u ita ngayo mishumo yavho. (Mirero 11:14) Hu dzudzanywa mbekanyamushumo yo khetheaho u katela na nyambo ine ya ṋekedzwa nga muimeli wa ofisi khulwane u itela u ṱuṱuwedza vhane vha dzula tsimuni ya davhi.

Hu tikedzwa zwivhidzo zwa henefho tsini. Vhahashu vha re na vhuḓifhinduleli ofisini ya davhi vha ṋea thendelo ya u vhumbiwa ha zwivhidzo zwiswa. Vhahashu vha dovha vha livhisa mushumo wa vhavulanḓila, vharumiwa na vhalavhelesi vha ḽiisela vhane vha shuma tsimuni i re fhasi ha ḽeneḽo davhi. Vha dzudzanya maguvhangano na mabuthano, vha livhisa u fhaṱiwa ha Holo ntswa dza Muvhuso na u ita vhungoho ha uri khandiso dzi a rumelwa zwivhidzoni uri zwi wane zwithu zwine zwa zwi shaya. Zwithu zwoṱhe zwine zwa itwa davhini zwi shela mulenzhe uri mushumo wa u huwelela u khunyeledzwe nga nḓila yo dzudzanyeaho.—1 Vha-Korinta 14:33, 40.

• Komiti dza Davhi dzi thusa hani Tshigwada tshi Langaho?

• Ndi ifhio mishumo ine ya itwa ofisini ya davhi?