VHAVHINGANI
3: U Ṱhonifha
ZWINE ZWA AMBA ZWONE
Vhavhingani vhane vha ṱhonifhana vha sumbedzana lufuno na musi hu na zwine vha sa khou tendelana khazwo. Bugu ine ya pfi Ten Lessons to Transform Your Marriage, yo amba uri: “Vhavhingani vhane vha ṱhonifhana a vha ṱoḓi uri zwithu zwi tshimbile nga nḓila yavho tshifhinga tshoṱhe. Vha ambedzana nga ha zwithu zwoṱhe zwine vha nga vha vha sa khou tendelana khazwo. Vha a thetshelesana nahone vha ita phetho ine ya ḓo vhuyedza vhuvhili havho.”
ZWINE BIVHILI YA AMBA: “Lufuno . . . a lu ḓiṱoḓeli zwalwo.”—1 Vhakorinta 13:4, 5.
Micah o amba uri: “U itela u sumbedza uri ndi ṱhonifha mufumakadzi wanga ndi tea u dzhiela nṱha zwine a ita nahone a thi ṱoḓi u ita zwithu zwine zwa nga mu vhaisa kana u kwasha mbingano yashu.”
NDI NGANI ZWI ZWA NDEME
Arali vhavhingani vha sa ṱhonifhani, vha nga ambana luvhi, u goḓana na u ita uri muṅwe wavho a ḓipfe e si wa ndeme. Vha ṱoḓisisi vha sumbedzisa uri zwenezwi zwithu zwi nga ita uri nga murahu ha tshifhinga vhavhingani vha ṱalane.
Brian o amba uri: “U amba maipfi a ṱhavhaho kana u kolela mufumakadzi waṋu, zwi ḓo ita uri a ḓipfe e si wa ndeme na uri a si tsha ni fhulufhela nahone zwi nga tshinya mbingano yaṋu.”
ZWINE NA NGA ITA
LINGEDZANI ZWI TEVHELAHO
Fhedzani vhege no livhisa ṱhogomelo kha zwine na zwi amba na zwine na ita, nga murahu ni ḓivhudzise uri:
‘Ndo sasaladza mufarisi wanga lungana nahone ndo mu khoḓa lungana?’
‘Ndo ita mini zwine zwa sumbedza uri ndi ṱhonifha mufarisi wanga?’
HASELEDZANI ZWI TEVHELAHO NA MUFARISI WAṊU
Ni nga sumbedzana hani uri ni a ṱhonifhana nga zwine na amba na u ita?
Ndi mini zwine mufari waṋu a amba kana u ita zwine zwa ita uri ni ḓipfe ni sa khou ṱhonifhiwa?
ZWINE ZWA NGA THUSA
Ṅwalani zwithu zwiraru zwine mufarisi waṋu a nga ita u itela u sumbedza uri u a ni ṱhonifha. Humbelani mufarisi waṋu uri a ite zwi fanaho. Ni fhane zwe na ṅwala, ni shumele khazwo.
Ṅwalani zwine na zwi funa nga ha mufarisi waṋu. Nga murahu ni mu vhudze nḓila ine na dzhiela ngayo nṱha zwenezwo zwithu zwavhuḓi zwine a ita.
Megan o amba uri: “U itela u sumbedza uri ndi ṱhonifha mukalaha wanga, ndi tea u ita zwithu zwine zwa sumbedza uri ndi a mu dzhiela nṱha na uri ndi ṱoḓa a tshi takala. Na zwithu zwiṱuku zwine nda amba kana u ita zwi nga sumbedza uri ndi a ṱhonifha mukalaha wanga.”
Tsha ndeme a si uri inwi muṋe ni ḓidzhia ni tshi ṱhonifha, fhedzi ndi uri mufarisi waṋu a ḓipfe a tshi ṱhonifhiwa.
ZWINE BIVHILI WA AMBA: “Ambarani u pfela vhuṱungu, vhuthu, u ḓiṱukufhadza, u vuḓa na u sa fhela mbilu.”—Vhakolosa 3:12.
