U ambedzana ndi musi inwi na vhana vhaṋu ni tshi vhudzana nḓila ine na khou ḓipfa ngayo na zwine na khou zwi humbula.

Zwi nga konḓa u ambedzana na vhana musi vho no aluwa. Musi vhana vhaṋu vha tshi kha ḓi vha vhaṱuku, khamusi vho vha vha tshi ni vhudza tshiṅwe na tshiṅwe. Fhedzi zwa zwino a vha tsha tou ambesa na inwi ngauri vho no vha vhaswa. A ni ḓivhi zwine vha khou humbula kana nḓila ine vha ḓipfa ngayo. Zwi tou nga no ima kha iṅwe thungo ya mulambo muhulu ngeno vhana vhaṋu vho ima seli ha mulambo. Musi vhana vha tshi vhonala u nga a vha khou ṱoḓa u amba na inwi, ndi tshone tshifhinga tshine vha vha vha tshi khou zwi ṱoḓesa nga maanḓa.

Ambani na ṅwana waṋu musi a tshi ṱoḓa u amba. Ni ambe nae naho hu vhukati ha vhusiku.

Lisa o amba uri: “Ni nga pfa ni tshi khou ṱoḓa u mu vhudza uri, ‘Tsha kale-kale ni sa ambi? Ndo vha ndi na inwi ḓuvha ḽoṱhe!’ Fhedzi ndi ngani ri tshi nga gungula arali vhana vhashu vha tshi khou ṱoḓa u amba na riṋe? Kani a si zwine ra zwi ṱoḓa?”

Herbert o amba uri: “Khofhe ndi a dzi funa fhedzi musi vhananga vha tshi khou ṱoḓa u amba na nṋe, ndi amba navho naho hu vhukati ha vhusiku.”

ZWINE BIVHILI YA AMBA: “Muṅwe na muṅwe nga a ṱoḓe zwi vhuyedzaho muṅwe, hu si zwi vhuyedzaho ene muṋe fhedzi.”​—1 Vhakorinta 10:24.

Ni si ngo tendela zwiṅwe zwithu zwi tshi ni thithisa. Muṅwe khotsi o amba uri: “Nga zwiṅwe zwifhinga musi vhananga vha tshi khou amba na nṋe, muhumbulo wanga u ita u tshi xela nda thoma u humbula zwiṅwe zwithu nahone vha a zwi vhona uri a thi khou vha thetshelesa!”

Arali ni tshi thithiswa nga TV kana zwiṅwe zwishumiswa zwa elekitroniki zwi ngaho sa founu, dzimani kana ni zwi vhee fhasi. Ni thetshelese zwine ṅwana waṋu a khou amba naho ni tshi pfa u nga a si zwa ndeme.

Maranda o amba uri: “Ri tea u sumbedza vhana vhashu uri nḓila ine vha ḓipfa ngayo ndi ya ndeme kha riṋe. Arali vha pfa u nga nḓila ine vha ḓipfa ngayo a si ya ndeme kha riṋe vha nga si ri vhudze nḓila ine vha ḓipfa ngayo kana vha ṱoḓa thuso huṅwe fhethu.”

Anthony o amba uri: “Ni songo fhihamelwa naho zwi tshi nga kuhumbulele kwa ṅwana waṋu kwo bva nnḓa ha nḓila.”

ZWINE BIVHILI YA AMBA: “Ni ṱhogomele nḓila ine na thetshelesa ngayo.”​—Luka 8:18.

Wanani nḓila ya u amba na vhana vhaṋu. Nga zwiṅwe zwifhinga vhana vha ḓipfa vho vhofholowa u amba musi ni tshi khou ita miṅwe mishumo navho.

Nicole o amba uri: “Ri ambedzana musi ro fara lwendo nga goloi. U amba ri tshi khou ita zwiṅwe zwithu, nṱhani ha u amba ro livhana zwifhaṱuwo zwi ita uri vhana vha ḓipfe vho vhofholowa.”

Tshiṅwe tshifhinga tshavhuḓi tsha u amba, ndi musi ni tshi khou ḽa.

Robin o amba uri: “Musi ri tshi khou ḽa zwiḽiwa zwa nga madekwana, ri amba nga ha zwithu zwavhuḓi na zwi si zwavhuḓi zwe zwa itea nga ḽeneḽo ḓuvha. Zwenezwi zwi ita uri ri vhe na vhushaka ha tsini na u ri thusa u ḓivha uri ri nga si sedzane na thaidzo ri roṱhe.”

ZWINE BIVHILI YA AMBA: ‘Ni fanela u ṱavhanya u thetshelesa, ni lenge u amba.’​—Yakobo 1:19.