U hangwela zwi amba u hangwa zwithu zwe zwa ni vhaisa na u sa fara muthu nga mbilu. U hangwela a zwi ambi u dzhiela fhasi vhukhakhi kana u ita u nga a ho ngo vhuya ha vha na tshithu tsho khakheaho.

ZWINE BIVHILI YA AMBA: “Bvelani phanḓa ni tshi konḓelelana na u hangwelana zwi tshi bva mbiluni naho muṅwe o ni khakhela.”​—Vhakolosa 3:13.

Aaron o amba uri: “Arali ni tshi funa muthu, a ni nga ḓo livhisa ṱhogomelo kha vhukhakhi hawe, ni ḓo livhisa ṱhogomelo kha zwine a khou lingedza u vha zwone.”

U fara muthu nga mbilu, zwi nga kwama mutakalo waṋu na u ni tsikeledza nahone zwi nga kwasha na mbingano yaṋu.

Julia o amba uri: “Mukalaha wanga o vhuya a humbela pfarelo nga ha zwiṅwe zwithu zwe zwa vha zwo mmbaisa nga maanḓa. Zwo nkonḓela uri ndi mu hangwele. Ndo fhedzisela ndo mu hangwela, fhedzi ndi tou ri ndo lengela-ni. Zwo sokou ri vhangela thaidzo dzi sa ṱoḓei.”

LINGEDZANI ZWI TEVHELAHO

Musi ni tshi vhaiswa nga zwine mufarisi waṋu a amba kana u ita, ni ḓivhudzise zwi tevhelaho:

• ‘Naa ndi a ṱavhanya u sinyuwa?’

• ‘Naa zwi a ṱoḓea uri ndi humbelwe pfarelo kana ndi nga sokou hangwa nga hazwo?’

HASELEDZANI NA MUFARISI WAṊU

• Zwi ri dzhiela tshifhinga tshingafhani uri ri hangwelani?

• Ri nga ita mini uri ri kone u hangwelana nga u ṱavhanya?

ZWINE ZWA NGA THUSA

• Musi no dinalea ni songo humbula uri mufarisi waṋu o vha a khou ṱoḓa u ni vhaisa.

• Lingedzani u tsinya iṱo, ni humbule uri “roṱhe ri a khakha lunzhi.”​—Yakobo 3:2.

Kimberly o amba uri: “Zwi a leluwa u hangwela musi noṱhe no khakha, fhedzi zwi a konḓa musi zwi tshi vhonala u nga ho khakha muthu muthihi. A zwo ngo leluwa u ṱanganedza musi muṅwe muthu a tshi humbela pfarelo na u mu hangwela, zwi ṱoḓa u ḓiṱukufhadza.”

ZWINE BIVHILI YA AMBA: “Ni ṱavhanye ni dzudzanye mafhungo.”​—Mateo 5:25.