VHABEBI
6: U Laya
ZWINE ZWA AMBA ZWONE
U laya zwi nga ambela kha u livhisa kana u funza. Tshiṅwe tshifhinga zwi katela u kaidza ṅwana musi o khakha. Kanzhi zwi katela u gudisa ṅwana kutshilele kwavhuḓi uri a ite phetho dzavhuḓi a sa athu khakha.
NDI NGANI ZWI ZWA NDEME
Ano maḓuvha, vhunzhi ha vhabebi a vha tsha laya vhana vhavho, vha shavha uri vhana vha ḓo ḓidzhia vhe si tshithu. Fhedzi vhabebi vhavhuḓi, vha vhetshela vhana vhavho milayo i pfalaho na u vha gudisa u i tevhedza.
Pamela o amba uri: “Vhana vha tea u vhudzwa zwine vha tea u ita na zwine a vho ngo tea u zwi ita uri vha vhe vhathu vhavhuḓi musi vha tshi aluwa. Vhana vha sa layiwi, vha fana na tshikepe tshine tsha sokou ya ngeno na ngei nahone tshi nga fhedzisela tsho nupela.”
ZWINE NA NGA ITA
Ni songo vha muya murwela hoṱhe. Arali ṅwana a sa tevhedza milayo yaṋu, hu tea u vha na masiandoitwa. Fhedzi ni dzule ni tshi mu khoḓa musi a tshi i tevhedza.
Christine o amba uri: “Ndi dzulela u khoḓa vhananga musi vha tshi thetshelesa ngauri vhathu vha ḽino shango a vha thetshelesi. U vha khoḓa zwi ita uri vha tende u kaidzwa arali vho khakha.”
ZWINE BIVHILI YA AMBA: “Muthu u ḓo kaṋa zwe a zwala.”—Vhagalata 6:7.
Ni songo kaludza zwithu. Ni tea u kaidza ṅwana zwi tshi ya nga miṅwaha yawe, vhukoni na uri zwe a ita zwo khakhea lungafhani. Ṅwana u tea u kaidzwa u ya nga zwe a khakha. Sa tsumbo, arali a sa tevhedza milayo ye na i vhea malugana na u shumisa founu, ni nga i dzhia lwa tshifhinga nyana kana u ita uri a si tsha i shumisesa. Fhedzi ni tea u iledza u sinyuswa nga zwithu zwiṱuku.
Wendell o amba uri: “Ndi lingedza u sedza uri naa ṅwananga o khakha nga khole kana o tou piringedzea. Hu na phambano vhukati ha vhukhakhi vhune ṅwana a tea u vhudzwa nga haho na mukhwa u si wavhuḓi une a tea u kaidzelwa wone.”
ZWINE BIVHILI YA AMBA: “Ni songo sinyusa vhana vhaṋu, uri vha si ṱungufhale.”—Vhakolosa 3:21.
Sumbedzani lufuno. Vhana vha a ṱanganedza na u tevhedza zwe vha kaidzelwa zwone musi vha tshi ḓivha uri vhabebi vhavho vha khou zwi ita nga nṱhani ha uri vha a vha funa.
Daniel o amba uri: “Musi mutukana washu o khakha, ro mu humbudza uri zwithu zwavhuḓi zwe a zwi ita kale zwi ita uri ri ḓirwe khana ngae. Ro mu ṱalutshedza uri vhukhakhi hawe vhu nga si tshinye vhumatshelo hawe arali a ita tshanduko dzine dza ṱoḓea na uri ri ḓo mu thusa uri a dzi ite.”
ZWINE BIVHILI YA AMBA: “Lufuno a lu fheli mbilu, lu na vhuthu.”—1 Vhakorinta 13:4.
You May Also Like
TSHIINGAMO
Ni Fanela U Kaidza Hani Vhana Vhaṋu?
Bivhili i ṱalusa zwithu zwiraru zwi shumaho zwa u kaidza nga hu bvelelaho.
