Musi munna na mufumakadzi vha tshi shumisana, vha vha vha tshi nga vhareili vha bufho vhane vha vha na tshipikwa tshithihi. Naho ha nga vha na thaidzo, a hu na muthu ane a ḓo humbula u ita phetho e eṱhe.

ZWINE BIVHILI YA AMBA: “A vha tsha ḓo vha vhavhili, fhedzi vha ḓo vha ṋama nthihi.”​—Mateo 19:6.

Christopher o amba uri: “Munna ma mufumakadzi vha tea u shumisana uri zwi vha tshimbilele.”

Arali munna na mufumakadzi vha sa shumisani, musi hu tshi vha na thaidzo, vha ḓo sumbana nga minwe nṱhani ha u tandulula thaidzo. Mafhungo maṱuku a nga guma o no vha mafhungo mahulwane.

Alexandra o amba uri: “U shumisana ndi zwa ndeme nga maanḓa mbinganoni. Arali nṋe na mukalaha wanga ro vha ri sa shumisani, ro vha ri tshi ḓo fana na khonani mbili dzine dza dzula dzoṱhe fhedzi dzi sa vhofhi fhungo ḽa khwaṱha.”

ḒIVHUDZISENI ZWI TEVHELAHO

• Naa ndi dzhia tshelede ine nda i hola i yanga fhedzi?

• Naa ndi ḓipfa ndo awela musi mufarisi wanga e siho tsini?

• Naa ndi ḓi sendedza kule na mashaka a mufarisi wanga naho ene e na vhushaka ha tsini navho?

HASELEDZANI NA MUFARISI WAṊU

• Ndi mini zwine ra khou zwi ita zwavhuḓi sa vhavhingani?

• Ndi ngafhi hune ra khou ṱudza hone hune ra tea u khwinisa?

• Ndi mini zwine ra nga ita u itela uri ri kone u shumisana zwavhuḓi sa vhavhingani?

ZWINE ZWA NGA THUSA

• Kha ri ri ni khou tamba mutambo wa thenisi na mufarisi waṋu, ni tshi khou tambela thimu dzi sa fani. Ni nga ita mini uri ni kone u vha kha thimu nthihi na mufarisi waṋu?

• Nṱhani ha u humbula uri ni nga ita mini uri ni kunde, humbulani uri vhuvhili ha vhoiwe ni nga ita mini u itela uri ni kunde.

Ethan o amba uri: “Ni songo livhisa ṱhogomela kha uri ndi nnyi o khakhaho. Tsha ndeme vhukuma ndi uri ni vhe na mulalo na vhuthihi na mufarisi waṋu.”

ZWINE BIVHILI YA AMBA: “Ni songo lavhelesa zwaṋu fhedzi, ni lavhelese na zwa vhaṅwe.”​—Vhafilipi 2:3, 4.