VHASWA
11: U Vha Mushumi Wa Biko
ZWINE ZWA AMBA ZWONE
Vhashumi vha biko a vha bvafhi. Nṱhani hazwo vha takadzwa nga u shuma u itela u vhuyedza vhone vhaṋe na vhaṅwe, naho mushumo u sa ḓo ita uri vha khoḓwe.
NDI NGANI ZWI ZWA NDEME
Ri na vhuḓifhinduleli vhune ra tea u vhu hwala naho ri tshi nga vha ri sa zwi takaleli. Ri khou tshila kha shango ḽo ḓalaho vhathu vhane vha takalela u dzula nga ṋala, zwino u vha mushumi wa biko zwi nga ni vhuyedza vhukuma.—Muhuweleli 3:13.
Reyon o amba uri: “Ndo ṱhogomela uri ndi a fushea na u takala arali nda shuma nga maanḓa. U fushea zwo nthusa uri ndi fune u shuma. U vha mushumi wa biko, zwi ḓo ita uri ni vhe na dzina ḽavhuḓi.”
ZWINE BIVHILI YA AMBA: “U shuma nga maanḓa kha mishumo yoṱhe zwi a vhuyedza.”—Mirero 14:23.
ZWINE NA NGA ITA
Ṱahulelani mavhonele avhuḓi nga ha mushumo nga u ita zwi tevhelaho.
Lwelani u ita mushumo muṅwe na muṅwe zwavhuḓi. Ni tea u ita mushumo muṅwe na muṅwe nga mbilu yaṋu yoṱhe, hu sa londwi uri ndi mushumo wa hayani, wa tshikolo kana wa u ḓitshidza. Musi ni tshi vho kona mushumo waṋu, ṱoḓani dziṅwe nḓila dza u khwinisa. Khamusi u u ita nga u ṱavhanya kana u khwinisa nga dziṅwe nḓila. Musi ni tshi vha makone kha mushumo waṋu, ni ḓo ḓiphiṋa nga u u ita.
ZWINE BIVHILI YA AMBA: “Naa wo no vhona munna ane a kona mushumo wawe? U ḓo ima phanḓa ha mahosi; ha nga imi phanḓa ha vhathu zwavho.”—Mirero 22:29.
Humbulani uri vhaṅwe vha kwamea hani. Musi ni tshi ita mushumo une na tea u u ita, kanzhi zwi vhuyedza vhaṅwe. Sa tsumbo, arali na ita mushumo waṋu wa hayani zwavhuḓi, zwi nga fhungudzela vha muṱani wahaṋu mushumo.
ZWINE BIVHILI YA AMBA: “U ṋea zwi a takadza u fhira u ṋewa.”—Mishumo 20:35.
Itani zwo engedzeaho u fhira zwe zwa vha zwo lavhelelwa. Nṱhani ha u sokou ita zwe ha pfi ni zwi ite fhedzi, lingedzani u ita na zwo engedzeaho. Musi ni tshi ita zwo engedzeaho no tou ḓikhethela inwi muṋe, ni nga si pfe u nga ni khou langiwa nga muṅwe muthu.—Mateo 5:41.
ZWINE BIVHILI YA AMBA: “U ite mushumo wau wavhuḓi u tshi zwi funa, u songo tou kombetshedzwa.”—Filemoni 14.
Linganyiselelani. Vhashumi vha biko a vha bvafhi, fhedzi a vha ḓivhulayi nga mushumo, vha a linganyiselela. Vha a vha na tshifhinga tsha u awela naho vha tshi shuma nga maanḓa.
ZWINE BIVHILI YA AMBA: “Ndi khwine u vha na zwo eḓanaho tshanḓani tshithihi tshi awelaho u fhira u vha na zwinzhi zwanḓani zwivhili zwi shumaho nga maanḓa hu u pandamedza muya.”—Muhuweleli 4:6.
You May Also Like
Fhaṱuwani!
Nḓila Ine Na Nga Shumisa Ngayo Tshifhinga Nga Vhuṱali
Hu na nḓila mbili dzine dza nga ni thusa uri ni shumise tshifhinga nga vhuṱali. Naa ni kha ḓi dzi humbula?
