Ni Nga Zwi Kona!

TSHO swika tshifhinga tsha uri ni “vhe na tshivhindi,” ni dzhie vhukando. (1 Koronika 28:10) Ndi zwifhio zwithu zwa u fhedzisela zwine na nga zwi ita zwine zwa ḓo ni thusa uri ni kunde?

Ḓivhetsheleni ḓuvha. Muhasho wa Health and Human Services wa Amerika u themendela uri musi no no ḓivhudza uri ni khou litsha u daha, ni tea u vhea ḓuvha ḽine na ḓo litsha ngaḽo nahone a ho ngo tea u fhela vhege mbili. Zwenezwo zwi ḓo ita uri ni dzule no ḓiimisela. Ṅwalani ḽeneḽo ḓuvha kha khaḽenda yaṋu, ni vhudze khonani dzaṋu nahone ni songo shandula ḽeneḽo ḓuvha naho zwiimo zwaṋu zwa shanduka.

Ivhani na garaṱa i re na mafhungo ane a ḓo ni thusa u litsha. I nga vha na mafhungo a tevhelaho na zwine zwa nga ni thusa uri ni dzule no ḓiimisela:

● Zwiitisi zwaṋu zwa u litsha

● Nomboro dza founu dza vhathu vhane na nga vha founela musi ni tshi pfa ni na lutamo lwa u daha

● Maipfi ane a ḓo ni thusa u swikelela tshipikwa tshaṋu, a nga vha a ndimana dza Bivhili, sa Vhagalata 5:22, 23.

Tshimbilani na yeneyo garaṱa tshifhinga tshoṱhe nahone ni i vhale lwo vhalaho nga ḓuvha. Na musi no no litsha u daha, dzulani ni tshi sedza yeneyi garaṱa musi ni tshi pfa ni tshi khou tama u daha.

Litshani zwoṱhe zwi tshimbidzanaho na u daha. Ḓuvha ḽaṋu ḽa u litsha ḽi sa athu swika, ivhani ni tshi litsha u ita zwithu zwine zwa tshimbidzana na u daha. Sa tsumbo, arali no ḓowela u daha ni tshi tou vuwa nga matsheloni, ni tendele hu tshi fhela awara kana u fhira ni sa athu daha. Arali ni tshi daha ni tshi khou ḽa kana ni tshi tou fhedza u ḽa, litshani zwenezwo. Nahone ni ḓigudise u ambela nṱha musi ni noṱhe uri: “Ndo livhuwa, fhedzi a thi tsha daha.” U ita zwenezwi zwi ḓo ni thusa u lugiselela ḓuvha ḽine na ḓo litsha ngaḽo. Zwi ḓo ni humbudza na uri hu si kale ni ḓo vha ni si tsha daha.

Ḓilugiseleleni. Musi ḓuvha ḽaṋu ḽa u litsha ḽo no vha tsini, rengani zwithu zwine na nga zwi ḽa musi ni tshi pfa ni na sakha ḽa u daha sa: dzi-carrot, tshepisi, nḓuhu na zwiṅwe. Humbudzani khonani dzaṋu na vha muṱani waṋu nga ha ḓuvha ḽine na khou litsha ngaḽo na nḓila ine vha nga ni tikedza ngayo. Musi ḽeneḽo ḓuvha ḽo no vha tsini tshoṱhe, laṱani zwithu zwa u shela khazwo zwiṱompi zwa fola, zwa u funga fola na tshiṅwe na tshiṅwe tshine tsha nga ni linga, sa mafola a re nḓuni, goloini, zwikwamani kana mushumoni. Zwi a konḓa u humbela fola kha khonani kana u renga phakhethe nṱhani ha u dzhia fola ḓirowarani. Zwiṅwe hafhu, bvelani phanḓa ni tshi rabelela uri Mudzimu a ni tikedze, ni zwi itese musi ni tshi tou daha lwa u fhedza.​—Luka 11:13.

Vhathu vhanzhi vho litsha khonani yavho i si yavhuḓi, i re na khombo, ine ya vha fola. Na inwi ni nga zwi kona. Hu si kale, ni ḓo vha na mutakalo wavhuḓi na u pfa no vhofholowa.

 [Tshifanyiso]

Tshimbilani na yeneyo garaṱa tshifhinga tshoṱhe nahone ni i vhale lwo vhalaho nga ḓuvha