Vhathu vhane vha hwala vhuḓifhinduleli, u nga kona u ḓitika ngavho. Musi ni tshi vha humbela uri vha ite zwiṅwe zwithu, vha zwi ita zwavhuḓi nahone nga tshifhinga.

Ṅwana a nga guda u hwala vhuḓifhinduleli naho a tshi kha ḓi vha muṱuku vhukuma. Bugu ine ya pfi Parenting Without Borders yo amba uri: “Musi vhana vhe na miṅwedzi ya 15, vha ita zwoṱhe zwine vhabebi vhavho vha vha vhudza zwone. Musi vhe na miṅwedzi ya 18, vha ṱoḓa u ita zwine vhabebi vhavho vha ita zwone. Fhethu hunzhi, musi vhana vhe na miṅwaha miṱanu u ya kha ya sumbe, vhabebi vhavho vha thoma u vha gudisa mishumo ya hayani. Naho vha tshi kha ḓi vha vhaṱuku, vhana vha a kona u ita mishumo minzhi zwavhuḓi.”

Fhethu hunzhi, musi vhana vho no aluwa vha a pfuluwa hayani vha lingedza u dzula nga vhone vhaṋe, fhedzi zwi a vha balela vha dovha vha humela hayani kha vhabebi vhavho. Tshifhinga tshinzhi, zwenezwi zwi itiswa ngauri vhaswa vha vha vha songo gudiswa u shumisa tshelede zwavhuḓi, u ita mishumo ya hayani kana u hwala vhuḓifhinduleli ha ḓuvha ḽiṅwe na ḽiṅwe.

Nga zwenezwo, ndi zwa ndeme u gudisa ṅwana uri a nga hwala hani vhuḓifhinduleli musi o no aluwa. Bugu ine ya pfi How to Raise an Adult, yo amba uri: “A ni ṱoḓi uri vha dzule vha tshi ḓitika nga inwi u swika vha tshi vha na miṅwaha ya 18, nga murahu na vha litsha uri vha ḓivhonele nga vhone vhaṋe.”

Vha ṋeeni mishumo ya nḓuni.

ZWINE BIVHILI YA AMBA: “U shuma nga maanḓa kha mishumo yoṱhe zwi a vhuyedza.”​—Mirero 14:23.

Vhana vhaṱuku vha a zwi funa u thusa vhabebi vhavho kha mishumo ine vha khou ita. Lwonolwo ndi lutamo lwa nzulele kha vhana nahone ni nga shumisa tshenetshi tshibuli u itela u vha ṋea mishumo ya hayani.

Vhaṅwe vhabebi vha pfa vha tshi koloṅwa u ita zwenezwi. Vha amba uri a vha ṱoḓi u vha khokhovhedza nga u vha ṋea mishumo ya hayani ngauri vho no ḓi vha na mishumo minzhi ya tshikolo.

Vhana vhane vha ṋewa mishumo ya hayani vha shuma zwavhuḓi tshikoloni ngauri vha vha vho no guda u ṱanganedza na u fhedzisa mishumo yoṱhe ine vha ṋewa yone hayani. Bugu ine ya pfi Parenting Without Borders yo amba uri: “U sa tendela vhana vhashu vha tshi ri thusa musi vha tshi ṱoḓa u ita nga u ralo, zwi nga ita uri vha thome u humbula uri u thusa vhaṅwe a si zwa ndeme. Vha nga thoma na u humbula uri vha tea u itelwa zwithu nga vhaṅwe.”

 Samusi zwo sumbedzwa kha yeneyi bugu, u gudisa vhana u ita mishumo ya hayani zwi vha gudisa uri vha itele vhaṅwe zwithu nṱhani ha u lavhelela u itelwa na u ṋea vhaṅwe nṱhani ha u lavhelela u ṋewa. U ita mishumo ya hayani zwi thusa vhana u vhona uri vha tshipiḓa tsha ndeme hayani na u pfesesa uri vha tea u hwala honoho vhuḓifhinduleli.

Thusani vhana vhaṋu u hwala vhuḓifhinduleli ha vhukhakhi havho.

ZWINE BIVHILI YA AMBA: “Thetshelesa nyeletshedzo, u ṱanganedze ndayo, uri u thanye tshifhingani tshi ḓaho.”​—Mirero 19:20.

Arali ṅwana waṋu o ita vhukhakhi, khamusi o tshinya tshithu tsha muṅwe muthu, ni songo zwi dzumba. Ṅwana a nga kona u ṱanganedza masiandoitwa a vhukhakhi hawe, khamusi nga u humbela pfarelo kana u lifha tshe a tshinya.

U ṱanganedza vhukhakhi zwi ḓo gudisa vhana vhaṋu

•   u amba ngoho na u tenda uri vho khakha

•   u iledza u vhona vhaṅwe mulandu

•   u iledza u vhuyafhedza vhukhakhi

•   u humbela pfarelo musi zwo tea