Arali no sedzana na zwithu zwi konḓaho, a zwi timatimisi uri ni nga lavhelela uri khonani yaṋu ya tsini i ni thuse. Vhaṅwe vhathu vha tshi humbula nga yeneyo nḓila, vha amba uri Mudzimu a si khonani yavho ngauri vha vhona uri a huna tshine a khou tshi ita u itela u vha thusa. Fhedzi ngoho ndi ya uri Mudzimu o no ri itela zwithu zwinzhi zwi ri vhuyedzaho, nahone hu na zwine a ḓo zwi ita u itela u fhelisa thaidzo na tshengelo zwine ra sedzana nazwo ṋamusi. Ndi mini zwine Mudzimu a ḓo zwi ita?

Mudzimu u ḓo fhelisa vhuvhi hoṱhe nga u fhelisa muthomi waho. Bivhili i a ṱalusa uri onoyo muthomi ndi nnyi musi i tshi ri: “Shango ḽoṱhe ḽi zwanḓani zwa muvhi.” (1 Yohane 5:19) Yesu o amba uri onoyo “muvhi” ndi Sathane Diabolo, “muvhusi” wa ḽino shango. (Yohane 12:31) Ṱhuṱhuwedzo ya Sathane ndi yone yo itaho uri shango ḽi vhe kha vhuimo vhune ḽa vha khaho. Ndi mini zwine Mudzimu a ḓo zwi ita?

Hu si kale Yehova Mudzimu u ḓo dzhia vhukando a tshi shumisa Murwa wawe Yesu Kristo u itela u “fhelisa Diabolo ane a vha na maanḓa a u ita uri hu vhe na lufu.” (Vhaheberu 2:14; 1 Yohane 3:8) Bivhili i a zwi sumbedza uri Diabolo u a zwi ḓivha uri “o salelwa nga tshifhinga tshiṱuku” uri a fheliswe. (Nzumbululo 12:12) Mudzimu u ḓo fhelisa na vhathu vhoṱhe vhane vha ita zwithu zwivhi.—Psalme ya 37:9; Mirero 2:22.

Musi Musiki washu o no fhelisa vhuvhi hoṱhe kha ḽifhasi, u ḓo ita uri tshipikwa tshawe tsha uri vhathu vho fhelelaho vha tshile tshoṱhe kha ḽifhasi tshi ḓadzee. Ndi mini zwine ra nga zwi lavhelela?

Mulalo wa tshoṱhe na u tsireledzea. “Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.”—Psalme ya 37:11.

Zwiḽiwa zwinzhi zwi re na mutakalo wavhuḓi. “Shangoni hu ḓo vha na muḓalo wa mavhele; dziṱhohoni dza dzithavha hu ḓo guma maḓaka.”—Psalme ya 72:16.

Nnḓu dzavhuḓi na mishumo i fushaho. “Vha ḓo fhaṱa dzinnḓu vha dzula khadzo; vha ḓo [ṱavha] miṱokola vha ḽa mitshelo yayo. . . . Zwe vhanangiwa vhanga vha zwi wana nga mishumo yavho zwi ḓo ḽiwa nga vhone vhaṋe.”—Yesaya 65:21, 22.

Naa ni lavhelela nga maṱo matswuku u tshila kha ḽifhasi ḽo raloho? Hu si kale, zwenezwo ri ḓo zwi tshenzhela ḓuvha na ḓuvha.

Ṋamusi, roṱhe ri a kwamea nga u lwala na u fa, fhedzi hu si kale zwenezwo a zwi tsha ḓo vha hone. Hu si kale, Mudzimu u ḓo ita uri ri vhuyelwe nga tshiṱhavhelo tsha Yesu nga u ita “uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” (Yohane 3:16) Hu ḓo vha na mvelelo dzifhio?

Malwadze a ḓo fheliswa. “Kha vho dzulaho fhano a huna ane a ḓo ri: Ndi a lwala; ngauri vhathu vha dzulaho fhano vho hangwelwa zwivhi.”—Yesaya 33:24.

Lufu a lu tsha ḓo ṱhupha vhathu. “Lufu u ḓo lu lozwa tshoṱhe; Muṋe wa vhoṱhe Yehova u ḓo fhuluṱa maṱodzi kha zwoṱhe zwifhaṱuwo.”—Yesaya 25:8.

Vhathu vha ḓo tshila tshoṱhe. “Tshifhiwa tshine ra ṋewa nga Mudzimu ndi u tshila tshoṱhe nga Kristo Yesu Murena washu.”—Vharoma 6:23.

Vho faho vha ḓo vuswa. “Hu ḓo vha na mvuwo ya vho lugaho na vha songo lugaho.” (Mishumo 24:15) Vha ḓo vhuyelwa nga tshifhiwa tsha Mudzimu tsha tshirengululi.

Zwenezwi zwithu zwoṱhe Mudzimu u ḓo zwi khunyeledza nga nḓila ḓe?

Mudzimu u ḓo khunyeledza tshipikwa tshawe nga ha vhathu na ḽifhasi a tshi shumisa muvhuso wa ṱaḓulu une muvhusi wawo a vha Yesu Kristo, Khosi yo nangwaho. (Psalme ya 110:1, 2) Wonoyo ndi muvhuso we Yesu Kristo a funza vhatevheli vhawe uri vha u rabelele a tshi shumisa haya maipfi: “Khotsi ashu wa ṱaḓulu, . . . Muvhuso wau nga u ḓe.”—Mateo 6:9, 10.

Muvhuso wa Mudzimu u ḓo vhusa ḽifhasi ḽoṱhe nahone wa fhelisa maṱhupho na tshengelo yoṱhe. Wonoyu ndi Muvhuso wa khwine khwine une roṱhe ra ṱoḓa u vhuswa ngawo! Ndi ngazwo Yesu o fhisetshela u ḓivhadza “mafhungo maḓifha a Muvhuso” musi e kha ḽifhasi nahone a ṱuṱuwedza na vhufunziwa vhawe uri vha ite zwi fanaho.—Mateo 4:23; 24:14.

Yehova Mudzimu o fhulufhedzisa u itela vhathu vhawe zwenezwi zwithu zwavhuḓi a tshi ṱuṱuwedzwa nga lufuno lune a vha nalwo. Naa zwenezwi a zwi ni ṱuṱuwedzi uri ni ṱoḓe u mu ḓivha na u sendela tsini nae? Musi ni tshi khetha u ita ngauralo ni ḓo vhuyelwa hani? Thero i tevhelaho i ḓo ṱalutshedza.