U swika zwino ro no guda zwithu zwinzhi zwine zwa ri thusa u fhindula mbudziso ine ya ri Mudzimu Ndi Nnyi? Ro thoma nga u guda kha Bivhili uri dzina ḽawe ndi Yehova na uri pfaneleo yawe khulwane ndi lufuno. Ro dovha ra guda nga ha zwithu zwe a zwi ita na nga ha zwine a kha ḓi ḓo zwi itela vhathu vhawe vhoṱhe. Naho hu na zwithu zwinzhi zwine na nga zwi guda nga ha Mudzimu, ni nga ḓivhudzisa uri u guda nga hae zwi nga ni vhuyedza hani.

Yehova u fhulufhedzisa uri musi ‘ni tshi mu ṱoḓa, u ḓo ita uri ni mu wane.’ (1 Koronika 28:9) Musi ni tshi ḓidina nga u ṱoḓa u ḓivha zwo engedzeaho nga ha Mudzimu, ni ḓo wana tshifhiwa tsha ndeme tsha u vha “khonani ya tsini” ya Yehova! (Psalme ya 25:14, NW) Ni ḓo vhuyelwa hani nga honoho vhukonani?

Dakalo ḽa vhukuma. Yehova u ṱaluswa sa “Mudzimu o takalaho.” (1 Timotheo 1:11) U vha na vhushaka ha tsini nae na u edzisa nḓila ine a ita ngayo zwithu zwi ḓo ni ḓisela dakalo ḽa vhukuma, ḽine ḽa nga ni vhuyedza kha mutakalo waṋu. (Psalme ya 33:12) Zwi ḓo dovha zwa ni thusa uri ni tshile vhutshilo vhu takadzaho ngauri ni ḓo iledza u tshila nga nḓila i si yavhuḓi, na ṱahulela mikhwa yavhuḓi nahone na vha na vhushaka havhuḓi na vhaṅwe. Ni ḓo tendelana na zwe mupsalme a amba: “Nṋe ndi ḓifhelwa nga u vha tsini na Mudzimu.”—Psalme ya 73:28.

U ṱhogomelwa na u takalelwa nga Mudzimu. Yehova o fhulufhedzisa vhashumeli vhawe uri: “Ndi ḓo u dededza nga maṱo anga.” (Psalme ya 32:8) Zwenezwi zwi amba uri Yehova u sumbedza vhashumeli vhawe dzangalelo na u vha ṱhogomela nga muthihi nga muthihi u ya nga zwine vha zwi shaya. (Psalme ya 139:1, 2) Musi no no vha na vhushaka ha tsini na Yehova ni ḓo zwi ṱhogomela uri u dzula e na inwi misi yoṱhe.

Vhumatshelo havhuḓi. Yehova u ri thusa u tshila vhutshilo vhu takadzaho na vhu fushaho zwino, a dovha a ita uri zwi konadzee u vha na vhumatshelo havhuḓi vhukuma. (Yesaya 48:17, 18) Bivhili i ri: “Uri vha wane vhutshilo vhu sa fheli, vha fanela uri vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.” (Yohane 17:3) Fhulufhelo ḽe Mudzimu a ri ṋea ḽone ḽi nga shuma sa thikho ine ya ita uri ri dzule ri ‘na vhungoho nahone ro khwaṱha’ kha ano maḓuvha a konḓaho.—Vhaheberu 6:19.

Hu na zwiṅwe zwiitisi zwinzhi zwine zwa ita uri ri ṱoḓe u ḓivha Mudzimu na u vha na vhushaka ha tsini nae. Ni nga amba na muṅwe wa Ṱhanzi dza Yehova kana na dalela jw.org/ve u itela u wana mafhungo o engedzeaho a thusaho.